1 PITA 4 - Yataa 'a Dɔbɛnɛ Nama

Pita ɔ te, Chisianɛ n ni ma Yataa ko a

¹ Chɛ an fɛ mu gbɛ, Chasi‑a tɔɔya ɔ bia ka buɛ min dɔ a gboo ɔ, wo wɛɛ wo sɔnɛ ni bɔ a ta a a. Wo ma bɛndenɛ ni ma tɔɔya ɔ bia koe a. Koe min na mu, ni wo‑a tɔɔya ɔ bia wo gboo ɔ Chasi ko a, wo ee ko yama ma.

² A sin, wo ee ma‑a wo faa ma koe n fan ma‑a, aan wo ni fa. Chɛɛ wo ma bɛndenɛ ɛ ma‑a wan, tima ɔ tima ko a, Yataa faa ma koe ma koe a.

³ A saa a, wo‑a koe chɛ n ma kaka, miin ma koe a ni di gbeden mɔɛ chɛ n ye, miin ma Yataa sɔn. Wo 'a fɔɛ gbɛɛ ni yau kaka. Wo ni gbɛ wa min fan. Wo e dunya ma koe ma to fiti fata. Wo ni mauma koe n sɛsɛ ma wan to. A yɛ to, wo ni fenɛ n fai wan, wo e an ya Yataa a.

⁴ Sanche gbɛ sin, mɔɛ chɛ nu, miin ma an kai fa ni Chisɔsi a, an kɔndɔ fii‑a wo a. An‑na a yen, mbɛ wo ee bea tena to an fɛ, ben‑da mauma koe ma‑a, wo gbɔsɔ wɛɛ ma. Chɛ an mbe a ma tena, an mbe bai yama n sa tena wo ma.

⁵ Chɛɛ an‑na koe miin gbɛɛ ma, an mbe a ɔ yian‑da wan Yataa chen kɔɔ. A ma bɛndenɛ mu gbɛ kaa a tɛ koe a fuɛ n ma, an bɛ chɛndɛ ba an na.

⁶ Chɛ an na‑a a ma, sakana bai chɛndɛ chɛ na‑a sa chɛ n bɛɛ tena, miin na‑a fa. Chɛ na‑a ma, min mbe a ma, ni an gboo na‑a tɔɔya wɛɛ saya a, an nyina ni ma nɔ fɔɛ ɔ, yɔ Yataa ɛ buɛ min dɔ.

⁷ A ɔ ma yansan to, mbɛ ko ɔ ko che‑a a danka a. Wo ma bɛndenɛ ni ma, wo ni kun tachɛ koe a wo wandi a chɛndɛ chɛ, wo ni kun samunɛ chɛ a, a chɛ buɛ a.

⁸ Min mbe ko ɔ ko kun ma, wo to wo nyɔn na wo faa gbɛɛ a. Koe min na mu, koadia ɛ a ma wan mmɔ ni mmɔ ya ka ko yama sɛsɛ a.

⁹ Ni wo bɔɛ n na‑a wo 'a chenɛ n na, sondaya a, wo ma gbonyɛ wo boo n si koe a an kɔɔ. An bɛɛ ni a ma ka wo ko a.

¹⁰ Wo gbɛɛ, Yataa‑a wo dua wan chia sɛsɛ a, dɔndɔ dɔndɔɛ a. An chia chɛ n sin, basan koe a mu wo nyɔn ma. Chɛ an mbe a ɔ yian‑da, mbɛ Yataa‑a koadia demanɛ min chɛ wo a, wo e tachɛ tena wan a a chɛndɛ chɛ.

¹¹ Yataa 'a bai sa wai nyima, an chɛen mu wo dɔ n na. Chɛ ko a, wo Yataa 'a sakana bai ɔ yian mɔɛ n na, yɔ Yataa wandi an mbe ka koɔ‑a wo ɔ. Mɔ deman wai nyima an been mu wo dɔ n ma. Chɛ ko a, wo deman chɛ chɛ wo sɔɛ gbɛɛ a, Yataa‑a min be wo ma. Chɛ ɛ a ma‑a wan tando ni be Yataa ma, ko ɔ ko kan kɔ kan ko a, Chisɔsi Chasi 'a gbasaya ɔ. Basɔmaya ɛ be an ma, a sin fan ta mu to gbasaya a, kuɔ fɔ ni kuɔ fɔ ko a. A ni ma ka.

Pita ɛ Chisianɛ n na si‑a, a si tɔɔya ma

¹² N dia nyɔɛ nu, wo e ka tɔɔya ɔ gbɛama min dɔ bia‑a, a ma ma dɔsimanɛ a, min mbe wo tɛnɛ‑a. Chɛ ma ma koe a, min mbe ka ma‑a wo a, yɔ a nyɔn sima ma ma ni a kɔma a.

¹³ Chɛɛ a ni ma buɔdia a wo tena, mbɛ wo e ko yawaenɛ min dɔ bia tena, Chasi na‑a an sima ɔ bia. Chɛ ɛ ma‑a wan wo ni ma buɔdia da faenɛ ɔ, ɛ yen‑da tima min na gbasaya ɔ, dunya chɛ ɔ.

¹⁴ An mbe wo wɛn main‑da, an dɔ, Chisɔsi Chasi fɛ mɔɛ mu wo a, dua ɛ wo ma. Chɛ‑a a ɔ yian fan ka, Nyina gbasayaen chɛ, Yataa Nyina, ɛ gbɛ wo fɛ gban.

¹⁵ Ni wo dɔndɔ wɛɛ ma‑a ko yawaenɛ ɔ bia‑a, a ma ma mɔ fa ko a. A ma ma to kanka chɛ koe wɛɛ a. A yɛ to, ko yama dɔ gbɛɛ ma koe a, chɛ ma, wo da chɛ koe a mɔ dɔ mende n 'na koe ɔ.

¹⁶ Chɛɛ ni wo‑a ko yawaenɛ ɔ bia, Chisian koe an na, wo ma mau ɛnden bɛɛ a. Chɛɛ wo ni Yataa wai bɔ, a mu min na, wo e wan Chasi tɔɛ ko a.

¹⁷ Koe min na mu, Yataa 'a kaa a tɛ tee ɔ ma yansan to. A sin mbe kaa a tɛ kuu sɔ‑a mmɔ wan ma, a ta mɔɛ nu. Mɔɛ chɛ n sin, miin mbe ee don Yataa 'a sakana bai chɛndɛ kɔɔ, an ta ma ɛ chian‑da wan.

¹⁸ Ɛ wan yɔ Yataa 'a gboo‑a a fɔ buɛ min dɔ, a ɔ, “Bauncha sɔn koe ɔ gbɛ, mɔ tandenɛ n boo ɔ. Mɔɛ chɛ n sin, miin mu Yataa sɔn bai wa an na, mmɔ ma ɔ sɔn an ta ɛ ma‑a buɛ min dɔ.”

¹⁹ Chɛ an fɛ mu, wo dɔ n mbe tɔɔya ɔ bia‑a wan, yɔ Yataa 'a dɔbɛnɛ‑a a fɔ buɛ min dɔ. Ni chɛ ma‑a, wo ni to wo chɛ chɛ wai chɛndɛ n kɔ, mbɛ wo‑a wo wandi kai fa gbae Yataa a, min‑na wo a dan. A ee a da a kuiɛ yɔn tee dɔndɔ wɛɛ.