GBOO FEAN BƆƐ KƆYINDI KO A 1 - Yataa 'a Dɔbɛnɛ Nama

¹ N fan Pɔɔ, n fan mbe gboo chɛ nyɛn tena, nn fea mmɔ suun ma nyɔɛ a Chasi ɔ, min mu Timoti a. Chisɔsi Chasi 'a sɔ mɔɛ mu n na. Yataa wandi an dɔn‑da, n ma koe a sɔ mɔɛ chɛ a. N mbe a nyɛn tena wo wan tena, wo wɛn mbe Yataa 'a chɔchi ɔ, Kɔyindi duu ɔ, wo bɛ Yataa 'a mɔɛ n gbɛɛ a, miin mbe nɔ Akaya chɛnyɛ tɔɛ gbɛɛ ɔ.

² Mmɔ Fa Yataa, an fea Mansa Chisɔsi Chasi a, an 'na dua ni ma wo ma, a basan an 'na faachima a.

Pɔɔ ɛ Yataa wai bɔ‑a

³ Tando ni be Yataa ma. A wan mu mmɔ 'a mansa Chisɔsi Chasi fa a, ni a 'a Yataa. Chinchincha Fa mu a wan Yataa an na. A sin fan mbe mmɔ nande chia kan kɔ kan na.

⁴ Ko gbɛama gbɛɛ ɔ, ɛ nn nande wan. Ɛ chɛ ma, min mbe a ma, nn bɛɛ ni che mɔ dɔ mende nande‑a, miin mbe ko gbɛama dɔ mende n dɔ. Yataa ɛ nn nande buɛ min dɔ, nn bɛɛ ni mɔ dɔ mende bɛɛ nande a buɛ ɔ.

⁵ Ko gbɛama miin dɔ ɛ bia, Chisɔsi Chasi ko a, a koo kaka. Ɛ ka wan to, yɔ nn mbe nande min ma sɔn, Chisɔsi Chasi a, a wɛɛ koo kaka.

⁶ Ni nn‑na ko yawaenɛ ɔ bia tima ɔ tima, wo nande koe mu, wo ni bauncha ma sɔn. Ni nn‑na nande ma sɔn, mbɛ wo wɛɛ‑a a ma sɔn. Mbɛ wo‑a fanka ma sɔn, wo faa bia koe a, wo ni ko yawaen chɛ n dɔ bia, nn bɛɛ‑a miin dɔ bia.

⁷ Nn faa ma gbaa ni ɛnden bɛɛ a, a si wo ma. Nn‑na a ɔ sɔn fan, mbɛ nn‑na ko yawaenɛ min dɔ bia, wo wɛɛ‑a an dɔ bia. Chɛɛ nn‑na a ɔ sɔn ka wan to, mbɛ nn‑na nande min bɛɛ ma sɔn, wo wɛɛ‑a a ma sɔn fan.

⁸ N suun ma nyɔɛ nu Chasi ɔ, nn ma to ni wo ni ma ka, ni nn ma‑a chɛ ɔ yian ni wo a. Ko gbɛama chɛ, nn‑na min dɔ bia Esia chɛnyɛ ɔ, nn ni a ɔ yian wo a. Suunɛ min na‑a si nn kun ma, a ni koo, a ni fanka ka wan to. A na‑a a ma wan, nn yii nii to ma koe a fɔɛ ɔ.

⁹ A ni wan gbɛ nn yii ma, mbɛ saya ni gbɛ nn ma chen da a wan. Chɛɛ chɛ ma‑a, min mbe a ma, nn ni sɛmbɛ dan koe a nn fandi 'a gbasaya a. Nn ni nn yii sɔ Yataa ma, a dechee, a wɛn mbe a ma, faa mɔɛ n mbe an kɔɔ sɔ a ka saya ɔ.

¹⁰ A na‑a nn kun bɔ wan saya ma chianden ba ɔ. A sin mbe na‑a nn kun bɔ‑a ka wan to a ɔ. Nn sin yii na tɛen fan mu a ma, mbɛ a gboo ɔ ee fa‑a nn kun bɔ koe a a ɔ.

¹¹ Wo basan nn ma, samunɛ chɛ koe a nn ko a. Ni mɔ sɛsɛ n ma‑a samunɛ chɛ‑a nn ko a, Yataa ɛ an 'na samunɛ n na min‑da wan, mbɛ a‑a nn dua. Ni chɛ ma‑a, mɔ sɛsɛ n bɛɛ, an mbe Yataa wai bɔ‑a wan nn ko a.

Pɔɔ ɛ a ɔ yian‑da, a‑a a yiima mun koe min na

¹² Nn mbe yonka tɛ ko dɔndɔ gbe an na, nn gbu sin yii na koen mu an na dechee. An nɛ, mbɛ nn mbe fɔɛ min dɔ dunya chɛ ɔ, a bɛbɛɛ nn tachɛ buɛ wo tena, mbɛ Yataa fɔɛ mu, tea ɛ min dɔ. Nn mbe chɛ ma tena Yataa 'a duaya an dɔ, mɔgbuya ta yiimatɛ ɔ ma.

^13-14 Nn mbe gboo min nyɛn wo tena dechee, an nɛ gboo a, wo e che min kan‑da, wo e min dɔ gbɛ. Chɛɛ wo‑a nn dɔ gbɛ ka buɛ min dɔ chia dɔ a, ɛ wan n yii ma, mbɛ wo e nn dɔ gbɛ‑a wan chia gbɛɛ a. Chɛ ni a ma, tee chɛ ma, mmɔ 'a mansa Chisɔsi na tee, wo ni yonka tɛ nn ma, yɔ nn bɛɛ a tɛ‑a buɛ min dɔ wo ma.

¹⁵ N danden fan mu chɛ a. An fɛ mu, n toen ni, n ni na wo kɔndɔn. N ni na, min mbe a ma, wo ni dua ma sɔn gba fea ko a.

¹⁶ N toen ni n ni che wo ma, ni n ma‑a ta‑a Masidonia chɛnyɛ ɔ. A yɛ to, ni n ma‑a yɛ‑a a ka nɔ. N ni chɛ ma‑a, min mbe a ma, wo ni n deman, n 'na ta chɛ ɔ Chudia chɛnyɛ ɔ.

¹⁷ N ni yiinachii chɛ chɛ tena tima min na, n ma a ɔ sɔn ni yiima fea an ni n dɔ. N ma a ɔ sɔn, n mbe ma yiinachii chɛ chɛ‑a, ni n mbe a chɛ mɔgbuya ta fɛ chia an na. Ni n ma bɛndenɛ an mbe ma, dɔn koe a, ni ban koe ma, fɔɛ dɔndɔɛ ɔ.

¹⁸ Yataa ee a da a kuiɛ ka a gba ɔ tima dɔndɔ wɛɛ ko a. Chɛ an fɛ mu, n bɛɛ n mbe ee che wo too ɔ dia‑a bi koe a, mbɛ sinan n‑na n yiima mun, n dɔ n mbe ee a ma to.

¹⁹ Koe min na mu, Yataa 'a denɛ Chisɔsi Chasi, a ee ka. Sidasi ni ma, Timoti, ni n fan, nn na‑a a wakoe ɔ yian fan wo a. A wan Chisɔsi ee dɔn koe ma, mbɛ a ban‑da to a ma. Chɛɛ a ta nan gbu, tima ɔ tima ko a, a dɔndenɛ an mbe ma a ma.

²⁰ Koe min na mu, Yataa ɛ tooɔdia min gbɛɛ chɛ, Chisɔsi an mbe a gbɛɛ a tachɛ. Chɛ an fɛ mu, mmɔ ɛ a fɔ, mmɔ ɔ, “A ni ma ka,” Chisɔsi tɔɛ ɔ, basɔmaya be koe a Yataa ma.

²¹ Chɛɛ Yataa wandi an‑na nn ma chɛndɛ chɛ mɔ dɔndɔɛ a Chisɔsi a, a basan wo wɛɛ a. Yataa wandi an‑na a boo sɔ nn ma, wai chɛ koe a a ko a.

²² A sin fan‑na a boo gba to nn ma, a ɔ yian koe a, mbɛ nn mbe a wan ko a. A Nyina wɛɛ, a‑a a be wan nn ma to ma koe a nn fɛ. A ni a ma, nn ni dan a a, koe miin gbɛɛ a a boo ɔ nn ko a.

²³ Chɛɛ Yataa an mu n 'na sii a, a si bai chɛ ma, n mbe ka min fɔ‑a wo ye. Mbɛ n toen ni, n ni wo to wan nɔ, an na‑a a ma n ma yɛ ni nɔ wo tena Kɔyindi duu ɔ.

²⁴ Nn mbe ee a din tena wo ma fɔsɛɛ a, wo e dan koe min na. Nn‑na a ɔ sɔn fan, wo kai faen fan mu Chisɔsi a gban. Nn mbe a ma tena, tee ɔ tee a, mmɔ bɛ ɛ wai chɛ tena, wo 'a buɔdia ko a.