1 PITA 2 - Yataa 'a Dɔbɛnɛ Nama

¹ Chɛ an fɛ mu, wo wo boo bɔ ko yama ma gbɛɛ ɔ. Wo sɛmbɛ fania fɔ koe a. A yɛ to, wo sɛmbɛ ma koe a nɛnɛn fea ti n na. A sin, wo main chɛ kan kɔ kan boo ka, mbɛ wo sɛmbɛ‑a too koe a mɔ dɔ gbɛɛ n na.

² Wo to Yataa 'a bai a min koe a, tima ɔ tima ko a, yɔ den toa toen mu buɛ min dɔ a de susu yii a. Wo a a min, min mbe a ma, wo ni kɔɔ Yataa sɔnɛ ɔ, mbɛ wo‑a bauncha ma sɔn.

³ A sin, wo wandi‑a a ɔ yen gbɛ, Mansa Yataa chinchinchaen mu buɛ min dɔ.

Pita ɔ te, Yataa ɛ mɔɛ n ma Chisianɛ n na, a wandi an ko a

⁴ Wo na Chisɔsi tena. An mu senɛ chɛ a, min mbe fɔɛ ɔ. Mɔ gbu n ban‑da wan a ɔ, chɛɛ Yataa tana, a ma kawaen mu a tena, a sin‑na a boo sɔ a ma.

⁵ Wo na Chisɔsi tena yɔ senɛ miin mbe fɔɛ ɔ. Wo a ma Yataa ni a 'a chenɛ sɔ wo a. A yɛ to, wo e ma‑a tenchen tɛ mɔɛ n fan na, mɔ gbu n tɛ ɔ Yataa a. Nɔ mu wo e basɔmaya fenɛ n be‑a Yataa ma, ɛ a boo si‑a miin kɔɔ. Chɛ ɛ ma‑a wan, a mu min na, Chisɔsi na‑a a ma wan.

⁶ A mu min na, Yataa 'a gboo‑a a fɔ wan, a ɔ, “A yen ko, n 'na senɛ si Sayɔn duu ɔ. Senɛ ma kawaenɛ an nɛ, senɛ kuu ba gbu, n‑na n boo sɔ a ma. Chɛɛ mɔ ɔ mɔ, i wɛn mbe i kai fa‑a a a, i mɔɛ chɛ ee che‑a mau‑a”

⁷ Wo wɛn kai faen mu a a, senɛ chɛ mu tɔnɔn ba an na wo tena. Chɛɛ wo wɛn ma wo kai fa ni a a, Yataa 'a gboo‑a a fɔ wan, a ɔ, “Chen sɔ mɔɛ n na‑a ban senɛ min dɔ, an dɔ, a ma nyin, an gbu ma‑a gbɛ senɛ kuu ba wandi a, chenɛ gbu ko a.”

⁸ Yataa 'a gboo‑a a fɔ wan to, a ɔ, “Mɔɛ n mbe an chenɛ n na tu‑a sen chɛ an na, an sen chɛ, mɔɛ n mbe nama‑a min ma, mbɛ an bea‑a.” An mbe an chenɛ n na tu‑a wan, koe min na mu, an ma dan ni Yataa 'a bai a. Yataa sin‑na a ɔ bɛn ka wan an ko a.

⁹ Chɛɛ wo tana, boo sɔ chɛen mu wo wan ma, Mansa Yataa 'a tɛ mɔɛ nu, wo wɛn mu chɛnyɛ a tenchen a ko a. A yɛ to, a ta mɔɛ mu wo a, boo sɔ chɛen mu wo ma, min mbe a ma, wo ni Yataa 'a kamaya ɔ yian. A wan Yataa min‑na wo chee pimbi pimbi ɔ, an na‑a wo a a 'a kamaya manɛ kɔɔ.

¹⁰ A saa a, Yataa 'a mɔ nii ma wo a. Chɛɛ sanche gbɛ a 'a mɔɛ mu wo a. A saa a, wo nii ma Yataa 'a chinchimaya ɔ sɔn. Chɛɛ sanche gbɛ wo ban‑da a 'a chinchimaya sɔn‑da.

Pita ɔ te, mɔɛ ɛ ma buɛ min dɔ Chisian fɔɛ ɔ

¹¹ N dia nyɔɛ nu, sonda mu wo a nɛ dunya chɛ ɔ, mɔ gbama gbama nu. Chɛ an fɛ mu, n mbe wo disa tena, wo ma bea wo gboo faa ma koe n fan fɛ. Tima ɔ tima ko a, an koe chɛ n mbe butuin chɛ an na, wo fo koe a Yataa 'a bauncha a.

¹² Wo sɔnɛ n ma ni kawa mɔɛ chɛ n tɛ ɔ, miin ma Yataa sɔn. An mbe a ma‑a, ni mɔɛ n‑na wo chee wɛɛ ko yama ma mɔɛ n na, an mbe wo sɔn chɛndɛ chɛ yen‑da wan. Chɛ an mbe a ma‑a an ni tando be Yataa ma, a na tee ma.

¹³ Wo kooya be chɛ n gbɛɛ ma, miin mbe gbasaya ɔ wo kun ma dunya chɛ ɔ. Mansa Yataa toen mu wo ni a ma ka wan. Wo kooya be chɛnyɛ ya ɔ sɔɛ ma, min mu kun ti wa a.

¹⁴ Mbɛ wo yɛ‑a, wo‑a kooya be kɔfana n bɛɛ ma, kun ti wa chɛ‑a gbasaya be miin ma, mɔɛ n kun ma. An fan mbe ko yama ma mɔɛ tɔɔ, mbɛ an‑na ko chɛndɛ ma mɔɛ tando.

¹⁵ Yataa toen mu, chɛ an ni ma. Wo 'a ko chɛndɛ ni a ma, baa baa mɔɛ chɛ n ni an da a tɔn, wooya bai n fɔ koe a wo ma.

¹⁶ Wo kooya be, yɔ Yataa 'a mɔɛ nu, miin mbe ee yɔncha ɔ mɔ dɔ gbɛɛ n kɔɔ. Chɛɛ yuu min tɛ‑a ka wo ma, wo ma ben ko yama ma‑a nun dɔ, wo ni a dɛn wo bɔ koe ma yɔncha ɔ. Chɛɛ wo tachɛ buɛ ni wo ma Yataa 'a yɔnɛ n na, tima ɔ tima ko a.

¹⁷ Wo basɔmaya be mɔ ɔ mɔ ma. Wo to wo bɔɛ Chisianɛ n na. Wo chian Yataa ma, mbɛ wo‑a basɔmaya be kun ti wa ma.

Pita ɔ te, Chisianɛ n ni puin Chisɔsi chen gba ɔ

¹⁸ Wo wan bɔi denɛ nu, wo kooya be wo kun ti n ma, wo ni basɔmaya da faenɛ be an ma. Kun ti chɛ nu ma dechee, miin sɔnɛ n nyin, a yɛ to, an mbe chinchin wo ma. Chɛɛ wo a be chɛ n bɛɛ ma, miin mbe wo bia tena yama yama.

¹⁹ Yataa faa ɛ chima wan, ni wo‑a ko yawaenɛ n dɔ bia. Koe nu, wo sɔn dɔ ko ma miin na. Chɛ ni ma wo yiima ɔ, mbɛ chɛ ɛ ma wan Yataa chen kɔɔ.

²⁰ Koe min na mu, ni wo‑a wo gbasi koe ma, mbɛ an‑na wo gbasi, wo ee tɔnɔn sɔn a ɔ. Chɛɛ ni wo‑a ko chɛndɛ ma, mbɛ wo‑a ko yawaenɛ ɔ bia a ko a, ɛ Yataa faa chima‑a wan.

²¹ An ko bonda chɛ mu, Yataa na‑a wo chee, a ɔ, wo ni a ma. Koe min na mu, Chasi wandi gbu‑a ko yawaenɛ ɔ bia wan wo ko a, min mu tɔmɔsi a wo tena. Chɛ ni a ma, wo wɛɛ ni puin a chen gba ɔ.

²² A nii ma ko yama kan kɔ kan ma ni. A sin, fania bai nii ma bɔ ni a da ɔ tee dɔndɔ wɛɛ.

²³ Bai yama n sa‑a wan a ma, chɛɛ a nii ma a ta ɔ nyɔn ni ɛnden bɛɛ a. A na‑a ko yawaenɛ n bɛɛ ɔ bia wan, chɛɛ a nii ma a wandi ma chian ni. A ni a ta gbɛɛ kai fa dechee Yataa an ma, min mbe tea kaa tɛ.

²⁴ Chisɔsi Chasi wandi gbu‑a mmɔ 'a ko yama n ya wan a gboo ɔ, a ta kɔn gbengbandenɛ ma, a‑a mɔnɛ ɔ bia an ko a nɔ. A na‑a chɛ ma, min mbe a ma, ni ko yama ma koe mu to, mbɛ mmɔ su mu gbɛ. Mmɔ ɛ gbɛ fɔɛ chɛndɛ an dɔ. Magba min chɛ‑a a a, an‑na a ma, wo‑a bauncha ma sɔn.

²⁵ A saa a, wo ni wan ben‑da wo kun ye, yɔ sa miin toenɛ a ɔ. Chɛɛ wo ya a yɛ‑a gbɛ Yataa ma, min mbe wo kun ma fɛn.