GBOO FEAN BƆƐ KƆYINDI KO A 10 - Yataa 'a Dɔbɛnɛ Nama

Pɔɔ ɛ a 'a wai ma fɔ‑a

¹ N fan Pɔɔ, n fan mbe ka wo disa tena. N fɛn mu ka, an dɔ, n ma chimaen mu, n mbe ma wo baima, n sin mbe wo bia wan chinchincha a. An dɔ, chɛɛ ni n ka‑a wo baima, n mbe wo bia wan faaakɔɔɛ a. N mbe wo disa tena, machimaya ɔ, a basan chinchincha a, Chasi ni min yian.

² N mbe wo disa tena, wo ma a ma, n ni n faa a kɔɔ wo ma, ni n che‑a nɔ wo tena tima min na. Koe min na mu, n‑na a ɔ sɔn fan, mbɛ n mbe che wan n faa sɔ‑a mɔɛ chɛ n ma. Mɔɛ chɛ nu, miin mbe a fɔ, mbɛ nn mbe koe n ma dunya chɛ ɔ yiinachii an na.

³ Koe min na mu, nn mbe wɛɛ dunya chɛ ɔ, chɛɛ nn mbe ee butuin chɛ tena a ɔ yiinachii an na.

⁴ Nn mbe chɛɛ chɛ tena feanka miin na, dunya chɛ ta ma. Chɛɛ nn mbe Yataa 'a gbasaya an ya tena, nn ni kaina n yɔn, Sitana kai fa tena nu.

⁵ Kɔɔsa bia gbɛɛ, nn mbe a yɔn fan. Nn ni yɛ, dɔpandaya min mbe mɔɛ n dɔ, min mbe an ka‑a tena Yataa sɔn‑da, nn ni a yɔn. Yiima kan kɔ kan ni ma nn boo ɔ bia ɔ, don koe a Chasi kɔɔ.

⁶ A sin, ni wo ban‑da a ɔ yian‑da gbae, mbɛ wo e Chisɔsi an ko a, nn ma bɛndenɛ ɛ ma‑a wan, mɔ ɔ mɔ tɔɔ koe a, min mbe koe ma‑a, min mbe a ɔ yian ɛnden bɛɛ a, mbɛ a ee an ko a.

⁷ Wo ya ɛ dechee fen chɛ n fan na, miin mbe wo ya kɔɔ. Ni mɔɛ ɛ wan nɔ wo tɛ ɔ, min danden mu a a, ɛ Chasi an ko a, chɛ wɛɛ ni ma a yii ma. Mbɛ Chasi ɛ buɛ min dɔ a mɔɛ chɛ ko a, nn bɛɛ, ɛ ka wan nn ko a.

⁸ Koe min na mu, n mbe ee mau, ni n‑na yonka tɛ wɛɛ kaka, a si gbasaya ma, Mansa Chisɔsi‑a min be nn ma, wo kun ma. An gbasaya chɛ, ɛ wo ɔ gbɛa koe an na, wo a bea koe ma bun.

⁹ N ma to ni wo ni a yen, mbɛ n mbe wo a chian tena wan, n 'na gboo nyɛndenɛ n na.

¹⁰ Mɔɛ n mbe a fɔ wan, an dɔ, “Pɔɔ ɛ bai miin nyɛn a 'a gboo n dɔ, an kɔɔ fanka wan, dimaya wɛɛ an dɔ. Chɛɛ,” an dɔ, “ni a ma‑a mmɔ tɛ ɔ, a ma chimaen mu, baa wɛɛ ee a da a kuiɛ ma.”

¹¹ An mɔ bonda chɛ nu, miin mbe bai chɛ fɔ tena ka, an ni chɛ ɔ gbɛ. Mbɛ ni nn ma‑a wo tɛ ɔ, nn mbe bai min fɔ, an fea bai a, nn mbe min nyɛn wo tena gboo ɔ, bai dɔndɔ gbe nu mu, tɛ bɔ ee an ma.

¹² Nn mbe ee nn fandi siman tena mɔɛ n ma, chɛ ma, nn ni nn fandi a kan an na. Mɔɛ nu, miin mbe an fandi bai. A yɛ to, an mbe an yii na chii, mbɛ an fisa a ben an bɔɛ n ma. Chɛɛ an mbe ma ka an fandi simanɛ min chɛ‑a an fandi ma, an mbe an fandi a kan an fandi a, yiimatɛ ee a ɔ.

¹³ Chɛ gbɛɛ ɔ, nn tana, nn mbe ee yonka tɛ, nn ni a ɔ ben. Nn mbe yonka tɛ dechee, a si wai chɛ an ma, Yataa‑a min be nn ma a chɛ koe a. An wai chɛ sin, a dɔndɔ mu wai chɛ an na, nn mbe min chɛ tena ka wo tɛ ɔ.

¹⁴ Koe min na mu, wo e ka nn 'na wai chɛ tena tinɛ ɔ wan, nn mbe ee nn doo bun tena wo kun ma, che koe a wo ma wai chɛ a. Nn na‑a wan sakana bai chɛndɛ chɛ a wo tena, a si Chisɔsi Chasi ma.

¹⁵ Chɛ an fɛ mu, nn mbe ee yonka tɛ, mɔ dɔ mende n‑na wai chɛ gba ma, min mbe ee tinɛ chɛ ɔ, Yataa‑a min yian nn na. Chɛɛ nn yii na tɛen mu, mbɛ wo 'a danaya ma ɛ munda‑a buɛ min dɔ, nn bɛɛ, nn mbe wai chenama chɛ‑a ka wan wo tɛ ɔ. A sin, tima ɔ tima ko a, nn mbe ma‑a a tinɛ chɛ an dɔ, Yataa‑a min yian nn na.

¹⁶ Chɛ ɛ a ma‑a wan, nn ni kun sakana bai chɛndɛ chɛ ɔ yian‑da mɔɛ n na, chɛnyɛ dɔ mende n dɔ, miin dɔ yansan wo a. Chɛ ee ma‑a yonka tɛ‑a, a si mɔ dɔ mende n ta wai ma, tanda dɔ mende ɔ.

¹⁷ Yataa 'a gboo‑a a fɔ wan, a ɔ, “Mɔɛ min toen mu a ni yonka tɛ, a ni a tɛ koe a ma dechee, Mansa Yataa‑a min chɛ a ko a.”

¹⁸ Koe min na mu, mɔɛ min mbe a wandi tando, ko gbama mu. Chɛɛ mɔɛ chɛ, Mansa Chisɔsi wandi ɛ min bai, an mu tea tando a.