1 TIMOTI 4 - Yataa 'a Dɔbɛnɛ Nama

Pɔɔ ɛ dasi be‑a, a si fania kan chɛ mɔɛ n ma

¹ Chɛɛ Yataa Nyina ɔ, tima ɛ che‑a wan mɔɛ n ni sɛmbɛ dan koe a Chisɔsi Chasi a, mbɛ an bea nyina yama da a kuiɛ fɛ, a basan fania kanɛ a.

² Kan yama bonda chɛ nu, ɛ ka fania yama kan chɛ mɔɛ n fan na. Gbasaya min mbe a ma, an ni ko chɛndɛ ya bɔ ko yama a, a ee to an dɔ. A maen mu yɔ an yiima faen fan mu an dɔ.

³ An dɔ, mɔ ee musu si, a ee kai sɔn, a basan daun fenɛ dɔsa daun koe a. Chɛɛ Yataa‑a daun fen chɛ n na bɔ an daun koe an na, mɔɛ n boo ɔ, miin danden mu a a. An sin mbe a wai bɔ pɛn samunɛ ɔ, mbɛ an‑na a daun.

⁴ Yataa‑a fenɛ min gbɛɛ a dan, a nyin fan. A dɔndɔ wɛɛ ma nyin mɔ ni ban a ɔ, ni mɔ‑a min kɔ min ma sɔn wai bɔɛ ɔ.

⁵ Koe min na mu, Yataa 'a bai a basan samunɛ a, ɛ fen chɛ n dua wan.

Pɔɔ ɛ Timoti a si‑a, a si ma koe ma wai chɛ mɔɛ chɛndɛ a

⁶ Ni i gboo ɔ ma fa ni dasi chɛ be koe a suun ma nyɔɛ n ma, ni i‑a Chisian danaya ɔ bai sa i faa ɔ, a basan kan chɛndɛ a, i bea‑a min fɛ chɛ gbɛɛ ɔ, e ma‑a wan wai chɛ mɔɛ chɛndɛ a Chisɔsi Chasi ko a.

⁷ I ma i boo chɛ tai ɔ, yiimatɛ ee min dɔ, a sin ma gbiti ni Yataa koe ma. Chɛɛ i wandi kan wai chɛ koe a Yataa ko a.

⁸ Ni wai mɛsɛ chɛ ɛ gboo ɔ gbɛa be wan mɔ ma, mbɛ Yataa 'a wai sin nyin fan chia ɔ chia a. A mu min na, mmɔ‑a a 'a tɔnɔnɛ ma sɔn fan bi tee chɛ a, a basan ya ɔ ma a.

⁹ Tea bai an nɛ. Kɔɔsa bia kan kɔ kan mbe ee chɛ ma, a sin mbe nyan fan mɔ ni dan a a.

¹⁰ Chɛ an fɛ mu, mmɔ ɛ tɔɔ, mmɔ ɛ sɛchɛ kaka. Koe min na mu, mmɔ yiima gbɛɛ a tɛen mu Yataa an ma. A ee chinɔ ɛnden bɛɛ a, ɛ mmɔ baun, a bɛbɛɛ mmɔ wɛn danden mu a a.

¹¹ N toen mu i ni gboo nyɛnden chɛ a ben an tena, mbɛ i‑a an kan.

¹² I ma a ma mɔ ɔ mɔ ni a yii dɛn i ta kun ma, i kamin tɔngbɔya koe a. Chɛɛ ma tɔmɔsi a an ko a chia sɛsɛ a, i da a bai basan i sɔnɛ ɔ, koadia ɔ, danaya ɔ Chisɔsi a, a sin ma bɔ ee i sɔnɛ ma.

¹³ Yataa 'a gboo chɛ kan an tena, i ni an faa ma nande, mbɛ i‑a an kan, aan n ni na tima min na.

¹⁴ Yataa Nyina‑a fenɛ min be i ma, Yataa 'a gbonka chɛ mɔɛ n koɔ‑a tima min na, mbɛ chɔchi gbakoo n‑na an boo bun i ma, a bia i boo fea a.

¹⁵ Koe chɛ n ma i ma gbɔsɔɛ a, i ni i wandi be an ma koe a, min mbe a ma, mɔ ɔ mɔ ni a ɔ yen, e ta tena buɛ min dɔ ya ɔ ma.

¹⁶ Tima ya i ben buɛ a fɔɛ ɔ, a basan i‑a kan chɛ buɛ a. A ma yɔ n‑na a fɔ buɛ min dɔ i ye, min mbe a ma, i ni bauncha ma sɔn, wo bɛ i kuiɛ a min mɔɛ n na.