GBOO FEAN BƆƐ KƆYINDI KO A 6 - Yataa 'a Dɔbɛnɛ Nama

¹ Nn bɛ an mbe wai chɛ tena dɔndɔ a, nn bɛ Yataa wandi a. Chɛ ko a gbɛ, nn mbe wo disa tena, wo wɛn‑na Yataa 'a koadia demanɛ ma sɔn, wo ni a bia wo boo fea a.

² A mu min na, Yataa‑a a fɔ wan a 'a gboo ɔ, a ɔ, “Tima min na n ni basan wo ma, n‑na n ya a mun fan wo ma. Mbɛ n‑na wo deman bauncha sɔn tee ma.” A yen ko, tima che‑a, Yataa basan koe a wo ma. Bi tee chɛ, a mu tee an na, bauncha ma sɔn koe a.

³ Nn ma to ni, nn ni kɔnɛ sɔ mɔ ɔ mɔ ya ɔ. Chɛ an mbe a ma‑a, mɔ ɔ mɔ ee wai chɛ ma bɔ‑a, nn mbe min chɛ ka.

⁴ Chɛɛ nn mbe min ma, nn 'na wai chɛ buɛ gbɛɛ ɔ, nn mbe nn tachɛ buɛ ma mɛn fan, yɔ Yataa 'a wai chɛ mɔɛ nu. A chia chɛ a, nn mbe nn faa bia wan ko gbɛama n dɔ, yakɔɔtawa n dɔ, a basan ko yawaenɛ n dɔ a.

⁵ A yɛ to, an‑na nn gbasi wan, an‑na nn sa pimbi chenɛ a, an‑na koɛ bun nn ma. A ma‑a wan nn‑na wai chɛ, a ɔ benden ba gbu a. A sin to, chinɔ nii nɔ, daun fen bɛɛ nii nɔ.

⁶ Nn‑na a ɔ yian fan, mbɛ nn mbe wai chɛ tena Yataa an ko a. Nn sɔnɛ a koen fan mu Yataa tena, a 'a yiimatɛ ɛ wan nn dɔ, nn mbe nn faa bia wan. A sin to, nn mbe ko chɛndɛ ma wan mɔɛ n na. Yataa Nyina ɛ wai chɛ tena wan nn dɔ, koadia wɛɛ ɛ nn faa ɔ.

⁷ Sakana bai chɛ wɛɛ, nn mbe min sa, Yataa 'a gbasaya an mbe a ɔ. Chɛɛ chɛ fenɛ miin mbe nn boo nyima a, an mbe to nn manɛ a, an mu nn tan buɛ an na, nn tandenɛ min chɛen mu Yataa tena.

⁸ Mɔɛ dɔ n mbe basɔmaya be wan nn ma, dɔ n sin mbe baa bɔ nn ma. Dɔ n mbe nn tɔɛ a dia, dɔ n sin mbe a yɔn. Mɔɛ dɔ n mbe nn ya fania fɔ mɔɛ n na. Chɛɛ chɛ gbɛɛ ɔ, nn mbe tea an fɔ.

⁹ Mɔɛ dɔ n sin dɔ, mɔ ɔ mɔ ma nn sɔn. Chɛɛ chɛ gbɛɛ ɔ, mɔɛ n‑na nn sɔn fan. Saya ɛ ben‑da nn san‑da, chɛɛ yɔ wo‑a a ɔ yen buɛ min dɔ, nn mbe wɛ tun fɔɛ ɔ. An mbe nn tɔɔya tena wɛɛ boo ɔ boo, chɛɛ nn ma fa ni.

¹⁰ Faayɔnɛ ɛ nn tan tena wɛɛ, chɛɛ chɛ gbɛɛ ɔ, nn mbe buɔdia bɔ wan tee ɔ tee a. Nn maen mu bɛɛ yɔn tɔɛ n na, chɛɛ nn mbe mɔ sɛsɛ n ma tena wan nyan tɔɛ n na. Nn maen mu mɔɛ n fan na, fen kɔ fen mbe ee miin boo ɔ. Chɛɛ fen kɔ fen gbu, ɛ nn fan boo ɔ.

¹¹ Nn dia nyɔɛ nu Kɔyindi, nn‑na ko ɔ ko yian wo a, nn‑na nn faa gbɛɛ be.

¹² Wo 'a koadia nn tena, a danka ee. Chɛɛ wo wandi gbu, wo wan mbe ban tena koadia yian koe a nn na.

¹³ Chɛ ko a, n mbe koɔ tena gbɛ wo tena yɔ n 'na denɛ nu. Wo a ma, nn ko a ni dia ka wo wɛɛ ye. Wo wo faa n bu ka nn ye.

Pɔɔ ɛ Chisianɛ n na si‑a, ma koe a tenchen Yataa ko a

¹⁴ Wo wo boo bɔ ma koe a kuiɛ dɔndɔya ɔ, wo bɛ mɔɛ n na, miin ma an kai fa ni Chisɔsi Chasi a. Tea an fea ko yama a, an mbe ee bɛn. Manɛ ɛ ma kaina min, pimbi ee che ma‑a nɔ.

¹⁵ Chasi n fea Sitana a, an mbe ee che bɛn‑da. Mɔɛ wɛɛ, min‑na a kai fa Chasi a, an mbe ee che ma‑a ko dɔndɔɛ ɔ, an mɔɛ chɛ a, min ma a kai fa ni a a.

¹⁶ Yataa 'a chenɛ nu, an bɛ fen chɛ n na, an‑na miin ya Yataa a, ko dɔndɔ ee che ma‑a an tɛ ɔ. Koe min na mu, mmɔ mu chenɛ an na, Yataa ko a, min mbe ma‑a kuɔ fɔ ko a. Yataa wandi gbu sin‑na a fɔ ka wan, a ɔ, “N mbe ma‑a wan an tɛ ɔ, n mbe ben ben an tɛ ɔ. N sin mbe ma‑a wan an 'na Yataa a, an bɛɛ, an mbe ma‑a wan n 'na mɔɛ n na.”

¹⁷ Chɛ an fɛ mu, Mansa Yataa‑a a fɔ, a ɔ, “Wo bɔ mɔɛ chɛ n tɛ ɔ, wo wo wandi ka an kaa a. Wo sin ma wo boo chɛ ko kan kɔ kan dɔ, min ma nyamuien mu n tena. N sin, n mbe n boo si‑a wan wo kɔɔ.”

¹⁸ Yataa Mansa Wa‑a a fɔ wan to, a ɔ, “N mbe ma‑a wan wo fa a, mbɛ wo wɛɛ ma‑a n 'na denɛ kaima n na, a basan n 'na denɛ musuma an na.”