YAPHANG 45 - Kok Borok (Re-edited) Bible (BSI)

Josep takhuksong bai sinijakmani

¹ Aphuru khe Josep bini bwkhano tei bini gana-o khe bachaui tongnairokni bwskango soiwi tongwi man li ya; hakhe bo hai hwnwi sa kha, “Ani bwskangni kutul bai di.” Hakhe Josep bini takhuksongno bo sabo sa phuru aro tei bui khoroksabo kwrwi kha.

² Bo sotonwi chirigwi kap kha, hakhe Ijipsarok abono khna kha tei a kók Pharaoni nokni borokrokbo a kókno khna kha.

³ Josep bini takhuksongno hai hwnwi sa kha, “Ang Josep se; ani apha tabukbo kwthang tong kho hai da?” Tamo khe bini takhuksong bini bwskango kók tháisa phano saui man li ya kwlwibraui se tong si-o.

⁴ Hakhe Josep bini takhuksongno hai hwnwi sa kha, “ani samo phai ja di.” aphuru khe bórok bini samo tháng lai kha. Bo hai hwnwibo sa kha, “Norok ha Ijibo phalwi rohor laimani ang norokni a takhuk Josep se.

⁵ “Tabuk norok bwkha hamya ta wngjak di, eba norok ano oro phalwi rohoro hwnwi sak sakno majra ta ber di; omo Kaitor se ano norokni slái swkang borokrokni langmano mwthangna bagwi rwi rohoro.

⁶ O ha-o asari nangmani bisik nwi se wng kho; tei bisi kaiba asari tong kho aphuru tei al baimabo tong glak tei ma ramabo tong glak.

⁷ Kaitor norokno tei kwbángmano o ha saka-o mwthangwi narwkna bagwi ano norokni slái swkang rwui rohor kha.

⁸ Aboni bagwi oro norok ano rohor ya, tamo khe Kaitor se ano oro rohoro; bo oro ano Pharaoni bupha hai snam kha tei bini nokni, bini Ijip hani tangdagiphang snam kha.

⁹ Aphani thani do lang si di tei bono ahai hwnwi saui di, ‘Nwsla Josep hai hwnwi sa-o; Kaitor ano bebak ha Ijipni tẃiphang snam kha; ani thani dwk yaui phai si di;

¹⁰ nwng Goseno khe tong phai di, omo hai khe nwng ani samo tongwi mannai, nwng bai norokni bwsarok, norokni bwsani bwsarok, norokni merarok, norokni punrok, norokni musuk tok-nokrok;

¹¹ aro ang chámungrok rwnai, tamni hwn ba teibo nokha bisik ba asari tongnai kho; wng ya khe nwng tei norokni núkhungni borokrok tei nini mal-matarok ma chá yaui ma tongnai se.’

¹² Tabuk ang samano norok bebakno mokol baithang nuk kha tei angphayung Benjaminbo nuk súk kha.

¹³ Ani aphano thángwi saui di, ang ha Ijibo bwswk se suar tẃi tong tei norok bebak nugwi thángmani kókrokno saui di.”

¹⁴ Aphuru khe bo bini takhuk Benjaminno gwdna-o kwbagwi kap kha; bo bai kwbakjak kheno Benjaminbo kap kha.

¹⁵ Bo tei bini takhukroknobo kwbagwi motom su kha tei kap kha; aboni ulo khe bini takhuksongbo bo bai kók sanani cheng kha.

¹⁶ Pharao tei bini nokni borokrok, “Josepni takhuksong phai-o” hwnwi khna khe bo tei bini selengrok bwkha tongthokjak bai kha.

¹⁷ Hakhe Pharao Josepno hai hwnwi sa kha, “Nini takhuksongno sa di, ‘Korai chirka saka-o chámung kupulung khe boksaui ha Kanan bwkhak tháng lai thung;

¹⁸ hakhe nwphano tei bórokni núkhungni borokrokno tubu-ui oro kiphilwi phai thung, ang o ha Ijipni kaham kuk hano bórokno rwnai, omo hai khe bórok o hani kaham kuk chámungno cháui mannai.’

¹⁹ Bórokno ahai hwnwibo dagi di, ‘Norokni núkhungni bihik bwsarokni bagwi ha Ijipni malkhungo khe cháthai tlang thung tei bórok bai baksa nwphano tubu-ui phai thung.

²⁰ Bórokni manwi-khwnwirokni bagwi khá chingching ta ma tongjak thung, tamni hwn ba ha Ijipni kaham kuk hano bórokni wngnai.’ ”

²¹ Israilni bwsarokbo abo hai’-no khlai lai kha; Pharao dagima hai khe Josep bórokno malkhungrogo khe boksaui cháthai rwui rohor kha tei tháng phuruni lamani bagwibo chámung rwui rohor kha.

²² Bo bórokno jani jani kan-sláina chum-sláina bagwibo rí jorsa khe rwui rohor kha; tamo khe bo Benjaminno khe rangchakni rang thamra tei kan-swláijaknai chum-sláijaknai khe jor ba rw kha.

²³ Bo buphani bagwi khe korai chirka mak chi-o khlaiwi ha Ijipni kaham kuk manwirok boksaui tei bwrwi korai chirka mak chi-o khe lamani bagwi auang tei kubun chámungrok rwui rohor kha.

²⁴ Abo hai khe bo bini takhuksongno rwui rohor kha tei bórok tháng phuru khe bórokno “Lamarogo ta uálai lai di” hwnwi saui rohor kha.

²⁵ Hakhe bórok ha Ijip yakarwi tháng lai kha tei Kanan ha-o bórokni bupha Jakobni thani kiphilwi phai kha.

²⁶ Aphuru khe bórok bono hai hwnwi sa kha, “Josep tabukbo kwthang’-no tong kho tei bo bebak ha Ijipni tang dagiphang wngwi tong kha.” O kók khna khe bo uanajak kha tei bórokno poito khlaiwi man li ya.

²⁷ Tamo bórok bono Josep samani bebak kókrokno sa khe tei Josep bono ha Ijibo tlangna bagwi rohormani a malkhungrokno nuk khe bórok bupha Jakob mwlang chamani sra kha;

²⁸ aphuru khe Israil hai hwnwi sa kha, “Angsla Josep kwthang tong kho; aswk khe se wng kha: ang thwi ya sini bono thángwi nai anw.”