1 PITA 1 - Yataa 'a Dɔbɛnɛ Nama

¹ N fan Pita, Chisɔsi 'a sɔ mɔɛ, n fan mbe ka gboo chɛ nyɛn‑da. N mbe a nyɛn tena wo wan tena, wo wan Yataa 'a mɔɛ chɛ nu, a na‑a a boo sɔ ka wo wɛn ma. Wo a fasandenɛ mu ben‑da, wo e sondaya ɔ chɛnyɛ sɛsɛ ɔ. Wo e pande Pɔndɔsi chɛnyɛ ɔ, wo dɔ n mbe Kadesia, a yɛ to, wo dɔ n mbe Kapadosia, wo dɔ n sin mbe Esia, a basan Bitinia chɛnyɛ ɔ a.

² Mmɔ fa Yataa na‑a wo sɔn pɛn chɛndɛ chɛ, mbɛ a‑a a boo sɔ wo ma suun gbɔɔ. A sin, Yataa Nyina wɛɛ‑a a ma wan, wo ma‑a tenchen Yataa ko a. Chɛ sin mbe a ma tena wan, wo e kooya be tena Chisɔsi Chasi ma. A wii min sin bɔ‑a a fa tima a, a‑a wo ko fo. Yataa ni wo dua, a ni faachima ma munda wo ɔ.

Pita ɛ koɔ‑a, a si yiinatɛ ma mmɔ ɔ

³ Tando ni be Yataa ma. A wan mu Mansa Chisɔsi Chasi fa a, ni a 'a Yataa. Koe min na mu, a chinchin‑da wan mmɔ ma a ɔ benden ba a. Chɛ‑a a ma wan, mmɔ‑a fɔɛ nama ma sɔn. Chisɔsi Chasi na‑a a kɔɔ sɔ wan a ka saya ɔ. Chɛ naen mu gbɛ yiinatɛ ɔ benden ba an na mmɔ tena.

⁴ Chɛ an‑na a fɔ, fen kuu ma chɛ ɛ wan nɔ, Yataa‑a min sa tena ɔ bɛn a 'a denɛ n ko a. Ɛ wan nɔ banda bu ɔ, wo ko a. Ko ɔ ko ma ma ni a a, a sin, tɔmbɛ ee a ma. An fen chɛ ee tui, a sin mbe ee ka a gba ɔ.

⁵ Wo danɛ min chɛ‑a Chisɔsi Chasi a, an fɛ mu Yataa ɛ wo kun ma fɛn tena gbasaya ɔ, aan wo ni bauncha ma sɔn. Wo e an bauncha chɛ sin ma sɔn‑da tee dankama tee ma wan.

⁶ Chɛ ni ma buɔdia a wo ma. Buɔdia chenama wa ni ma wɛɛ wo ma ya ɔ ma, chɛɛ tima ɛnden ko a, wo e na‑a wan ma‑a faayɔnɛ ɔ. Koe min na mu, wo e ko gbɛama sɛsɛ n dɔ bia‑a wan.

⁷ Wo e chɛ n dɔ bia koe min na, a ɔ yian koe mu, mbɛ wo kai faen fan mu Chisɔsi Chasi a chɛndɛ chɛ. Ta an mbe a ma, mɔ ni sanu ma kawa koe ɔ sɔn. Sanu min ka, mɔɛ ɛ kun, a ni a yɔn. Kaifa nan gbu sin, wo‑a min chɛ, a sɔnkɔ ee, a benden mu sanu ma. Ko yawaenɛ chɛ nu, an fan mbe a ma, wo ee mun‑da, wo e sɔ‑a wan gban. Wo sin mbe na‑a boo ɔ gbasi ma sɔn‑da wan, wo ni tando ma sɔn, a basan dua a. Chɛ ɛ ma‑a wan an tee chɛ ma, Yataa ɛ Chisɔsi Chasi yian‑da tee min ma.

⁸ Wo ma a yen nin bɛ, chɛɛ wo toen fan mu a a. A yɛ to, wo kai faen fan mu a a, wo ee a yen tena wɛɛ. A sin, sanche chɛ ɔ wɛɛ, wo bu ɔ diama mu. An buɔdia chɛ danka ee, wo ee che bai fɔ‑a a si a ma.

⁹ Koe min na mu, wo e ka bauncha an ma sɔn‑da kuɔ fɔ ko a. Kaifa chɛ gbu sin wo ɔ, a kaen mu chɛ an ma.

¹⁰ Yataa 'a gbonka chɛ mɔɛ n na‑a a ɔ gbɛngbɛn fan chɛndɛ chɛ suun, koe ɔ sɔn koe a, a si bauncha chɛ ma. A sin, an na‑a bai fɔ wan, a si an koadia deman chɛ ma, Yataa ɛ min chɛ‑a wo a.

¹¹ Chasi Nyina min ni an fɛ, a ni wan chia yian‑da an na a tima chɛ a. An sin na‑a an sɔɛ don fan, a ɔ gbɛ koe a, Chasi ɛ na‑a tima min kɔɔ, a basan a na buɛ gbu a. An na‑a a kɔɔ fɔ wan to, a ni tɔɔya min nyɔn dɔ bia‑a. An‑na a fɔ wan to, mbɛ basɔmaya wa an mbe an tɔɔya chɛ gbaa.

¹² Yataa na‑a a ma wan, a 'a gbonka chɛ mɔɛ chɛ n‑na a ɔ sɔn, mbɛ an mbe ee wai chɛ tena an fandi an ko a. Chɛɛ an mbe a chɛ tena wo wan ko a. Koe min na mu, an na‑a bai sa suun a si koe chɛ n fan ma, wo‑a miin na min ka sanche mɔɛ chɛ n da ɔ, an mbe ma sakana bai chɛndɛ ɔ yian‑da. Yataa Nyina min ka‑a banda bu ɔ, an mbe gbasaya chɛ be an ma. An koe chɛ n fan gbu sin mu, maeka n bɛɛ toen mu, an ni miin dɔ gbɛ.

Pita ɔ te, Chisianɛ n ni ma ko chɛndɛ ma a

¹³ Chɛ an fɛ mu, wo wo yiima ɔ bɛn gbɛ chɛndɛ chɛ, wai n chɛ koe a, wo e min chɛ. Wo kun wo tachɛ buɛ kun ma fɛn‑da tima ɔ tima ko a, wai chɛ koe a. Wo yii na tɛenɛ ni ma gbae dua chɛ ma, min mbe be‑a wo ma. Dua chɛ, wo e min sɔn‑da, Yataa ɛ Chisɔsi Chasi yian‑da tima min na.

¹⁴ Wo ma yɔ den mɛsɛ nu, miin kooen mu Yataa tena. A sin, fɔɛ chɛ ɔ, wo faa ma koe n ma ben wo ma. Koe chɛ nu, wo toen ni miin na, tima min na wo nii ma sakana bai chɛndɛ chɛ a min nin bɛ, a si Chisɔsi Chasi ma.

¹⁵ Chɛɛ wo e koe miin ma, an ni ma ko chɛndɛ n dechee an na. Wo ni ma yɔ Yataa, min na‑a wo chee, a ee ko yama kan kɔ kan ma.

¹⁶ A mu min na, a nyɛnden fan mu Yataa 'a gboo ɔ, mbɛ Yataa ɔ te, a ɔ, “Wo ma ko chɛndɛ ma a, yɔ n bɛɛ, n mbe buɛ min dɔ ko chɛndɛ ma a.”

¹⁷ Ni wo ma‑a samun‑da a tena, wo e a chee wo Fa an na. A sin mbe ma kaa a tɛ‑a, a ee a boo don mɔɛ n tɛ ɔ. Ɛ kaa a tɛ mɔ ɔ mɔ chɛ chɛ wai n fan ma. Chɛ an‑na a fɔ, sonda mu ka buɛ min dɔ wo 'a fɔɛ chɛ ɔ nɛ dunya ma, wo chian Yataa ma, aan a che tee dankama tee ma.

¹⁸ Wo wandi gbu‑a a ɔ sɔn fan, mbɛ wo ni wan baa baa fɔɛ ɔ, wo bemba n ta bemba n ni min dɔ. Yataa ma kain gbɛ an ya ni, chɛ ma sanu, miin mbe yɔn, a ni an be wo kun ka koe a, a bɔ an fɔɛ chɛ ɔ. Wo‑a a ɔ sɔn fan, a na‑a fenɛ min be.

¹⁹ Chɛ ni Chisɔsi Chasi wandi ta wii gbu an na, min be‑a wo kun ka koe a. Chasi ma‑a wan yɔ sa tɔngbɔɛ yasi, tɔmbɛ nii min ma, a sin, a wakoe ɔ nii ma chɛ chɛ ni.

²⁰ Yataa e na to dunya chɛ a dan‑da, a na‑a a boo sɔ pɛn Chisɔsi ma, ma koe a ka. Chɛɛ tee dankama tee chɛ nɛnɛ n kɔɔ, Yataa‑a Chisɔsi yian wo deman koe an na.

²¹ Chisɔsi Chasi, min‑na a kɔɔ sɔ a ka saya ɔ, a chɛ chɛ wai n fan‑na a ma, wo‑a wo kai fa Yataa a. Mbɛ Yataa‑a baa be a ma. Chɛ an‑na a ma, wo kai faen mu a a. A sin, wo yii na tɛen mu a ma.

²² Wo‑a wo boo a si min chɛ sakana bai chɛndɛ chɛ kɔɔ, tea mu min na, wo ko‑a gbɛ, a bɔ wo 'a ko yama n dɔ. Chɛ ni a ma, koadia chɛndɛ ni ma gbɛ wo ɔ. Ni a sin ma‑a ka, wo ni to wo nyɔn na pien, wo faa gbɛɛ a.

²³ A mu min na, Yataa‑a a ma wan, wo suun‑da to a nama a. Wo 'a fɔɛ nama chɛ, wo woo mɔɛ nu dunya ma, an fan ma a be ni wo ma. Koe min na mu, an‑na fɔɛ min be wo ma, ɛ danka‑a saya an dɔ. Chɛɛ fɔɛ nama chɛ tana, ɛ ma‑a wan kuɔ fɔ ko a. Koe min na mu, Yataa da a bai chɛ, fɔɛ ɛ min dɔ, ɛ ma‑a wan nɔ kuɔ fɔ ko a.

²⁴ Ɛ wan yɔ a nyɛnden mu buɛ min dɔ Yataa 'a gboo ɔ, a ɔ, “Mɔ gbu gbɛɛ maen fan mu yɔ bin gbii, an mbe fa wan. Mɔ gbu 'a dunya ma nyanɛ wɛɛ, ɛ wan yɔ kɔn fu, a ee mɛ a a.

²⁵ Chɛɛ Mansa Yataa da a bai, ɛ ma‑a wan kuɔ fɔ ko a.” Bai chɛ mu sakana bai chɛndɛ chɛ an na, min dɔ yian‑da wo a.