GBOO FEAN BƆƐ KƆYINDI KO A 7 - Yataa 'a Dɔbɛnɛ Nama

¹ N dia nyɔɛ nu, tooɔdia chɛ n fan mbe mmɔ ko a. Chɛ ko a, mmɔ mmɔ boo a ko, a bɔ ko yama gbɛɛ ɔ. Fen kɔ fen, miin mbe a ma, mmɔ ma ɛ nyamui Yataa tena, mmɔ 'a fɔɛ gbɛɛ ɔ, mmɔ ni mmɔ boo a ko an ma. Mmɔ gbu sin, mmɔ 'a fɔɛ gbɛɛ ɔ, mmɔ ni ma tenchen Yataa ko a, a ma chianɛ ni ma mmɔ ɔ.

Pɔɔ ɔ te, buɔdia min mbe a ɔ

² Kaina ni ma wo faa ɔ, nn ko a. Koe min na mu, nn ma baa ni mɔ ɔ mɔ ma, nn ma mɔ ɔ mɔ sɔ ni chia yama ma, nn ma mɔ ɔ mɔ kafa ni.

³ N ma bai chɛ fɔ ni, n tɛɛ si koe an na wo ma. Koe min na mu, yɔ n na‑a a fɔ buɛ min dɔ tee, wo ko a di nn ye kaka. Mmɔ bɛ, mmɔ ɛ ma‑a wan tima ɔ tima ko a. Mmɔ tɛ ee ka‑a fɔɛ chɛ ɔ, saya wɛɛ ee mmɔ tɛ ka‑a.

⁴ N yii faen mu wo ma kaka. N mbe yonka min tɛ wo ma, a da a koo. Ko gbɛama chɛ n gbɛɛ ɔ, nn mbe miin dɔ bia tena, buɔdia koo n dɔ, a gbu danka ee.

⁵ Koe min na mu, nn cheenɛ gbakɔ wɛɛ Masidonia chɛnyɛ ɔ, nn nii ma nn suin ni ɛnden bɛɛ a. Gbun koe dechee an ni a ɔ ben‑da, kan kɔ kan nn 'na tindanɛ. Mɔɛ n mbe koɔ‑a, an bɛ an bɔɛ n na, min gbu‑a a ma nn chian‑da.

⁶ Chɛɛ Yataa, min mbe faayɔn tɔɛ n faa ma nande, a‑a a ma wan nn faa chima‑a, kɛn Taitɔsi na‑a nn tena.

⁷ A na koe dechee nii ma, min na‑a a ma, nn bu ɔ dia‑a. Chɛɛ a na‑a konanɛ min bɛɛ chɛ, a si bia ma, wo‑a min chɛ a a. A‑a a ɔ yian fan to nn na, wo toen mu buɛ min dɔ wo ni n yen. A sin to, a ɔ, mbɛ wo faa yɔnden mu. A yɛ to, mbɛ wo ma bɛnden mu sɔ koe a n ko a. Chɛ gbu an ko a mu gbɛ, n 'na buɔdia gbu ma munda‑a.

⁸ Koe min na mu, n‑na gboo min nyɛn wo tena, ni a na‑a wɛɛ faayɔnɛ a wo ma, n ma n gbɔsɔ ni chɛ a. Chɛɛ n gbu sin, kɛn n‑na a ɔ yen, mbɛ an gboo chɛ‑a wo faa yɔn fan, a ma‑a wan n ma faagbaa a, tima ɛnden ko a.

⁹ Koe n sin mbe ka gbɛ buɛ min dɔ sanche, n bu ɔ di. A ɔ ma di faayɔn chɛ an ko a, n‑na gboo a min be wo ma. Chɛɛ a ɔ di koe min na, faayɔn chɛ‑a a ma, wo ka‑a wo sɔn yama n kun ma. Wo 'a faayɔn chɛ, Yataa‑a an ma ka ko chɛndɛ a. Chɛ ni a ɔ yian, mbɛ nn ma ko yama kan kɔ kan ma ni wo a.

¹⁰ Koe min na mu, faayɔnɛ min mu Yataa 'a dɔbɛnɛ a, ɛ a ma wan mmɔ ni mmɔ kan kɔ sɔ ko yama ma a, a ni na bauncha a. A sin, n ni ma‑a a ɔ sɔn‑da ee a ɔ. Chɛɛ faayɔnɛ min mbe bɔ mɔgbuya ta chia a, ɛ na kuɔ fɔ saya an na.

¹¹ Wo wandi gbu, wo a ɔ yen bɛ, wo 'a faayɔnɛ chɛ, Yataa‑a min dɔ bɛn wo ko a, a ma‑a koe min na wo tena. Wo ma‑a gbɛ tea mɔ wa an na, wo ma bɛndenɛ ɛ a ɔ yen koe a, mbɛ wo ma ko yama ma ni. Wo faa tɛ‑a wan, wo chian‑da, yiinachii ko a wo ɔ, mbɛ wo‑a wo wandi be, wo ma bɛndenɛ ɛ ko yama ma mɔɛ n tɔɔya koe a. Wo gbu, wo‑a a ɔ yian, mbɛ mabɔ ee wo ma, chia ɔ chia a, an koe gbu gbɛɛ ɔ.

¹² A sin gbu, n‑na gboo chɛ nyɛn bɛɛ wo tena, n ya nii ko yama ma mɔɛ an na, chɛ ma, ko yama ma‑a mɔɛ min na. Chɛɛ n‑na a nyɛn, n ni a ɔ yian wo a gbadan, Yataa chen kɔɔ, wo e buɛ min dɔ nn ko a tea tea ɔ.

¹³ Chɛ an fɛ mu, wo‑a nn faa ma nande. A sin, a ka nn ta ma, Taitɔsi wɛɛ‑a a ma wan, nn bu ɔ dia‑a kaka, a si a ta buɔdia ma, wo tɛ ɔ. Koe min na mu, a‑a a ɔ yian fan nn na, wo gbɛɛ‑a a deman buɛ min dɔ, a bu ɔ ni dia.

¹⁴ N gbu na‑a wo ma yonka tɛ wan a tena, wo sin ma n na mau ni. Tima ɔ tima ko a, nn‑na bai miin gbɛɛ fɔ wo ye, tea nu mu. A sin, a chia dɔndɔ gbe chɛ a mu, nn‑na yonka min tɛ Taitɔsi tena, a si wo ma, a wɛɛ ma‑a tea a.

¹⁵ A sin, chɛ ko a, wo 'a koadia ma ɛ munda tena wan a faa ɔ, ɛ ma a yii na chii‑a wo a. A si wo gbɛɛ ma bɛnden ni buɛ min dɔ, bea koe a dasi chɛ n fɛ, a ni miin be wo ma. A yɛ to, wo gbɛɛ, wo‑a wo boo si buɛ min dɔ a kɔɔ ma samba ɔ, chianɛ ɛ wo ɔ.

¹⁶ N mbe buɔdia bɔ wan, koe min na mu, n danden mu wo a chɛndɛ chɛ.