GBOO FEAN BƆƐ KƆYINDI KO A 4 - Yataa 'a Dɔbɛnɛ Nama

Pɔɔ ɛ bai ɔ yian‑da, a si Yataa wai chɛ ma, ɛ min chɛ tena

¹ Chɛ an fɛ mu, nn faa ee yɔn wai chɛ chɛ koe a. Koe min na mu, Yataa 'a chinchincha ɔ mu, a‑a wai chɛ be nn ma a chɛ koe a.

² Chɛɛ nn‑na nn yii na chii, nn ma nn boo chɛ ni mauma koe kan kɔ kan dɔ, a ni ma nun dɔ wɛɛ a. Nn sin mbe ee koe n ma, miin mbe mɔɛ n bun. Nn gbu sin mbe ee Yataa 'a bai ma sa chia ɔ chia a. Chɛɛ nn mbe fɔɛ min dɔ, Yataa chen kɔɔ, basɔmaya da faenɛ kɔɔ mu. A sin, chɛ ɛ na tena wan pɛmbɛ a nn ko a, mɔɛ gbɛɛ tena, yiinachii chɛndɛ ɔ.

³ A sin, nn mbe chɛ ma tena wɛɛ, mɔɛ dɔ n mbe ee che Yataa bai chɛ ɔ gbɛ‑a, nn mbe min dɔ yian tena. An mɔɛ chɛ nu, miin mbe ee a ɔ gbɛ, an mu chɛ n fan na, miin mbe kasaa tena.

⁴ An mbe ee che dan‑da Yataa bai chɛ a. Koe min na mu, an yiima ɛ tun pimbi an dɔ, Sitana boo ɔ, min 'na gbasaya ɛ dunya chɛ kun ma. A wan mbe a ma tena, an mbe ee man chɛ yen, ɛ ma man‑da an ma. Manɛ chɛ, min mbe ka sakana bai chɛndɛ chɛ ɔ, a si Chisɔsi ma. A wan Chasi chɛ, an mu Yataa bɔ nyɔɛ a.

⁵ Nn mbe sakana bai min dɔ yian, a ma si ni nn fandi an ma. Chɛɛ a gbu an nɛ, mbɛ Chisɔsi Chasi an mu mansa a. Nn tana sin gbɛ, nn mu wo 'a yɔnɛ n fan na, Chisɔsi ko a.

⁶ A sin, Yataa na‑a a fɔ wan, a ɔ, “Manɛ ni be, a bɔ pimbi ɔ.” A wan Yataa dɔndɔ gbe chɛ, an mbe a ma a 'a manɛ ɛ ma mmɔ faa n dɔ. A ni man, a ni a ma, mmɔ ni yiimatɛ sɔn, a si Yataa 'a manɛ ma. Man chɛ, min mbe yen tena man‑da, a ka Chisɔsi Chasi ya kɔɔ.

⁷ Chɛ gbɛɛ ɔ, Yataa Nyina 'a tɔnɔnɛ ma kawaenɛ ɛ ka mmɔ wɛn boo ɔ, mmɔ ɛ wan yɔ boo da. Chɛ ɛ a ɔ yian fan, mbɛ gbasaya ɛ Yataa an boo ɔ, mmɔ wan ma.

⁸ Tima sɛsɛ ko a, ko gbɛama ɛ nn tan fan, chɛɛ a ee nn nimisa‑a. Tima dɔsa an na, nn kɔndɔ fiien ba an mbe ma, chɛɛ nn yii fa tena ɛ wan.

⁹ An mbe ko ma gbaaenɛ n sa wan nn ma, chɛɛ chɛ ma a ɔ yian ni, mbɛ Yataa ɛ a boo bɔ wan nn kɔɔ. A sin, dumɛ ɛ si wɛɛ nn na tima dɔ n na, chɛɛ a ee ma kasaa a nn ma.

¹⁰ Tima ɔ tima ko a, Chisɔsi na‑a saya min chɛ, ɛ wan ben tena nn fɛ nn gboo ɔ. Chɛ ni a ma, ɛ fɔɛ nama min dɔ, a ni yen nn dɔ.

¹¹ Nn 'na fɔɛ gbɛɛ ɔ, saya ɛ wan tun ben‑da nn na san‑da, Chisɔsi wakoe a. Chɛ ni a ma, a ni fɔɛ min nyɔn sima ɔ, a ni yen nn gboo chɛ ɔ.

¹² Chɛ a ɔ yian fan, mbɛ saya ɛ wan tun ben‑da nn na san‑da. Chɛɛ wo tana, kuɔ fɔ fɔɛ an mbe wo ko a.

¹³ Yataa 'a gboo ɔ te, “N‑na n kai fa Yataa a, an fɛ mu, n mbe bai chɛ sa.” A chia dɔndɔ gbe chɛ a, nn bɛɛ, nn na‑a bai sa wan, koe min na mu, nn bɛɛ kai faen mu Yataa an na.

¹⁴ Nn‑na a ɔ sɔn fan, mbɛ Yataa an‑na a ma, Mansa Chisɔsi kɔɔ sɔ‑a a ka saya ɔ. Ɛ a ma‑a wan nn bɛɛ kɔɔ ni sɔ, a ka saya ɔ, nn ni bɔ Chisɔsi gba ɔ. A sin mbe ta‑a wan nn na, a basan wo wɛɛ a, mmɔ ni ma a chen kɔɔ.

¹⁵ Koe min na mu, wo ko a mu, koe chɛ n gbɛɛ n mbe ma tena. A sin, Yataa 'a koadia demanɛ ɛ che tena buɛ min dɔ mɔ sɛsɛ ma, an bɛɛ, an mbe Yataa wai bɔ ka wan, min mu basɔmaya a a tena.

Pɔɔ ɔ te, mmɔ ni mmɔ yii na chii ya ɔ ma ma

¹⁶ Chɛ an fɛ mu, nn faa ee yɔn. Nn gboo chɛ, mɔgbuya ɔ, ɛ na tena wɛɛ ka boo ɔ boo tui‑a, chɛ gbɛɛ ɔ, Yataa Nyina min mbe nn fɛ, a ɔ gbɛama mu tee ɔ tee a.

¹⁷ Nn mbe ko gbɛama miin dɔ bia tena ka sanche, ɛndenɛ mu, a sin, an dɔ ee mɛ tena. Chɛ an mbe na‑a kuɔ fɔ tɔnɔnɛ wa an na, min benden mu kaka ko gbɛama chɛ n ma.

¹⁸ Koe min na mu, nn yiima ee koe chɛ n fan ma, mɔ gbu ɛ miin yen a ya a. Chɛɛ ɛ fen chɛ n fan ma, mɔ gbu ee min yen a ya a. Mɔ gbu ɛ fenɛ min yen ka a ya a, ɛ ma dechee tima kundu an ko a. Chɛɛ mɔ gbu ee fenɛ min yen a ya a, ɛ ma wan kuɔ fɔ ko a.