YAPHANG 6 - Kok Borok (Re-edited) Bible (BSI)

Borokrok tongmung hamya wngmani

¹ Borokrok erwi ha saka-o kupulung wng kha, bórokni bwrwi bwsarok kwbángma achai kha.

² Kaitorni bwsarok, borokrokni bwsajwksongno naithokjak bai kha tei bórok hamjakma tẃi a bwrwirokno hik song kha.

³ Hakhe Subraiyung hai hwnwi sa kha, “Ani phola borokrok bai máng tong phlai glak, tamni hwn ba bo wng kha bahan bwthẃini, tamo khe bini umor tabukni simi nokha bisi sara-nwichi wng sinai.”

⁴ A jora-o tei aboni ulo o ha saka-o mang kotorrok tongmani, bórok wng kha borokrokni bwrwi bwsa bai Kaitorni bwsarok gwdalwi wngma bwsarok. Bórok’-no bisi kwbángma swkango phankrak tei mung gwnang borok hwnjaknairok.

⁵ Subraiyung, ha saka-o borokrokni hamya-sitrarok bángmani nuk kha, bebak bórokni bwkha-o uansukmarok hamya máng se kupulung wngwi tongo.

⁶ O ha saka-o borokno snamwi Subraiyung bwkha nangjak kha tei abo bono bwkha hamya khlai kha.

⁷ Hakhe Subraiyung hai hwnwi sa kha, “Ang snamma borokrokno o ha sakani sokomorwi pái sinai tei mal-matarok, toksa-toktẃiroknobo sokomorwi pái sinai, tamni hwn ba omorokno snamwi cha se cha li ya, ani khá ham li ya.”

⁸ Tamo khe Subraiyung Noano khe kaham nuk kha.

Noani kothoma

⁹ Omorok wng kha Noani bosongrok. Noa wng kha borok sói, bo a jorani borokni bisingo mungsa derama kwrwi borok; Noa Kaitor bai kwrwngwi tongo.

¹⁰ Noani sajla khorok tham tongo. Bórokni mungrok wng kha; Sem, Ham tei Japhet.

¹¹ Aphuru Kaitorni mokolo o hani borokrok cha ya wng kha tei o ha-o tong kutung kupulung wng kha.

¹² Hakhe Kaitor hano naikhlai naiwi nuk kha, nai di abo hamya bai kupulung wng kha, bebak borokrok’-no ha saka-o tongmung hamya khe máng tong lai kha.

¹³ Hakhe Kaitor Noano hai hwnwi sa kha, “Ang bebak’-no sokomorwi pái sinai hwnwi bwkha-o chong kha, tamni hwn ba bórokni samungni bagwi o ha-o bu lai-tok lai bai pung súk kha; nai di bórokno ang o ha bai baksa’-no sokomor sinai.

¹⁴ Nwng nini sakni bagwi Gophur buphangni rungtor snam di tei aro khotolrok snam di tei bising bai phataro pich silwi ma lepenai

¹⁵ Nwng abono omo hai khe ma tannai: kolok khe muk 300, kebeng muk 50 tei kuchuk khe muk 30.

¹⁶ Rungtorni núkhúngbo snam di tei núkhúngni muksani tola-o tailam tei bugurung narwgwi ton di. Aboni saka-o khe khotol kaitham snam di tei khaksa-o duglam narwk di.

¹⁷ Nai di, ha saka-o tongma bebak langma gwnangrokno sokomorna bagwi ang twi kotor rohornai, ha saka-o tongma bebak’-no thwi bainai.

¹⁸ Tamo khe ang nwng bai swmai tháisa tangnai, nwng nihikno nwsarokno tei nahamjwksongno tẃiwi rungo hap di.

¹⁹ Tei nwng bebak langma gwnangrokno mwthangwi narwkna bagwi bojro-bojro khe rungtoro da di. Abórok chwla masa bwrwi masa khe wngna nangnai.

²⁰ Mwthangwi narwkna bagwi toksa toktẃiroknobo pod thwgwi’-no tei mal-mataroknobo pod thwgwi phiya malnairoknobo hai’-no maknwi-maknwi khe pod thwgwi da phai di.

²¹ Tei nini bai bórokni bagwi nangma bebak chámungrokbo na si di.”

²² Noa abo hai’-no khlai kha, bo bebakno Kaitor dagima tẃi’-no khlai kha.