1 CHƆN 2 - Yataa 'a Dɔbɛnɛ Nama

Chɔn ɛ bai sa‑a, a si Yataa sɔnɛ ma

¹ N 'na denɛ nu, n mbe gboo chɛ nyɛn tena wo tena, min mbe a ma, wo ma na dɛ ko yama ɔ. Chɛɛ ni mmɔ dɔndɔ wɛɛ dɛen fan mu gbɛ ko yama ɔ, mɔɛ ɛ wan mmɔ boo ɔ, min mbe koɔ mmɔ Fa Yataa tena mmɔ ko a. A mɔɛ chɛ mu Chisɔsi Chasi an na, a wɛn tanden mu Yataa tena gbeden.

² Chisɔsi chɛ an ma‑a yasi a mmɔ 'a ko yama n ko a. A sin, mmɔ 'a ko yama n dechee ko a ma, chɛɛ dunya gbɛɛ 'a ko yama n ko a.

³ Ni mmɔ dɔn‑da Yataa 'a sawa n na tachɛ koe a, yɔ ɛ a fɔ‑a buɛ min dɔ mmɔ ye, mbɛ mmɔ‑a a ɔ gbɛ, mbɛ mmɔ‑a a sɔn fan.

⁴ Mɔɛ min mbe a fɔ‑a, a ɔ, a‑a Yataa sɔn fan, chɛɛ a ee Yataa 'a sawa n na tachɛ‑a a gbee a, ɛ ma‑a ka fania an fɔ‑a, tea kan kɔ kan mbe ee a da ɔ.

⁵ Chɛɛ ni mɔ ɔ mɔ‑a a da a kuiɛ a min, an mɔɛ chɛ an mu mɔɛ a, min toen mu Yataa a tea tea ko a. Mmɔ ɛ a ɔ sɔn‑da ka wan, mbɛ mmɔ ma‑a mɔ dɔndɔɛ a Yataa a.

⁶ Mɔ ɔ mɔ, min mbe a fɔ‑a, mbɛ an ma‑a mɔ dɔndɔɛ a Yataa a, a ni sɔ Chisɔsi chen gba ɔ.

Chɔn ɛ bai sa‑a, a si mmɔ 'a koadia ma mmɔ ɔ

⁷ N dia nyɔɛ nu, n mbe ee ka sawa nama an nyɛn tena wo tena, chɛɛ sawa kɔma mu. Wo boo ɔ sawa kɔma dɔndɔ gbe chɛ nu mu, a ka sakana bai chɛndɛ chɛ a min tima saa saa ma. Sawa kɔma chɛ mu sakana bai chɛ an na, wo na‑a min na min tee.

⁸ Chɛɛ chɛ ni ma wɛɛ, n‑na sawa min nyɛn ka wo tena, sawa nama mu to a a. Tea gbu sin ko a, mɔ ɛ a yen fan Chisɔsi ɔ, a basan wo wɛɛ a. A mu min na, pimbi ɛ ka gbɛ ben fan na, a sin, Yataa 'a manɛ bun‑da a yian‑da.

⁹ Mɔ ɔ mɔ min‑na a wandi ya, mbɛ ɛ Yataa 'a manɛ kɔɔ wan, chɛɛ a tooenɛ a suun ma nyɔɛ a, ɛ ka pimbi an dɔ tun tun.

¹⁰ Chɛɛ mɔ ɔ mɔ min toen mu a suun ma nyɔɛ a, ɛ ka Yataa 'a manɛ an kɔɔ. A sin, ko ɔ ko ee a faa ɔ, min mbe a ma, a ni bea.

¹¹ Chɛɛ mɔ ɔ mɔ min tooen mu a suun ma nyɔɛ a, ɛ ka pimbi ɔ wan, ɛ tachɛ chɛ‑a pimbi ɔ, a ta chia toenɛ ɔ a boo ɔ. Koe min na mu, pimbi chɛ‑a a ma, a ee che kaina yen‑da.

¹² N 'na denɛ nu, n mbe gboo chɛ nyɛn tena wo tena, koe min na mu, Yataa‑a a boo bɔ wo 'a ko yama n dɔ Chisɔsi ko a.

¹³ Wo wɛn mu chenanɛ n na, n mbe gboo chɛ nyɛn tena wo tena, koe min na mu, wo‑a mɔɛ chɛ sɔn fan, a wɛn mbe nɔ dunya a dan tima a. Wo wɛn mu den tɔngbɔɛ n na, n mbe gboo chɛ nyɛn tena wo tena, koe min na mu, wo‑a Sitana a bea.

¹⁴ N 'na denɛ nu, n mbe gboo chɛ nyɛn tena wo tena, koe min na mu, wo‑a Fa Yataa sɔn. Wo wɛn mu chenanɛ n na, n mbe gboo chɛ nyɛn tena wo tena, koe min na mu, wo‑a mɔɛ chɛ sɔn fan, a wɛn mbe nɔ dunya a dan tima a. Wo wɛn mu den tɔngbɔɛ n na, n mbe gboo chɛ nyɛn tena wo tena, koe min na mu, faa ɛ wo ɔ Yataa ko a. A sin, Yataa 'a bai ee ka wo yii ma. A yɛ to, wo‑a Sitana a bea.

¹⁵ Wo ma to dunya yama chɛ a, wo ma to fen yama n na a ɔ. Ni mɔ ɔ mɔ to‑a dunya chɛ a, a ee che to‑a Fa Yataa a.

¹⁶ Mɔ gbu 'a yonka wa gbɛɛ, ɛ bɔ dunya chɛ ɔ wan. Mɔ gbu faa ma koe yama n bɛɛ, a basan to koe a fen fen na, mɔ gbu ya ɛ min yen. Chɛ dɔndɔ wɛɛ ma Fa Yataa faa ma ko a. Chɛ gbɛɛ, an mu dechee dunya ma koe n fan na.

¹⁷ Ban fenɛ mu dunya chɛ a, a basan dunya ma koe n bɛɛ a. Chɛɛ mɔɛ min mbe Yataa faa ma koe ma‑a, ɛ kuɔ fɔ fɔɛ ma sɔn‑da wan.

Chɔn ɛ bai sa‑a, a si Chasi chɛɛ ma nyɔɛ n ma

¹⁸ N 'na denɛ nu, mmɔ ɛ ka gbɛ tee dankama tee an kɔɔ, Chisɔsi Chasi na koe a to. A na‑a a fɔ wan wo ye, mbɛ Chasi chɛɛ ma nyɔɛ ɛ na tena wan, ɛ bɔ‑a mɔ gbu n tɛ ɔ wan. Sanche chɛ ɔ, a chɛɛ ma nyɔɛ n‑na an kun na bɔ. Chɛ an mbe a ɔ yian mmɔ a, mbɛ tee dankama tee che‑a.

¹⁹ Mɔɛ chɛ n ni wan dechee mmɔ tɛ ɔ, chɛɛ mmɔ yiima nii dɔndɔ an na. Chɛ an‑na a ma, an ka‑a mmɔ fɛ, an ta‑a. Ni mmɔ yiima ni wan dɔndɔ gbe, an nii ka‑a mmɔ fɛ. Chɛɛ an ka‑a min chɛ‑a mmɔ fɛ, chɛ‑a a ɔ yian fan ka, mbɛ mmɔ yiima nii kaina dɔndɔ.

²⁰ Chɛɛ wo tana, Chisɔsi‑a a ma, Yataa Nyina ɛ wo fɛ, min‑na a ma, wo gbɛɛ‑a tea sɔn.

²¹ N mbe gboo chɛ nyɛnɛ min chɛ tena wo tena, n mbe ee a fɔ tena wan ka, mbɛ wo ma tea sɔn. Koe min na mu, wo‑a a sɔn fan. A sin to, wo‑a a ɔ sɔn fan to, mbɛ fania kan kɔ kan mbe ee che a ma‑a, wo ni ka tea chia chɛ ma.

²² Fania fɔ mɔɛ, a mu mɔɛ chɛ an na, min mbe kɔɔ sa bia chɛ, mbɛ Chisɔsi an ma Chasi a, kunka mansa. An mɔ bonda chɛ an mu Chasi chɛɛ ma nyɔɛ a, mɔɛ min mbe ban Fa Yataa ɔ, an fea a 'a denɛ a.

²³ Koe min na mu, ni mɔ ɔ mɔ ban‑da Yataa 'a denɛ ɔ, a mɔɛ chɛ ban‑da ka Fa Yataa wandi an dɔ. Ni mɔ ɔ mɔ‑a a boo si Yataa 'a denɛ kɔɔ, a‑a a boo si ka Fa Yataa wandi wɛɛ an kɔɔ.

²⁴ Wo‑a min na min, a ka sakana bai chɛndɛ chɛ a min tima saa saa ma, wo a sa wo faa ɔ. Ni wo‑a an sa wo faa ɔ, wo e ma‑a wan mɔ dɔndɔɛ a Yataa 'a denɛ a, an fea Fa Yataa a.

²⁵ A‑a mmɔ too ɔ dia chɛ an na, kuɔ fɔ fɔɛ.

²⁶ N mbe bai chɛ n gbɛɛ nyɛn tena wo tena, a sien mu mɔɛ chɛ n fan ma, miin toen mu an ni wo bun.

²⁷ Chɛɛ wo tana, Chisɔsi ban‑da Yataa Nyina a yii‑a, ma koe a wo fɛ. Tima min na mu wɛ, Yataa Nyina ɛ wo fɛ, mɔ dɔ mende ma gbɔsɔ ee wɛ wo ma, wo kan koe a. Koe min na mu, Yataa Nyina chɛ, an mbe wo kan tena ko kan kɔ kan ma. A sin tea mu, fania kan kɔ kan ma. Chɛ an fɛ mu, wo wo boo a chii, ma koe a mɔ dɔndɔya chɛ ɔ Chisɔsi a, yɔ Yataa Nyina chɛ‑a wo kan min na.

²⁸ N 'na denɛ nu, tea ko a, wo wo boo a chii, ma koe a mɔ dɔndɔɛ a, wo bɛ a a. Chɛ ɛ a ma‑a wan, mmɔ kunɛ kɔɔ sɔenɛ ni ma a tena, mmɔ ee na‑a mmɔ ya kɔɔɛ nun‑da a ma tima chɛ a, ɛ na‑a to tima min na.

²⁹ Wo‑a a ɔ sɔn fan, mbɛ Chisɔsi tanden fan mu Yataa tena. A sin mbe nyan fan gbɛ, wo ni a ɔ sɔn, mbɛ mɔ ɔ mɔ min tanden mu, Yataa 'a denɛ mu a a.