1 CHƆN 5 - Yataa 'a Dɔbɛnɛ Nama

Chɔn dɔ te, dunya chɛ ɛ Yataa 'a denɛ n chen kɔɔ wan

¹ Mɔ ɔ mɔ min mbe dan‑da a a, mbɛ Chisɔsi an mu Chasi a, kunka mansa, a mɔɛ chɛ mu Yataa 'a denɛ an na. A yɛ to, mɔ ɔ mɔ min toen mu Fa Yataa a, a ni to a 'a denɛ n bɛɛ a.

² Ni Yataa ko a dia‑a mmɔ ye, mmɔ ni ma a da a kuiɛ ma, mmɔ ɛ a ɔ sɔn‑da wan, mbɛ mmɔ ɛ to wan a 'a denɛ n bɛɛ a.

³ Mmɔ ɛ koadia yian ka wan Yataa a, ni mmɔ don‑da a da a kuiɛ kɔɔ. Chɛ sin, a ma gbɛ a a min koe a.

⁴ A mu min na, mɔ ɔ mɔ min mu Yataa 'a denɛ a, dunya chɛ ɛ ma a chen kɔɔ wan. A sin, mmɔ 'a danaya Yataa a, an‑na a ma, mmɔ kun‑da dunya chɛ ma.

⁵ Koe min na mu, mɔɛ min mbe kun dunya chɛ ma, an mu dechee mɔɛ chɛ a, min danden mu a a, mbɛ Chisɔsi mu Yataa 'a denɛ an na.

Chɔn dɔ te, Chisɔsi mu mɔ gbu a, a mu to Yataa 'a denɛ a

⁶ A wan mu, a wan Chisɔsi Chasi, min na‑a dunya ɔ. Yii chɛ‑a wan a kunɛ ɔ, Yataa chia a, a sin, a fa‑a kɛn, a wii bɔn‑da wan. Yii dechee ma chɛ ni a kunɛ ɔ, a yɛ to, a wii bɔn‑da wan to. A sin, Yataa Nyina wɛɛ‑a siiya bɔ wan, mbɛ koe chɛ n mu tea an na.

⁷ A gbu sin, siiya sawa an mbe tea chɛ ma a si Chisɔsi ma.

⁸ Sii saa saa mu Yataa Nyina an na, a fean bɔɛ mu yii a, a sawan bɔɛ mu wii a. Chɛ n sin gbɛɛ kuiɛ ɛ dɔndɔ gbe.

⁹ Ni mmɔ ɛ dan fan mɔɛ n na, ni an‑na siiya bɔ mmɔ ye, a nyin fan mmɔ ni dan Yataa a, a ben mɔ gbu ma. Yataa wandi sin fan‑na siiya bɔ, a si a 'a denɛ Chisɔsi ma.

¹⁰ Chɛ an‑na a fɔ, mɔɛ min mbe a kai fa‑a Yataa 'a denɛ a, siiya chɛ ɛ wan a faa ɔ. Chɛɛ mɔɛ min mbe ee a kai fa‑a a a, a mɔɛ chɛ‑a Yataa ma fania fɔ mɔɛ a. Koe min na mu, a ma dan ni siiya a, Yataa‑a min bɔ, a si a 'a denɛ ma.

¹¹ Yataa‑a siiya chɛ ɔ te, mbɛ a‑a kuɔ fɔ fɔɛ be wan mmɔ ma. A sin, a ma ɛ sɔn a 'a denɛ Chisɔsi an na.

¹² Mɔ ɔ mɔ min ma‑a gbɛ mɔ dɔndɔɛ a, an fea Yataa 'a denɛ Chisɔsi a, a‑a fɔɛ chɛ ma sɔn. Chɛɛ mɔ ɔ mɔ min ma ma ni mɔ dɔndɔɛ a, an fea a 'a denɛ chɛ a, a mɔɛ chɛ ee fɔɛ chɛ ma sɔn.

Chɔn mbe a ma din‑da to, mbɛ kuɔ fɔ fɔɛ ɛ wan nɔ mmɔ ko a

¹³ N mbe gboo chɛ nyɛn tena wo wan tena, wo wɛn kai faen mu Yataa 'a denɛ a, min mbe a ma, wo ni a ɔ sɔn, mbɛ wo‑a kuɔ fɔ fɔɛ ma sɔn.

¹⁴ Danaya wa chɛ an mbe mmɔ ɔ Yataa chen kɔɔ, mbɛ ni mmɔ‑a samunɛ chɛ fen kɔ fen ko a, min‑na a faa chima, mbɛ ɛ mmɔ 'a samunɛ a min fan.

¹⁵ A sin, ni mmɔ‑a a ɔ sɔn, mbɛ Yataa ɛ mmɔ 'a samunɛ a min fan, mmɔ ɛ dan fan gbɛ a, mbɛ mmɔ ɛ samunɛ chɛ tena fenɛ min ko a, mmɔ ɛ a ma sɔn‑da wan.

^16-17 Ko kan kɔ kan, min mbe ee Yataa 'a chia ma, ko yama mu. Chɛɛ ko yama ɛ wan nɔ, min mbe ee mmɔ ka‑a kuɔ fɔ fɔɛ chɛ ma sɔn‑da. A ya wɛ, mbɛ i suun ma nyɔɛ dɔndɔ, a‑a ko yama ma. Chɛɛ an ko yama chɛ ee che a ma‑a, a ni fo kuɔ fɔ fɔɛ a. Samunɛ chɛ a mɔɛ chɛ ko a, min mbe a ma, a ni kuɔ fɔ fɔɛ ma sɔn. Chɛɛ ni ko yama mu, min mbe che a ma‑a, a ee kuɔ fɔ fɔɛ ma sɔn, n ma i kaa ni samunɛ chɛ‑a, a mɔɛ chɛ ko a.

¹⁸ Mmɔ danden fan mu chɛ a, mbɛ Yataa 'a denɛ nu, an mbe ee an boo a chii ko yama ma ma. Koe min na mu, Yataa 'a denɛ Chisɔsi ɛ an kun ma fɛn fan. Nyina yama chɛ sin, Sitana, a ee che ko ma‑a an na.

¹⁹ Mmɔ tana, mmɔ‑a a ɔ sɔn fan, mbɛ Yataa 'a denɛ mu mmɔ a. Mbɛ a sin, dunya tɔɛ gbɛɛ, an mbe a wan Sitana 'a gbasaya an kɔɔ.

²⁰ Mmɔ‑a a ɔ sɔn fan, mbɛ Chisɔsi, Yataa 'a denɛ na‑a, mbɛ a‑a tea Yataa yian mmɔ a. Mmɔ mu gbɛ mɔ dɔndɔɛ an na tea Yataa chɛ a, koe min na mu, mmɔ dɔndɔɛ mu mmɔ a Chisɔsi a, a 'a denɛ. An mu tea Yataa a, min mbe kuɔ fɔ fɔɛ be.

²¹ N 'na denɛ nu, wo ma a ma, fen kɔ fen bakoe ni ben Yataa ma, wo faa n dɔ.