1 TIMOTI 6 - Yataa 'a Dɔbɛnɛ Nama

¹ Mɔɛ miin gbɛɛ mbe yɔncha kɔɔ, an ni baa be an yɔn fa nu ma, min mbe a ma, mɔ ɔ mɔ ee na‑a bai yama sa‑a a si Yataa ma, a basan mmɔ 'a kan chɛ a.

² Yɔn fa nu miin kai faen mu Chisɔsi a, an 'na yɔnɛ n ma tɛ an dɔ, kun dɔ an‑na a yen, mbɛ an gbɛɛ an mbe chia dɔndɔɛ an na. Chɛɛ an yɔn chɛ n ni wai chɛ an ko a an sɔɛ gbɛɛ a, a mu min na, an 'na tɔnɔnɛ ɛ ta tena an kai fa tena dɔndɔ gbe wan. N toen mu i ni koe chɛ n kan, i ni an ma din.

Pɔɔ ɛ bai sa‑a, a si fania kanɛ ma, ni tea nyanɛ

³ Ni mɔ ɔ mɔ 'a kanɛ ka‑a chia chɛ ma, a ma bea ni mmɔ 'a mansa Chisɔsi Chasi 'a kan chɛ fɛ, a basan kan chɛ a a si ma koe ma Yataa fɔɛ ɔ,

⁴ a mɔɛ chɛ mu dɔpanda tɔɛ an na, a ma ko ɔ ko sɔn. Koɔ chɛ gbandi an mbe an ma, an sin mbe kɔɔsa bia chɛ wan kɔnɔ bai kan kɔ kan ma. Chɛ ɛ na toomaya an na, ko a fasanɛ, nyɔn mainɛ, a basan yii sɔ yama a an nyɔn na.

⁵ An sin mbe ma an nyɔn dɔ sawan sawanɛ an na su ɔ tee a, mɔɛ miin yiima a ma ko ni, a sin tea sima wɛɛ ee a ɔ. Ɛ wan an yii ma, mbɛ Yataa koe ee ta nyanɛ gbaa.

⁶ Tea gbu sin na, mɔɛ ɛ faachima min ma sɔn, ni mɔ ma‑a Yataa chia ma, an mu mmɔ 'a tɔnɔnɛ a.

⁷ Koe min na mu, mɔ ma na ni fen fen na dunya chɛ ɔ, mɔ sin mbe ee ta‑a fen fen na mɔ boo ɔ.

⁸ Chɛ an‑na a fɔ, ni mmɔ‑a daun fenɛ ma sɔn, a basan chii koa a, mmɔ faa ni chima chɛ a.

⁹ Chɛɛ miin toen mu an ni nyan, an mbe dɛ kan gbɛnɛ an dɔ, mbɛ an chɛɛ‑a Sitana 'a gbai a. An mbe ko sɛsɛ ma wan yiimatɛ ee min dɔ, a basan ko yama a. Chɛ ɛ an yɔn fan gbɔkɔɔ.

¹⁰ A mu min na, kɔpɔɛ koe, ko yama sɛsɛ ɛ a kuu sɔ an ma. Kɔpɔ koe wa dɛgbɛ chɛ, an‑na a ma, mɔɛ dɔ n ka‑a danaya chia ma Chisɔsi a, a sin‑na an na dɛ faa yɔn koe n dɔ.

Pɔɔ ɛ Timoti a sɛ‑a, wai ma ti bia koe a

¹¹ Chɛɛ min sien mu i ma, i wɛn‑na i wandi be Yataa ma, i ya ka chɛ gbɛɛ a. I tana, tan Yataa tena, ma Yataa fɔɛ ɔ, danaya ni ma i ɔ Chisɔsi ko a, a basan koadia a, faabia, ni machimaya.

¹² Butuinɛ chɛ i 'a danaya ko a Chisɔsi a, butuin chɛndɛ an nɛ. I che‑a wan kuɔ fɔ fɔɛ ma sɔn‑da. I sin‑na a fɔ wan den mɔ sɛsɛ ya kɔ, mbɛ i‑a i kai fa Chisɔsi Chasi a. Kuɔ fɔ fɔɛ chɛ bia i boo fea a.

¹³ Yataa ɛ mmɔ yen tena wan, min‑na fɔɛ be fen fen ma, Chisɔsi Chasi wɛɛ ɛ mmɔ yen‑da, min ma a nun ni Kɔfana Pɔnchɔsi Padeti ma, danaya min nyɔn sima ɛ a ɔ. N toen mu i ni

¹⁴ dasi chɛ ya i sɔɛ a. I ni tachɛ teaya ɔ, mabɔ ee min ma, aan tee chɛ ni che, tee min ma mmɔ 'a mansa Chisɔsi Chasi ɛ na‑a to.

¹⁵ An na chɛ, a tima ɛ Yataa an boo ɔ, tando ɛ min ma, mansa n kun ma mansa dɔndɔ gbe, mansa wa mansa n gbɛɛ ko a.

¹⁶ A dɔndɔ gbe an mbe ee fa kuɔ fɔ ko a, ɛ tun man ba an dɔ, mɔ ee che gbɛn‑da manɛ min ma, a sin mɔ ɔ mɔ ma a yen nin bɛ fɔɛ ɔ, mɔ sin mbe ee che a yen‑da. Basɔmaya fea kuɔ fɔ gbasaya ni ma a ma. A ni ma ka.

¹⁷ N toen mu i ni a fɔ chɛ n ye, miin nyanden mu dunya chɛ ɔ, an ma dɔpandaya bɔ, an sin ma an yii sɔ an 'na nyanɛ ma, fenɛ mu a a, min ma namaen mu. Chɛɛ an ni an yii sɔ Yataa an ma, min mbe fen kɔ fen be mmɔ ma, mmɔ 'a buɔdia ko a.

¹⁸ N toen mu i ni a fɔ an ye, an ni ko chɛndɛ ma, an ni nyan wai chɛndɛ ɔ, an ni ma boo ka tɔ wa a, an ma bɛndenɛ ni ma tima ɔ tima chɛ a.

¹⁹ Ni an‑na chɛ ma, an mbe ma‑a ka nyanɛ an kuu chɛ‑a an fandi ko a, dunya nama chɛ ɔ min mbe na tena. Chɛ ɛ a ma‑a wan, an ni fɔɛ ma sɔn, min mu tea fɔɛ a.

²⁰ Timoti, fen chɛ bia i boo fea a, Yataa‑a fenɛ min be i ma. I ma i too ma sɔ wooya chia ɔ bɔɛ ma, chian mbe ee min dɔ Yataa ko a, mɔɛ dɔ n mbe min chee an dɔ yiimatɛ.

²¹ Mɔɛ dɔ n bea‑a an yiimatɛ chɛ an fɛ, min‑na a ma, an‑na an kan kɔ sɔ chɔchi a. Yataa ni wo dua.