1 PITA 3 - Yataa 'a Dɔbɛnɛ Nama

Pita ɛ musu n 'na si‑a, an bɛ an chɛɛ n na

¹ A chia dɔndɔ gbe chɛ a, wo wɛɛ, wo wɛn mu kai sɔn musu n na, wo don wo chɛɛ n 'na gbasaya kɔɔ. Yataa da a bai chɛ, kɔkɔɛ an dɔ n mbe ban‑da wan an boo si koe a a kɔɔ. Ni chɛ ma‑a wɛɛ, wo e ma‑a ka Yataa fɔɛ min dɔ, ɛ an mun‑da wan Yataa tena, a ben wo da a bai ma.

² Koe min na mu, an mbe a ɔ yen‑da wan wo sɔnɛ nyin buɛ min dɔ Yataa chen kɔɔ, wo sin chianden mu ka wan to a ma.

³ Gboo ma nyanɛ an ma ma dechee wo faa ma koe a. Wo ni wo kundi a bonchen, wo ni sanu chɛ wo ma, ni kainɛ a basan koa baa gbandenɛ n na.

⁴ Chɛɛ nyanɛ ɛ wan nɔ, min kun ma ee ka, an mu musu sɔnɛ a. Musu ni tima ya tachɛ koe a mɔ dɔ mende n na, a sin, sɔnkɔ sɔnkɔ nyina ma ma a fɛ. Nyan chɛ nyɔn sima, an ma kawaen mu Yataa tena.

⁵ Suun musu nu, miin ni tenchen Yataa ko a, an ni an fandi a bonchen ka wan. An yii na tɛen ni Yataa an ma, an mbe an chɛɛ n 'na gbasaya kɔɔ.

⁶ Seda ni musu dɔndɔ an na, min kooen ni a chɛɛ Ebeami ye. A ni a chee, a ɔ, a kun ti. Sanche gbɛ, wo e ma‑a wan Seda bɔ nyɔɛ n na, ni wo‑a koe ma min nyin Yataa chen kɔɔ, wo ee chian kan kɔ kan kɔɔ.

⁷ A chia dɔndɔ gbe chɛ a to, wo wan mɔ kaima n bɛɛ ni baa be wo 'a musu n ma. A ni ma wo yii ma, mbɛ wo ɔ gbɛ a ben an ma. Chɛɛ fɔɛ nama ta fɛ chia a, wo e min ma sɔn‑da, wo a kanden fan mu Yataa tena. Chɛ an fɛ mu, wo wo 'a musu n bia chɛndɛ chɛ, wo bɛ an mbe Yataa 'a koadia demanɛ chɛ ma sɔn‑da. Ni wo‑a chɛ ma, ko ɔ ko ee wo 'a samunɛ ka‑a a chia ma.

Pita ɔ te, kɔkɔɛ Chisianɛ n mbe tɔɔya wan, ko chɛndɛ ma ko a

⁸ Ka n mbe n da a bai chɛ kunɛ a bia nɛ, mbɛ wo yiima ni ma dɔndɔ. Wo ni to wo nyɔn na wo faa gbɛɛ a. Chinchimaya ni ma wo ɔ wo nyɔn ko a, wo sin ma dɔpandaya bɔ.

⁹ Wo ma ko yama a yɛ ko yama ko a. A yɛ to, wo ma mainɛ a yɛ mainɛ ko a. Chɛɛ dua an ni ma wo da ɔ. Koe min na mu, Yataa‑a wo chee tima min na, a na‑a wo too ɔ dia wan, mbɛ dua an ni ma wo ta a.

¹⁰ Ɛ wan yɔ Yataa 'a gboo‑a min fɔ. A ɔ, “Mɔ ɔ mɔ min toen mu a ni fɔɛ ɔ daun, tee chɛndɛ yen sɔɛ ɛ min yii ma, a ni a boo bɔ bai yama sa ɔ, mbɛ a sɛmbɛ‑a fania fɔɛ‑a.

¹¹ A ni a kan kɔ sɔ ko yama ma a, a ni ko chɛndɛ ma. A ni yɛ, a ni butuinɛ chɛ, a faa gbɛɛ a, faachima ko a.

¹² Koe min na mu, Mansa Yataa ɛ mɔɛ chɛ n kun ma fɛn‑da wan, miin tanden mu a tena. A sin mbe a too ma sɔ tena wan an 'na samunɛ ma. Chɛɛ ɛ mɔɛ chɛ n ma bɔ tena wan, miin mbe ko yama ma.”

¹³ Mɔ ɔ mɔ ee ko ma‑a wo a, ni wo ma bɛndenɛ ma‑a ko chɛndɛ ma koe a, tima ɔ tima.

¹⁴ Chɛɛ ni wo‑a tɔɔya ɔ bia wɛɛ, ko chɛndɛ ma gbaa chia a, dua wa mu wo ma. Mɔ ɔ mɔ ma a ma chianɛ ni ma wo ɔ, wo sin faa ma gbaa a.

¹⁵ Chɛɛ Chasi ma chianɛ ni ma wo faa ɔ, wo ni baa be a wan mansa ma. Wo ma bɛndenɛ ni ma, tima ɔ tima ko a, mɔɛ n 'na tisa yɛman koe a. Ni an‑na wo ɔ tisa, a si yiinatɛ ma min mbe wo ɔ, wo a ɔ yian an na.

¹⁶ Chɛɛ wo tima ya a ɔ yian koe a an na, basɔmaya chia a. Wo yiima a koenɛ ni ma, min mbe a ma, wo main mɔɛ n ni mau wo ma. Mɔɛ chɛ nu, miin mbe bai yama sa wo ma, wo e ma ko chɛndɛ n ma‑a. Wo e chɛ ma, koe min na mu, wo ma‑a mɔ dɔndɔɛ a, wo bɛ Chasi a.

¹⁷ A mu koe min na, a ma bɛnden mu mɔ ni tɔɔya ɔ bia ko chɛndɛ fɛ, ni Yataa‑a a fɔ ka wan, a ben tɔɔya ɔ bia koe ma ko yama ko a.

¹⁸ An na‑a a ma, Chasi wɛn nii ma ko yama kan ko kan ma ni, a na‑a tɔɔya ɔ bia wan mmɔ ko a. A wɛn ni ka mɔ chɛndɛ wa a, a na‑a saya dɔndɔɛ chɛ chɛ wan. A sin mbe ee ma‑a to, mmɔ mɔ yama chɛ n 'na ko yama n ko a. A na‑a chɛ ma, mmɔ ma sawan koe an na Yataa tena. Mɔɛ n na‑a a fa wan kɔn gbengbandenɛ ma, a gboo ɔ, chɛɛ a yɛ‑a wan fɔɛ ɔ, Yataa Nyina ta fɛ chia a.

¹⁹ A tima chɛ a, mbɛ a ta‑a koɔ‑a faa mɔɛ n tena, miin nyina ni pimbi chenɛ a.

²⁰ Mɔɛ chɛ n fan nii nɛ, miin nii ma kooya be ni Yataa ma. Yataa ni a faa bia tena wan an na, ɛ an ma kɔn‑da, tima min na Nowa ni a 'a dɛndɛ wa nyanɛ a. Mɔ kuundenɛ miin ni an dɛndɛ chɛ ɔ, an ni mɔ sɛi, yii chɛ na‑a miin baun.

²¹ Chɛ ni tɔmɔsi an na, yii ɛ chɛ buɛ min dɔ mɔɛ n kunɛ ɔ, Yataa chia a, bauncha sɔn koe a sanche. A ma dechee nɔɛ ko koe an na, mɔɛ n gboo ma. Chɛɛ tooɔdia mu, mɔɛ ɛ min chɛ Yataa a, yiima a koenɛ a. An mbe na bauncha a, min ma sɔn‑da, a bɔ Chisɔsi 'a sɔ koe ɔ, a ka saya ɔ.

²² A wan Chisɔsi Chasi chɛ sɛ‑a banda bu ɔ, ɛ kaina min si ɔ Yataa boo nyima ɔ. Ɛ nɔ mansaya ɔ maeka n gbɛɛ kun ma, ni fen fen min gbasa, a sin mbe gbasaya ɔ banda bu ɔ.