YAPHANG 7 - Kok Borok (Re-edited) Bible (BSI)

Twi torma

¹ Subraiyung Noano hai hwnwi sa kha, “Nwng tei nini nokni borokrok rungtoro hap si di, tamni hwn ba ang o bosongrokni bisingo nono borok sói nuk kha.

² Nwng kwthar mal-matarokno jorsni na di, chwla tei bwrwi khe na di tei kwthar ya mal-matabo jorsa na di, chwla tei bwrwi khe na di.

³ Tei jorsni tokrokno o ha saka-o kwthang narwkna bagwi chwla tei bwrwi khe narwk di.

⁴ O salsnini bisingo’-no ang ha saka-o sal brwichi tei horbrwichi uatwi ua rwnai, o ha sakani ang snamma bebak langma gwnangrokno hu-ui pái sinai.”

⁵ Noa Subraiyung dagima tẃi’-no bebakno khlai bai kha.

⁶ Ha saka-o twi kotor sók phai phuru Noani umor nokha bisi dok-ra wng kha.

⁷ Noa bihik tei bwsajlasongno tei bini hamjwksongrokno tẃiwi twi kotorni yókna bagwi rungtoro hap lai kha.

⁸ Kwthar mal-matarok tei kwthar yarok, tokrok tei ha saka-o malnai bebakno

⁹ maknwi-maknwi chwla bwrwi khe Kaitor Noano dagima tẃi’-no rungtoro hap lai kha.

¹⁰ Salsni ulo khe ha saka-o twi torsaui phai kha.

¹¹ Noani umor nokha bisi dok-ra phuru, talnwini talni tal chisnini salo khe, bebak kuthukni twimukrok pekhogwi nongkhor kha tei nokhani tailamrokbo kiyok kha.

¹² Ha saka-o sal brwichi horbrwichi uatwi ua kha.

¹³ A salo’-no Noa tei bini bwsarok Sem, Ham, Japhet tei Noani bihik, bahamjwksong rungtoro habo,

¹⁴ bórok mung thwgwi tongma mal-matarok tei bebak musuk-misiprok, bebak ha-o malnairok tei bebak tokrokbo

¹⁵ bórok Noa bai baksa khe rungtoro hap bai kha, langma gwnangrok bebak’-no bojoro-bojoro khe hap kha.

¹⁶ Kaitor bono dagima hai khe’-no bebak langma gwnangrokno chwla bwrwi khe hap kha, hakhe Subraiyung phatar tẃi khe dugar berebwi rw kha.

¹⁷ Nokha sal brwichi jora twi torsa kha, twi kwbángma wng khe rungtor kuphungsa kha, abo ha bai kak kha.

¹⁸ Twi belai khe thuk kha, hakhe twi saka-o rungtor kuphungsaui tong kha.

¹⁹ Ha saka-o twi aswk khe torsa kha, nokha tolani bebak hathái kuchukrok lomsa bai kha.

²⁰ Hathái kuchukrok lom súgwi twi teibo mitar kaichi chuksa kha.

²¹ Ha saka-o tongma bebak langma gwnangrok thwi bai kha, tokrok musuk-misiprok, mal-matarok, malnairok tei bebak borokrok thwi bai kha.

²² Hakungo tongnai bebak langma gwnangrok thwi bai kha.

²³ Ha saka-o tongnai bebak langma gwnangrok, borokrok, mal-mata tei ha-o malnai tei toksa-toktẃirok páiwi tháng kha, bórok hani sokomorwi páijak kha. Noa tei bo bai baksa rungtoro tongnairok simi se tong rwk si-o.

²⁴ Ha saka-o nokha sal sara-bachi jora twi tong kha.