1 TIMOTI 2 - Yataa 'a Dɔbɛnɛ Nama

Pɔɔ ɛ bai sa‑a, a si samunɛ chɛ ma

¹ N mbe a fɔ tena wo ye, a saa saa a ɔ, mbɛ wo ni samunɛ chɛ mɔ ɔ mɔ ko a. A sin, ni wo ma‑a Yataa ɔ tisa‑a, wo a disa chinchin koe a an ma, wo ni yɛ to, wo ni a wai bɔ.

² Samunɛ ni chɛ mansa n ko a, a basan mɔɛ tɔɛ chɛ n na, miin mbe sɔ tena nu. Chɛ ni ma, min mbe a ma, sɔnkɔ sɔnkɔɛ ni bɔ mmɔ 'a fɔɛ ɔ, mbɛ faachima ma‑a mmɔ ma, mmɔ ɛ ta‑a ma‑a Yataa fɔɛ ɔ, basɔmaya wɛɛ ɛ mmɔ ɔ chia ɔ chia a.

³ Samun bonda chɛ an nyin, a sin mbe mmɔ baun mɔɛ Yataa faa chima wan.

⁴ A mu min na, a toen mu mɔ ɔ mɔ ni tea chia sɔn, mɔ ɔ mɔ ni bauncha ma sɔn.

⁵ Koe min na mu, Yataa ɛ dɔndɔ gbe. A sin, mɔ dɔndɔ gbe an mbe mmɔ tɛ mmɔ bɛ a a. A mɔɛ chɛ mu Chisɔsi Chasi an na,

⁶ min‑na a wandi fɔɛ be, min mbe a ma, a ni mmɔ gbɛɛ kun ka. Chɛ‑a a ɔ yian fan a tima chɛ a, mbɛ tima gbu an che‑a ka, Yataa toen mu mmɔ gbɛɛ ni bauncha ma sɔn.

⁷ Chɛ ko a mu, a‑a n ya sɔ mɔɛ a, sakana bai chɛndɛ ɔ yian koe a. N ni mɔɛ n kan, Chu mɔ ma miin na, dan koe a Chisɔsi a, a basan tea sakana bai chɛndɛ a. N mbe ka tea an fɔ‑a, fania ma chɛ a.

⁸ Ɛ n ta faa ɔ, mbɛ mɔ kaima nu kan kɔ kan an ni samunɛ chɛ Yataa tena. Ni an sin ma‑a a chɛ‑a, an tandenɛ ni ma, an faa ee tɛ, an mbe ee koɛ wɛɛ chɛ.

⁹ N toen mu to musu n bɛɛ ni basɔmaya ma bɛnɛ chɛ. An ma an fandi a bonchen ba chɛ. An ma an kunɛ ma chɛ, an ni sanu chii, an ni fen baa gbɛ ma chɛ an ma, a basan koa baa gbanden ba a.

¹⁰ Chɛɛ an ni an fandi a bonchen an chɛ chɛ wai chɛndɛ ɔ, min ma biaen mu Yataa sɔn mɔɛ ko a.

¹¹ Ni an ma‑a kanɛ kɔɔ, musu n ni an fandi ma yii chia ɔ chia a, an sin ma an da a kuiɛ ma sɛ.

¹² Musu n ta mu si koe an na gbɛ. N mbe ee dɔn musu ni sɔ mɔ kaima n ya ɔ, n mbe ee dɔn a ni an kan.

¹³ Koe min na mu, Yataa‑a Adami pɛn pɛn nyan, a e na to Ifi a dan‑da.

¹⁴ A sin, ka nii ma Adami an woo ni, a na‑a Ifi an woo, min‑na a ma, a ma‑a ko yama ma mɔɛ a.

¹⁵ Chɛɛ musu n mbe bauncha sɔn‑da wan den suunɛ ɔ. Chɛ ɛ ma wan, ni yiimatɛ ma‑a an tachɛ buɛ ɔ, koadia ɛ an faa ɔ, an sin tandenɛ ɛ Yataa tena, an mbe ta‑a an kai fa‑a a a.