1 PITA 5 - Yataa 'a Dɔbɛnɛ Nama

Pita ɛ dasi be‑a, gbakoo n ma, an bɛ mɔ tɔngbɔɛ n na

¹ Sanche gbɛ, bai ɛ n da a wo ko a, wo wan gbakoo nu chɔchi n dɔ. N fandi wɛɛ, n mu chɔchi gbakoo dɔndɔ an na. A sin, siiya dɔndɔ mu n na, tɔɔya chɛ ko a, Chasi na‑a min dɔ bia. N sin, n bɛɛ n mbe an basɔmaya chɛ ma sɔn‑da wan, min dɔ ɛ yen‑da. Chɛ an fɛ mu, wo wan, n bɔ chɔchi gbakoo nu, n mbe koɔ tena wo tena n faa gbɛɛ a.

² Wo ni mɔɛ chɛ n kun ma fɛn chɔchi ɔ chɛndɛ chɛ, Yataa‑a miin be wo ma. Wo an kun ma fɛn wo faa gbɛɛ a, yɔ Yataa toen mu a buɛ min dɔ. Wo ma an kun ma fɛn faa ɔ nɔɛ a. Wo ma a chɛ pawa dechee an ko a. Chɛɛ wo‑a a chɛ, a chɛ koe a dia ko a.

³ Wo ma ma mansa n na mɔɛ chɛ n kun ma, Yataa‑a miin be wo ma an kun ma fɛn koe a. Chɛɛ wo sɔnɛ ni ma tɔmɔsi chɛndɛ a an tena, a nyin an ni bea min fɛ.

⁴ A sin, ni Chasi‑a a kunɛ a bɔ, a wɛn mu mɔɛ n kun ma fɛn mɔɛ n 'na mansa a, wo e banfua chɛ ma sɔn‑da wan, baa koo min ma. Banfua an nɛ, min mandenɛ ɛ ma‑a taun kuɔ fɔ ko a.

⁵ Wo wan mɔ tɔngbɔɛ n nan sin, a chia dɔndɔ gbe chɛ a, a nyin wo ni kooya be chenanɛ n ma. Wo ma dɔpandaya bɔ, wo e ma wai chɛ‑a wo nyɔn ye. Koe min na mu, Yataa 'a gboo‑a a fɔ wan, a ɔ, “Yataa ma to ni dɔpanda tɔɛ n na, chɛɛ ɛ koadia demanɛ chɛ‑a wan chɛ n na, miin dɔ ma panda ni.”

⁶ Chɛ an fɛ mu, wo ma dɔpandaya bɔ Yataa chen kɔɔ. Chɛ an mbe a ma‑a, a gbasa ka buɛ min dɔ, a ni wo a sɛ, a faa ma tima a.

⁷ Wo faa gbaaen mu koe miin gbɛɛ a, wo Yataa ma fɛn dechee. A gbɔsɔen mu wo ko a kaka.

⁸ Wo ma bɛndenɛ ni ma tima ɔ tima ko a, wo ya a kaenɛ ɛ. Wo chɛɛ ma nyɔɛ, Sitana, ɛ ben ben tena dau‑a, yɔ yaa ɛ ma mɔɛ yan‑da a nimisa koe a.

⁹ Wo sɔ chidi wo 'a danaya ɔ, Chasi a. Sitana ma kun wo ma. Koe min na mu, wo‑a a ɔ sɔn fan, mbɛ wo bɔɛ miin bɛɛ kai faen mu Chasi a dunya gbɛɛ ɔ, an mbe ko yawaen dɔndɔ gbe chɛ an dɔ bia tena.

¹⁰ Chɛɛ wo ee tɔɔya‑a, a ɔ yansama a. Koadia demanɛ gbɛɛ, a ti mu Yataa an na. A wan‑na wo chee, wo ni ma a 'a basɔmaya kɔɔ kuɔ fɔ ko a, ni wo ma‑a mɔ dɔndɔɛ a Chasi a. A wan mbe wo ma mɔɛ n na, miin dɔ gbɛ an 'na danaya ɔ, an sin mbe sɔ ɔ chidi. A wan mbe an kuu don gban.

¹¹ Yataa gbasayaen mu kuɔ fɔ ni kuɔ fɔ ko a. A ni ma ka.

Pita ɛ danka‑a kɔndɔnɛ ma

¹² N mbe ka gboo kunduenɛ min nyɛn‑da wo tena, Sidasi an mbe basan tena n ma. N 'na yiinachii ɔ, suun ma nyɔɛ mu a a, Chasi ɔ, n danden mu min na chɛndɛ chɛ. N toen mu n ni wo faa n ma nande, n ni a ɔ yian to wo a, mbɛ Yataa 'a koadia demanɛ gbu ɛ wan wo ko a. Wo wo boo a chii a ma gban.

¹³ Mɔɛ miin mbe chɔchi ɔ Babidon duu ɔ, Yataa‑a a boo sɔ ka miin bɛɛ ma, an mbe wo kɔndɔn tena. Kamin tɔngbɔɛ chɛ wɛɛ, Maki, min ma‑a gbɛ n 'na denɛ a, a wɛɛ‑a wo kɔndɔn.

¹⁴ Ni wo bɛn‑da, wo wo nyɔn kɔndɔn koadia faa a. Yataa ɛ faachima min be, a ni ma wo ma, wo ma min chɛ‑a mɔ dɔndɔɛ a Chasi a.