GBOO FEAN BƆƐ KƆYINDI KO A 12 - Yataa 'a Dɔbɛnɛ Nama

Pɔɔ ɛ a ɔ yian‑da, Mansa Chisɔsi Chasi‑a koe miin yian a a

¹ N mbe yonka a tun‑da wan a ma. Fen kɔ fen mbe ee wɛɛ ka boo ɔ boo yonka ɔ. Chɛɛ n mbe a a tun‑da wan gbɛ koɔ koe a, a si koe n ma, miin dɔ nunden ni, Mansa Chisɔsi‑a miin dɔ yian n na.

² N‑na kamin dɔndɔ sɔn fan, min ni Chisianɛ a. Yataa‑a an kamin chɛ ya wan, mbɛ a sɛ‑a a a pɔɔ banda bu ɔ. San tan kun ma naanin fan ben‑da gbɛ, kɛn koe chɛ chɛ‑a a ɔ. Chɛɛ n ma a ɔ sɔn, ni a gbugbu an ya a, a sɛ‑a, chɛ ma, ni a ma‑a cho ɔ wan. Yataa dɔndɔ gbe, an‑na a ɔ sɔn.

^3-4 A sin, n gbu ni a fɔ to, n‑na a ɔ sɔn fan, mbɛ kamin chɛ ya‑a wan, a sɛ‑a banda bu ɔ. N ma a ɔ sɔn, ni a gbugbu an ya a, a sɛ‑a, chɛ ma, ni a ma‑a cho ɔ wan. Yataa dɔndɔ gbe, an‑na a ɔ sɔn. A sin, a‑a koe n na min fan, miin dɔ ee che yian‑da. Koe nu, mɔ gbu ee che a da tu‑a miin na.

⁵ Chɛ an fɛ mu, n mbe yonka tɛ‑a wan, a si kamin chɛ ma. Chɛɛ n mbe ee yonka tɛ, a si n fandi ma. N mbe yonka tɛ dechee, a si fen chɛ n fan ma, miin mbe a ɔ yian, mbɛ gbasaya ee n boo ɔ.

⁶ Ni n toen mu wɛɛ, n ni yonka tɛ, n mbe ee che ma‑a woo mɔɛ a. Koe min na mu, n mbe ma‑a ka tea an fɔ‑a. Chɛɛ n mbe ee yonka tɛ. Koe min na mu, n ma to ni mɔ ɔ mɔ ni n ya mɔ chenama a, a ben koe n ma, an mbe n yen miin ma‑a, a ni ben to koe n ma, an mbe miin na min n da a.

⁷ A sin to, Yataa nii ma to ni n kunɛ ni koa, yonka a, a si ko ɔ nunden chɛ n ma, miin dɔ yian‑da n na. Yataa‑a mɔnɛ ma koe si wan n na. An koe chɛ ma‑a wan Sitana 'a bosa a, n gbasi koe a, n kunɛ ma na koa n na.

⁸ N‑na Mansa Chisɔsi fai wan, gba sawa ko a, an koe chɛ ma, n dɔ, a ni n boo ka.

⁹ Chɛɛ a‑a a fɔ wan n ye, a ɔ, “N 'na koadia demanɛ, a‑a a kun i ko a. Koe min na mu, tima min na ee kun ko ma, n 'na gbasaya danka ee a tima chɛ a.” Chɛ an fɛ mu, n bu ɔ di yonka tɛ koe a kaka, a si gbasaya ma min mbe ee n boo ɔ, min mbe a ma, Chisɔsi 'a gbasaya ni ma n kun ma.

¹⁰ Gbasaya ee ka buɛ min dɔ n boo ɔ, chɛ‑a n faa chima, Chasi ko a. N faa chimaen mu, mainɛ ɔ bia koe a, yakɔɔtawa bia koe a, ko ma gbaaenɛ ɔ bia koe a, a basan ko gbɛama n na. Koe min na mu, gbasaya ee n boo ɔ tima min na, a tima chɛ a mu, n dɔ gbɛ.

Pɔɔ ɛ bai sa‑a, a si a 'a yiinachii ma, Kɔyindi mɔɛ n ko a

¹¹ N mbe ka wooya koe n fan ma tena, chɛɛ wo wan‑na a din n ma, a ma koe a. Koe min na mu, a ni nyan fan, wo ni n pɛmbɛ. Ni mɔ a tenden bɛɛ gbu ma n na, chɛɛ mɔɛ chɛ nu, wo e miin chee ka Chasi 'a sɔ mɔɛ wa n na, an ma ben ni n ma chia ɔ chia a.

¹² Yataa‑a a ma wan, n‑na kamaya ko wa sɛsɛ ma, a ɔ yian koe a wo a, mbɛ Chisɔsi 'a sɔ mɔɛ mu n na. N na‑a an ma wan, faabia wa ɔ.

¹³ N nii ma wo bia boo yama chɛ ni, ko kan kɔ kan dɔ, n ni wo ka chɔchi tɔɛ chɛ n ma. Fɔ dechee, n nii n 'na suun feanka sa wo kun ma. Ni chɛ mu ko yama an na, mbɛ wo dimu.

¹⁴ Sanche gbɛ, gba sawan bɔɛ an nɛ ka, n ma bɛndenɛ ɛ, na koe a wo kɔndɔn‑da. A sin, n mbe ee wo ɔ tisa fen kɔ fen ko a. Koe min na mu, n ma to ni wo boo fenɛ an na, n toen mu wo wandi gbu an na. A ni ma boo ɔ boo gbɛ, denɛ n fan mbe ee an woo mɔɛ n da kɔ. Chɛɛ an woo mɔɛ n fan mbe an da kɔ.

¹⁵ Ɛ ma wan buɔdia n ma, n ni n boo fenɛ gbɛɛ be, a basan n fandi gbu wɛɛ a, basan koe a wo ma. N mbe chɛ ma‑a wan, n 'na koadia kun ma ɛ sa‑a wan wo ko a, n ta ma ni dɔɔya wɛɛ wo faa ɔ.

¹⁶ Chɛɛ wo dɔ nu, wo dɔnden fan mu a ma, mbɛ n ma n 'na suun feanka si ni wo kun ma. Chɛɛ chɛ gbɛɛ ɔ, ɛ wo 'a yiinachii ɔ, mbɛ yaa tɔɛ mu n na, a sin n na‑a wo boo bia wan yii kɔɔ.

¹⁷ Chɛɛ a ma to ni n yii ma, n ni ben mɔɛ chɛ n dɔndɔ wɛɛ ɔ, n na‑a miin sɔ wo tena, n ni wo kafa. Ae?

¹⁸ N na‑a Taitɔsi disa wan na koe a wo tena. Mbɛ mmɔ suun ma nyɔɛ Chasi ɔ, n‑na a sɔ, an fea a a. Taitɔsi nii ma wo kafa ni, ae? Nn fea Taitɔsi a, nn yiima ni dɔndɔ gbe, a basan nn 'na ko ma buɛ wɛɛ a.

¹⁹ A ma ma wo yiima chɛ gbɛɛ ɔ, mbɛ nn mbe nn fandi an ma fɔ tena wo tena. Nn mbe ma ka Yataa chen kɔɔ wan, nn mbe ma bai sa‑a, Chasi faa ma a. A sin, nn dia nyɔɛ nu, nn na‑a a gbɛɛ ma, basan koe mu wo ma.

²⁰ N faa gbaaenɛ mu, kɔkɔɛ ni n che‑a wo tena, n mbe ee na‑a wo tan‑da, yɔ n toen mu n ni wo tan buɛ min dɔ. A sin to, kɔkɔɛ wo wɛɛ, wo ee na‑a to‑a n ma buɛ a, wo ta faa ma ɔ. N chiandenɛ mu, n ma na koɛ tan wo tɛ ɔ, a basan toomaya a. A yɛ to, faagbandia basan wo ta diana koe n dechee a, main chɛ basan ko ɔ fɔɛ a, dɔpanda basan ko a fasanɛ a.

²¹ N faa gbaaenɛ mu, mbɛ ni n yɛ‑a to nɔ wo tena, n 'na Yataa ɛ a ma‑a wan, a ni n ma yii, wo ya kɔɔ. A sin, n mbe na‑a di chɛ‑a wan, a si mɔɛ chɛ n sɛsɛ wakoe ma, miin na‑a ko yama ma, an sin ma an kan kɔ sɔ ni ko yama ma a. An 'na ko tɛ chɛ, min danka ee ka.