GBOO FEAN BƆƐ KƆYINDI KO A 2 - Yataa 'a Dɔbɛnɛ Nama

¹ Chɛ an fɛ mu, n‑na n yii na chii, mbɛ n ma na to wo tena, n ni wo faa yɔn.

² Koe min na mu, ni n‑na wo faa yɔn, mɔ dɔ gbɛɛ ee ma‑a to nɔ n bu ɔ dia koe a. Chɛ ee ma‑a, fɔ wo wan dechee, n‑na wo wɛn faa yɔn, wo wan mbe n bu ɔ dia.

³ Chɛ an fɛ mu, n‑na gboo saa chɛ nyɛn wo tena, n na‑a min nyɛn ka. N nii ma to ni, n ni na nɔ, mbɛ n‑na faayɔnɛ ma sɔn wo a, wo wɛn mbe a ma, n bu ɔ ni dia. Koe min na mu, n danden fan mu a a, mbɛ ni n bu ɔ dia‑a, mbɛ wo gbɛɛ bu ɔ dia‑a.

⁴ N‑na gboo saa chɛ nyɛn wo tena tima min na, n faa yɔnden ni kaka, n bu ɔ nii ma di ɛnden bɛɛ a, di an ni n ya a. N 'na yiinachii nii ma, n ni wo faa yɔn. Chɛɛ n toen ni wo ni a ɔ sɔn, wo 'a koadia da a koo buɛ min dɔ n faa ɔ.

Pɔɔ ɛ a fɔ‑a an ye, an ni mɔɛ chɛ to nɔ, min‑na ko yama ma

⁵ N fan tena ma, chɛɛ mɔɛ ɛ nɔ wo tɛ ɔ, min naen mu faayɔnɛ a wo gbɛɛ tena. N ni a fɔ wo ye, tea ɔ, mbɛ a naen mu faayɔnɛ a wo tena, chia dɔndɔ an na. Chɛɛ n ma to ni, n ni an koe chɛ ma chian, a ben a gbu ɛ buɛ min dɔ.

⁶ Wo sɛsɛ, wo e tɔɔya min chɛ‑a a mɔɛ chɛ a, a‑a a kun a ko a.

⁷ Chɛ gbɛɛ ɔ, ɛ nyan fan gbɛ wo ni a to nɔ, mbɛ wo‑a a nande. Ni chɛ ma, faayɔnɛ ɛ koa‑a wan a ma.

⁸ Chɛ an fɛ mu, n mbe wo disa tena, wo ni a ɔ yian to a a, mbɛ wo toen fan mu a a chɛndɛ chɛ.

⁹ N na‑a gboo chɛ nyɛn wo tena chɛ an na, n ni wo yiima yan. N ni a ɔ gbɛ, ni n 'na dasi nu, wo ma bɛnden fan mu tima ɔ tima ko a a ya koe a.

¹⁰ Mɔ ɔ mɔ, wo e min to‑a nɔ, a 'a ko yama ko a, n bɛɛ n mbe a to‑a wan nɔ. N‑na ko ɔ ko min to nɔ, ni tataya koe gbu ma wɛɛ, n mbe a ma‑a wan wo ko a, Chasi chen kɔɔ.

¹¹ Chɛ ni a ma, Sitana ma na mmɔ bɔ yaa a. Koe min na mu, mmɔ‑a a ɔ sɔn fan a yiima ɛ buɛ min dɔ.

¹² N che‑a wan Towasi duu ɔ, sakana bai chɛndɛ chɛ ɔ yian koe a nɔ, a si Chasi ma. N che‑a kɛn, n‑na a ɔ yen fan, mbɛ Mansa Chisɔsi na‑a chia sa wan nɔ, a 'a wai chɛ koe a.

¹³ Chɛɛ n faa nii ma chima ni, koe min na mu, n nii ma Taitɔsi tan ni nɔ, n suun ma nyɔɛ Chasi ɔ. Chɛ na‑a a ma wan, n‑na n saa nɔ mɔɛ n na, mbɛ n ta‑a Masidonia chɛnyɛ ɔ.

Pɔɔ ɔ te, Chasi an mbe gbasaya be mmɔ ma

¹⁴ Chɛɛ n mbe Yataa wai bɔ tena. Nn ma‑a mɔ dɔndɔɛ a, Chisɔsi Chasi a. An mbe a ma tena tima ɔ tima ko a, nn mbe kun Sitana ma. A sin, Yataa ɛ a ma wan, nn mbe sakana bai chɛ ɔ yian kan kɔ kan, a si Chasi ma, yɔ fen kunyɛ a diama ɛ ta buɛ min dɔ.

¹⁵ A mu min na, nn mbe wan yɔ fen kunyɛ a diama, Chasi‑a min be Yataa ma. Fen kunyɛ a diama chɛ, min mbe che chɛ n ma, miin mbe gbɛ bauncha ma sɔn‑da, ni chɛ nu, miin mbe kasaa tena, an 'na ko yama n boo ɔ.

¹⁶ Mɔɛ chɛ nu, miin mbe kasaa tena, an mu fen kunyɛ yama an na, min mbe na saya a. Chɛɛ mɔɛ chɛ n tana, miin mbe bauncha ma sɔn tena, kunyɛ a diama mu, min mbe fɔɛ be. Mɔ bonda chɛ sima ee to nɔ gbɛ, min mbe kun ko bonda chɛ sima ma koe ma, a ta gbasaya a.

¹⁷ Koe min na mu, nn mbe ee ka yɔ mɔ sɛsɛ dɔ nu, miin mbe Yataa 'a bai ya, fen sɔn koe a a ɔ dechee. Chɛɛ Yataa an‑na nn sɔ. An fɛ mu, nn fan wai chɛ mɔɛ nu Chasi ye, nn mbe a 'a sakana bai ɔ yian tea chia a, a chen kɔɔ.