YAPHANG 48 - Kok Borok (Re-edited) Bible (BSI)

Jakob Ephraim tei Manaseno hamari rwmani

¹ Aboni ulo khe Josep hai hwnwi sajak kha “Nai di nwpha lumui tong kha” hakhe bo bwslasong khoroknwi Manase tei Ephraimno logi-o tlangwi tháng kha.

² Aphuru khe Jakobno hai hwnwi sajak kha, “Nwsla Josep nini thani phai-o”; aphuru khe bo bini bebak phan sochaui bini thuyamo achuksa kha.

³ Hakhe Jakob Josepno hai hwnwi sa kha, “Kwplaisa Kaitor Kanan hani Lujo ang bai nukjak kha tei hamari rwui

⁴ ano hai hwnwi sa kha, ‘Nai di ang nono kwbángma bwsa rwnai tei nini bosongrokno kwbángma dopha khlainai; ang nini bosongrokno nini yagulo kusung kusungni bagwi o hano rwnai.’

⁵ Hakhe tabuk ang ha Ijibo phaina swkang achaimani nwsla khoroknwirok ani se; Ruben tei Simion ani wngma hai Ephraim tei Manasebo ani’-no.

⁶ Tei bórokni ulo achainai nini bwsarok nini bwsa’-no wngnai; tei bórokni bosong bwtasongni bosongni mung bai se sinijaknai.

⁷ Tamni hwn ba ang Padanni phai phuru Ephrato sógwinani kisa swkang Rahel ano bwkha swbaiwi thwi kha, abo Ephrato sógwina kisa chal kho; hakhe ang bono Ephratni lama’-ono phob kha. (abo’-no Betlehem.)”

⁸ Israil Josepni bwsarokno nuk khe, “Bórok le sabo?” hwnwi sẃng kha.

⁹ Josep buphano hai hwnwi sa kha, “Kaitor ano oro rwmani bórok khe ani sajlasong se.” Hakhe Jakob hai hwnwi sa kha, “Bórokno ang hamari rwui manna tẃi khe ani thani tubu ja di.”

¹⁰ Umor bángmani bagwi aphuru Jakobni mokol nukma mwnaksese wngjagwi tong kha, hakhe bo kaham khe nuktha li ya. Ahaini bagwi Josep bwsarokno bini thani tubu-ui phai kha; hakhe bo bórokno kwbak kha tei motom su kha.

¹¹ Israil Josepno hai hwnwi sa kha, “Ang nini mwkhangno nuk phir anw hwnwi chongmani ya; tamo khe nai di Kaitor ano nwslasongno suda phunuk kha.”

¹² Hakhe Josep bórokno bini khurini na kha tei bo bono ha-o bomwi khulum kha.

¹³ Hakhe Josep bini bupha Israilni thani Ephraimno bini yagra tei Israilni yaksi-o khe tei Manaseno khe bini yaksi, phiya Israilni yagra-o tubu-ui phai kha.

¹⁴ Aphuru khe Jakob bini yagra yakno phologwi bini yaksi babaini bwsa kusu Ephraimni khorogo tei yak kebengwi bwsa okra Manaseno khe tei yasa yak bai bokhorogo yak bera kha.

¹⁵ Hakhe bo Josepno hai hwnwi saui hamari rw kha, “Ani apha, Abraham tei Jakob kók khnaui tongmani a Kaitor, ani langmano tabuksak jora tẃitherwi phainai Kaitor,

¹⁶ ano bebak hamyani kati rwnai, a Suari o chwrairokno hamari rw thung; bórokni bising tẃi ani mung tei ani aphasong Abraham tei Jakobni mung sinijak thung; tei bórok o ha saka-o bwsa kwbángma manẃi er thung.”

¹⁷ Josep buphano Ephraimni bokhorogo bini yagra yak rwma nuk khe bwkha hamjak li ya; hakhe bo buphani yakno Ephraimni bokhorokni norwi Manaseni khorogo tlangna nai kha.

¹⁸ Josep buphano hai hwnwi sa kha, “Apha ahai ya kho; omo se bwsa okra; bini khorogo se nini yagra yak bera di.”

¹⁹ Tamo khe bupha lon li ya tei hai hwnwi sa kha, “Ang si-o angsajla, ang si-o, bo’-bo kaisa bosong wngnai tei kotor wngnai; tamo khe buphayung bini slái kotor wngnai tei bini bosongrok kwbángma wngwi ernai.”

²⁰ Hakhe bo a salo bórokno hai hwnwi hamari rw kha, “Israilrok hamari sakhlai phuru nini mungno hai hwnwi khu-ui sanai, ‘Kaitor nono Ephraim hai tei Manase hai khlai thung.’ ”

²¹ Hakhe Israil Josepno hai hwnwi sa kha, “Nai di, ang thwina sampha laha, tamo khe Kaitor nwng bai pal tongnai tei nono tei uáisa nuchusongni ha-o kiphilwi tlangnai.

²² Ang nwtasongno rw ya karwi nono se ha Sekemno rw-o, ang abono Amorsarokni yakni ani seng bai tei ani chakhla bai khe segwi namani.”