YAPHANG 43 - Kok Borok (Re-edited) Bible (BSI)

Josepni takhuksong Benjamin bai khe ha Ijibo kiphilmani

¹ Aphuru a ha-o belai khe asari nang kha.

² Tei bórok ha Ijipni tubuma bebak chámungrokno cháui pái khe bórokni bupha hai hwnwi sa kha, “Tháng di chini bagwi tei kisa chámung paiwi tubu di.”

³ Tamo khe Juda bono hai hwnwi sa kha, “A borok chwngno kwrak khe ragdama khe sa ma tongo, ‘Norok norokni takhukno logi-o tubu ya khe ani mwkhang nuk glak.’

⁴ Tumung nwng nwslano chwng bai baksa rohor khe chwng thángwi nini bagwi chámung paiwi tubunai;

⁵ tamo khe nwng chini takhukno rohor ya khe chwng aro thángwi man glak, tamni hwn khe a borok ‘norokni takhuk norok bai kwrwi khe ani mwkhang nuk glak’ hwnwi sama tongo.’ ” Israil hai hwnwi sa kha, “Tamo norok chini tei

⁶ khoroksa takhuk tongo hwnwi a borokno saui ano tabuk aswk tekto nang rw lang?”

⁷ Bórok bono kók phirogwi hai hwnwi sa kha, “A borok chini kókno tei chini núkhungni kókno tẃi ahai hwnwi sẃng kha, ‘Norokni nwpha kwthang da tong kho? Norokni tei achaisong takhuk da tong kho?’ omorokno sẃngma bagwi se omorokno chwng ma sa-o; chwng bahai khe bono ‘Norokni takhukno oro tubu di’ hwnwi sinai ba.”

⁸ Hakhe Juda bupha Israilno hai hwnwi sa kha, “O chwraino ang bai khe rohor di tei hakhe chwng lam rwnai; hakhe se nwng tei chwng tei chini chwrairok thwinani ma yóknai.

⁹ Ang bini barja gosi-o; bono nwng ani yago mannai. Ang bono nini bwskango kaham kwrwng khe tubu-ui man ya khe nwng ano kusung kusung aboni majra ber phlai máng tong di;

¹⁰ chwng omo hai khe lerwi tong ya khe tabuk jora le uáinwi se thángwi phai man kha mun.”

¹¹ Aphuru khe bórokni bupha Israil bórokno hai hwnwi sa kha, “Omo hai hwn khe, ahai se khlai di, kholjangrogo khe norok a borokni banta chini ha-o wngma kaham kuk bwtháirok, resin kisa, piya bwtwi, motom mosola, thok motom, badam tei almondrok tlangwi thángwi hili yapharwi di.

¹² Tei norok rangbo duna khe tlangwi tháng di; kholjang búkhúgo khe rang dajak khe kiphilwi manma rangroknobo tlangwi tháng di; abo nukslap yaui phano rohorjak khna.

¹³ Norokni takhuknobo tlangwi a borokni aro tháng phi di,

¹⁴ Kwplaisa Kaitor a borokno norokno khairokna bwkha rw thung, omo hai khe Benjaminno tei norokni takhukno kiphilwi rohor thung. Ang ani angsarokno kwmana nang khe kwphano kwma si thung.”

¹⁵ Hakhe bórok hilirok na lai kha, rangbo duna kha tei Benjaminno tẃiwi ha Ijip bwkhak lam rw lai kha, hakhe bórok ha Ijibo thángwi Josepni bwskango bachaui lai kha.

¹⁶ Josep Benjaminno bórok bai baksa nuk khe bini nokni samung tangnaino ahai hwnwi sa kha, “O borokrokno ani nok bisingo tlang di tei mui ratharwi chámung tiyar khlai di, o borokrok diborni chámung ang bai baksa chánai.”

¹⁷ Aphuru khe a seleng Josep dagima hai kheno bórokno Josepni nogo tlangwi tháng kha.

¹⁸ Hakhe bórok Josepni nogo tubujak khe kirijak lai kha tei hai hwnwi sa lai kha, “Chwng omo khe swkango a chini kholjango daui kiphilwi rohormani rangni bagwi se wng khna, hakhe bo tabuk chwngno achomsa khe swpragwi chini korai chirkarokno segwi naui páiwi chwngno bini seleng snamnai khna.”

¹⁹ Hakhe bórok Josepni a selengni nok duglamo phai lai kha,

²⁰ tei hai hwnwi sa lai kha, “O bubagrasa, chwng swkango oro uáisa chámung paina bagwi phai kha;

²¹ tei chwng bathak thai-o sógwi khe chini kholjangno kheng phuru, bebakni kholjang búkhúgo khe rangno man kha, hakhe chwng abórokno bebakno tubu-ui phai phi kha,

²² tei chwng teibo chámung paina bagwibo alaida rangbo tubu kha. Sabo ba chini kholjango a rangrokno tonwi rw kha chwng saui man li ya.”

²³ A seleng hai hwnwi sa kha, “Norok ta uana di, ta kiri di; norokni Kaitor tei norokni nwphani Kaitor se norokni kholjango a rangrokno ton khna; ang norokni rangno man kha.” Hakhe bo Simionno bórokni thani tubu-ui phai kha.

²⁴ A borok a borokrokno Josepni nogo tubu-ui phai khe bórokno twirok rwjak kha tei yakungrok sú lai kha tei bórokni korai chirkarokno chámungrok rwjak kha,

²⁵ bórok Josep diboro sók phai kheno bórokni hili rwna bagwi tiyar khe ton lai kha, tamni hwn khe bórok bo bai baksa chánani bagwi sajak.

²⁶ Josep nogo phai khe, bórok nok bisingo bórokni hilirok tlangwi thángwi bono bomwi ha-o klai khulum lai kha.

²⁷ Bo bórok kaham kwrwng da tong bai hwnwi sẃngwi, “Norok nwpha chakrasani kók samani bo le kaham kwrwng da tong? Bo kwthang tong khona bla?” hwnwi sẃng kha.

²⁸ Bórok hai hwnwi sa kha, “Chini apha nini selengsa kwthang’-no tongo tei kaham kwrwngno tong.” Hakhe bórok bono khorok bomwi bórom rwui khulum lai kha.

²⁹ Josep bini bumani bwsa tei achaisong takhuk Benjaminno nuk khe hai hwnwi sa kha, “O, omo da norokni takhuk kusu hwnwi sama a borok? Kaitor nono hamari rw thung sajla!”

³⁰ Hakhe Josep aroni doui kutulwi tháng kha, tamni hwn khe bo buphayungno belaino khátangjak kha. Hakhe bo kapna jaga rutuk kha. Bo bini khotolo habwi kabwi kha.

³¹ Aphuru khe bo bini mwkhang sú-ui nongkhorwi phai kha; tei sakno methebwi “Khalai khlai si di” hwnwi dagi kha.

³² Bo bini bagwi tei bini takhuksongni bagwibo juda khe, phiya bo bai chánai Ijipsarokni bagwi tebul juda-o khe chámung rw kha, tamni hwn ba Ijipsarok Hibrurok bai thansa khe chá lai ya, abo bórokni bagwi selengmasingcha samung wngjago.

³³ Bórok Josepni bwkhak bumkhang khlaiwi okrani simi kusu jora mareui achuk lai kha; tei khoroksa tei khoroksano mwlang chaui naisik laiwi tong lai kha.

³⁴ Bórokno Josepni tebulni mai-muirok naui bokjak kha, tamo khe Benjaminno khe buini slái teibo bakba kwbáng khe bokjak kha. Hakhe bórok bo bai baksa tongthogwi chá lai kha-nung lai kha.