YAPHANG 44 - Kok Borok (Re-edited) Bible (BSI)

Khuri kwmamani

¹ Josep bini nokni seleng bokhorokno hai hwnwi dagiui sa kha, “O borokrokni kholjangrokno chakma swkno tei bórok páisakno supungwi da di tei bórokni rangrokno khe kholjangni búkhúgo khe daui rohor di,

² ani rangchakni khurino khe rang bai baksa khe a kusu kukni kholjango daui rohor di.” Hakhe bo dagima hai kheno khlai kha.

³ Phung aidrobo khe takhukrokno bórokni korai chirka bai khe lam rw rwui rohor kha.

⁴ Bórok kamiyungni kisa hakchalo sógwi khe, Josep bini nokni seleng bokhorokno hai hwnwi sa kha, “A borokrokni uklogo do lang gra di; nwng bórokno malai kheno ahai hwnwi hwn di, ‘norok tamni bagwi samung kahamni ba omo hai khe samung hamya khlaiwi su kha de? norok tamni bagwi rangchakni khurino ma khok lang?

⁵ Abo bai ani nokphangsa nubo nungo tei abo bono samung kwtharobo thepamani khuri ya diba? Norok omo tẃi samung tangwi samung hamya khlai kha.’ ”

⁶ A seleng a borokrokno swlabwi malai khe, bo a kókno risaui sa kha.

⁷ Aphuru khe bórok bono uphilwi hai hwnwi sa kha, “Nokphangsa tamni omo tẃi kókrok sa trwng? Nini o selengrok ba bahai khe omo tẃi samungrokno ba khlainai!

⁸ Nai di, chwng chini kholjango rang manmano Kanan hani se nini thani kiphilwi rw phai kha; hakhe chwng bahai khe nini nokphangni rangchak eba rukphaino khoknai?

⁹ Nini o selengrokni bisingo khoroksa swkni aro abo manjak khe bo ma thwinai tei chwngbo bugrasani seleng wngwi pái si thung.”

¹⁰ Hakhe bo hai hwnwi sa kha, “Ao, nwng sama tẃi’-no wng thung: ang khuri nanaino ang ani seleng snamnai tei kubunrokno khe majra kwrwi hwnwi phiyógwi rwjaknai.”

¹¹ Hakhe bórok bebakno doui bórokni kholjangrokno ha-o tikhlai lai kha tei abono kheng lai kha.

¹² A borok okrani simi mareui kusuni kholjango khe abono naituk kha; tei a khurino Benjaminni kholjango khe man kha.

¹³ Aphuru khe bórok sak sakni rírok chir lai kha tei korai chirka saka-o manwi boksaui kamiyung bwkhak kiphilwi phai lai kha.

¹⁴ Juda tei bini takhuksong Josepni nogo kiphilwi phai khe nuk kha, aphurubo bo aro’-no tong kho; hakhe bórok bono ha-o botok khe klaiwi khulum lai kha.

¹⁵ Josep bórokno hai hwn kha, “Norok omo tamo khlai kha? Norok tamo saui man ya da ang tẃi borok mwtaini suar bai sema naiwi omorokno bebakno tikhlai mano?”

¹⁶ Aphuru khe Juda hai hwnwi sa kha “Chwng ba chini bugrano tei tamo sa sinai? Eba chwng bahai khe chini majra kwrwi hwnwi phunugui man sinai? Kaitor nini o selengrokni majrano phunugui rw kha; nai di, a khuri manjakma borok tei chwng bebakno tabuk nini seleng wng kha.”

¹⁷ Tamo khe bo hai hwnwi sa kha, “Ang omo hai samungrok ta ma khlai thung! A khuri manjakmani borok simi se ani seleng wngnai; phiya norok khe bebakno kaham kwrwng khe norokni nwphani thani kiphilwi tháng di.”

Juda Benjaminni bagwi koimani

¹⁸ Aphuru khe Juda bini samo thángwi hai hwnwi sa kha, “O bubagrasa nwng le Pharao bai baksa, nini o selengno nini thani kók kisa sanani rw ja di, ano ta joli ja di.

¹⁹ Hodasa, nini selengrokno ‘Norokni nwpha tei takhuk da tong kho?’ Hwnwi sẃng kha.

²⁰ Hakhe chwng bugrasano ‘chini apha chakrajak tongo tei bo bini a chakra umoro bini bwsa kusuno manmani chini phayung kusu tongo; o chwraini takhuk khe thwi kha tei bo simi’-no tabuk bini bumani bwsa tongsi-o; bupha bono belai kheno hamjago’ hwnwi ma sa kha.

²¹ Aphuru khe nwng nini o selengno sa kha, ‘Bono oro tubu di ang bono mokol baithang nai grana.’

²² Chwng bugrasano sa kha, ‘A chwrai buphano yakarwi man glak, tumungno bo buphano yakarwi kabu khe bupha thwiwi páinai.’

²³ Aphuru khe nwng nini o selengrokno ahai hwnwi sa-u kha, ‘Norokni takhukno norok bai baksa tubu ya khe ani bwskango ta nukjak phai di.’

²⁴ Chwng nini seleng chini aphani thani kiphilwi tháng khe bugrasa samani kókrokno chwng bono sa kha.

²⁵ Hakhe bo chwngno ‘Tháng di chámung kisa paiwi nai phi di’ hwnwi hwn khe

²⁶ chwng bono hai hwnwi sa kha, ‘Chwng thángwi man glak, chini takhuk kusuno chwng bai baksa tháng khe se chwng thángwi mannai; tamni hwn ba chini takhuk kusu chwng bai tháng ya khe chwng bo bai malai man glak.’

²⁷ Aphuru khe nini seleng chini apha chwngno hai hwnwi sa kha, ‘Norok saui mano ani hik ani bagwi bwsa chwla khoroknwi se bá-o;

²⁸ aboni bere khoroksa swkang’-no ano khibiui klang kha. Bo bolongni manwirok bai bahan swkagwi phondrik-phandrak khlaijak khna hwnwi ang man hwno; aphuruni simi bono ang tei nuk li ya.

²⁹ Tabuk norok bonobo ani oroni tlangwi tháng khe tei bini saka-o mungsa swk hamya pati khe, hakhe norok ani khwnai phurwi chakraui tongma jora-o se teibo bwkha tekto rwui norok ano thwima-o se khiklai sinai.’

³⁰ “Aboni bagwi tabuk, ang nini seleng aphani thani kiphilwi tháng phuru tumungno o chwrai chwng bai kwrwi hwn khe, chini aphani langma khe o chwrai bai se kwrwngjakba,

³¹ o chwraino chwng bai nuk ya khe le, bo thwiwi páinai; hakhe nini o seleng chini khwnai kuphur aphano bwkha swbaiwi mangkhoro sógwi rw sinai.

³² Tamni hwn ba nini o seleng o chwraino kaham kwrwng kheno tubunai hwnwi aphano ahai hwnwi saui kók rwjak, ‘Bono nini thani kiphilwi tubu-ui man ya hwn khe, ang nini thani aboni majrano thwi yasakni bagwi ruju-ui nanai.’

³³ Hakhe tabuk, o bugrasa, ang nini selengno o chwraini sak slái-o nini thani seleng snamwi narwgwi o chwraino bini takhuksong bai baksa khe kiphilwi rohor ja di hwnwi ang nini selengsa nono koi ja-o.

³⁴ O chwrai ang bai baksa kwrwi hwn khe ang bahai khe ani aphani thani kiphilwi thángnai? Ang aphani saka-o hamya patima nukna kiri-o.”