1 TIMOTI 5 - Yataa 'a Dɔbɛnɛ Nama

Pɔɔ ɛ Timoti a si‑a, mɔɛ n bia buɛ ma chɔchi ɔ

¹ I ma koɔ ma sɛen chɛ chenan kai n tena. Chɛɛ koɔ a tena basɔmaya a, yɔ e koɔ buɛ min dɔ i fa tena. Kamin tɔngbɔɛ n bia yɔ i dɔ kaima nu.

² Sunkun tɔngbɔɛ n bia yɔ i tensa musu nu, musu ko kan kɔ kan ma na i yii ma an ko a, mbɛ i‑a chenan musu n bia yɔ i de.

³ Basɔmaya demanɛ be fuinya musu n ma, miin mbe an fandi kun ye.

⁴ Chɛɛ ni denɛ n ma‑a fuinya musu min boo ɔ, ni mama n denɛ ma‑a min boo ɔ, an mbe e na to ko ɔ ko ma‑a, an ni an 'na Yataa wai ɔ yian chenɛ pɛn na. An mbe koe min chɛ‑a ka an woo mɔɛ chɛ n ye, an mbe ma‑a ka an ta kuiɛ an na yɛ‑a. Koe min na mu, Yataa faa ma koe an nɛ.

⁵ Fuinya musu chɛndɛ chɛndɛ, mɔ ee min boo ɔ, a yii faen mu Yataa an ma. Su ni tee a, ɛ samunɛ chɛ wan, ɛ ta‑a Yataa ɔ tisa‑a a deman koe a.

⁶ Chɛɛ fuinya musu min kunɛ a fuinden mu buɔdia bɔ koe a, a nɛnɛ ban‑da, a fɔɛ ɛ wɛɛ boo ɔ boo a sun da a.

⁷ Dasi chɛ n din mɔɛ n ma, min mbe a ma, mɔ ɔ mɔ ee a tɛɛ si‑a an ma, ko ɔ ko ko a.

⁸ Ni mɔ ɔ mɔ ma a ya a mun ni a 'a mɔɛ n ma, a bɛbɛɛ a ta chenɛ a mɔɛ nu, a‑a a kan kɔ an sɔ ka a 'a danaya an na Chisɔsi a. A mɔɛ chɛ yau, a ni ben mɔɛ ma min ma a kai fa ni Chisɔsi a tee dɔndɔ wɛ.

⁹ Ni i ma‑a fuinya musu kan kɔ kan tɔɛ sa‑a tɔɛ chɛ n kun ma, a ni ma fuinya an na min benden mu san bi wɔdɔɛ ma. A sin a tanden fan ni a chɛɛ tena.

¹⁰ Mɔɛ n sin mbe a bai wan a 'a ko chɛndɛ maenɛ wɛɛ ko a, min ni a ɔ. Mbɛ musu mu a a, min‑na a 'a denɛ n bɔ a ɔ chɛndɛ chɛ, a‑a a boo si sonda n kɔɔ a 'a chenɛ a, a‑a ko chɛndɛ sɛsɛ ma Chisianɛ n na. Mɔɛ miin bɛ ni yakɔɔtawa ɔ, a‑a an deman, a sin‑na a wandi be ko chɛndɛ ma a a.

¹¹ Chɛɛ fuinya musu miin ma che ni san bi wɔdɔɛ ɔ, i ma an tɔɛ chɛ a ɔ. A mu min na, ni kai sɔn sɔɛ‑a an bia, an mbe an kan kɔ sɔ‑a wan Chasi 'a wai a.

¹² Ni an‑na chɛ ma, Yataa ɛ an bia‑a wan an da a kuiɛ saa a bɔ koe ma a ɔ.

¹³ A ka chɛ ma, an mbe a kuu sɔ wan nyapen nyapencha ma yan‑da, benbenɛ a chenɛ n kun ma. Min yau chɛ ma, an mbe tɔ tɛ chɛ wan a basan ko ɔ fɔɛ ma yanɛ a, bai n fɔɛ a min ma an fɔ bai a.

¹⁴ Chɛ an‑na a fɔ, n mbe to‑a wan fuinya musu tɔngbɔɛ ni kai sɔn to, an ni denɛ n suun, an ni an 'na chenɛ n kun ma fɛn. Chɛ ɛ a ma‑a wan mmɔ chɛɛ ma nyɔɛ ee chia sɔn‑da, mmɔ tɔ yama a fasan koe a.

¹⁵ A mu min na, dɔ n ban‑da an kan kɔ sɔ‑a, bea koe a Sitana fɛ.

¹⁶ Ni musu kan kɔ kan, min kai faen mu Chisɔsi a, ni fuinya musu ma‑a a 'a suunɛ ɔ, a ni a kun ma fɛn. A ma a ma fuinya chɛ 'a suun fanka ma ni sa to chɔchi kun ma. Chɛ ɛ a ma‑a wan fuinya musu chɛndɛ chɛndɛ n mbe ee na‑a demanɛ ma sɔn‑da.

¹⁷ Gbakoo chɛ nu, miin mbe chɔchi wai ma ti bia chɛndɛ chɛ, ɛ nyan fan an ni tɔnɔn fea ma sɔn, an 'na pawa basan basɔmaya a. A bɛbɛɛ chɛ nu, miin‑na an boo a chii kan chɛ ma, an sɔɛ dondenɛ ɛ Yataa 'a bai sa ma.

¹⁸ A mu min na, Yataa 'a gboo ɔ te, a ɔ, “I ma ninchi da a chii, ni a ma‑a fenɛ tɛn‑da,” a sin to, a ɔ, “Wai chɛ mɔɛ 'a tea mu a 'a pawa sɔn koe a.”

¹⁹ I ma koe ya ka dechee a si gbakoo ma, ni mɔ fea, sawa ma siiya bɔ ni a ma.

²⁰ Tea fɔ an ye fanka ɔ, an fɛn mbe ko yama ma‑a, min mbe a ma, mɔɛ tɔɛ n ni chian.

²¹ N toen mu i ni dasi chɛ ya i sɔɛ a, i ma a to mɔ ko a, i sin ma a ɔ sii mɔ ko a. Yataa ɛ mɔ yen tena wan, Chisɔsi Chasi ɛ mɔ yen‑da, maeka n bɛɛ, Yataa‑a min ya, an‑na mɔ yen.

²² I 'a tima ya i boo bun koe a mɔɛ kun ma, a yian koe a gbakoo ya a. I 'a tima ya, mɔ dɔ mende 'a ko yama maenɛ a ee na sin i ma. To Yataa gbee an na tun.

²³ A yen ko gboo ɔ bɔ tɔ ma i a. I ma yii dechee min, chɛɛ gbɛ sima wɛɛ, i bu ko a.

²⁴ Mɔɛ dɔ n 'na ko yama maenɛ ɛ sa ɔ wan den, mɔ ɔ mɔ e na kaa a tɛ a ma. Chɛɛ dɔ n ta ɔ nunden fan mu, a ee fua bɔ‑a a yen koe a.

²⁵ Ko chɛndɛ ma wɛɛ ɛ ka wan to, a ɔ yen fan paden. Chɛɛ ni a sin dɔ ma fua nin bɛ sɔn‑da, a ee to nun dɔ.