YAPHANG 40 - Kok Borok (Re-edited) Bible (BSI)

Josep alongo tongnairokni imangni kók swbai sama

¹ Aboni sal kisa ulo khe Ijipni habugrani khuri tẃinaisa tei auang snamnaisa habugrani thani samung hamya khlai kha.

² Hakhe Pharao o khuri tẃinaisa bai auang snamnaisarokni bokhorokno khoroknwirokno jolijak kha,

³ tei bórokno along mwrwknai bokhorokni aro ton kha, arono Josep bo chopjak.

⁴ Alongni barja bokhorok Josepno o borokroknobo naikolnani barja ber kha, hakhe bórok sal kolokmano alongo baksa khe tong lai kha.

⁵ Horsa khe habugrani khuri tẃinaisa tei auang snamnaisa alongo chopjak a khoroknwirok imang nuk lai kha; bórokni imang nukmanibo janija tei aboni gujokbo juda juda.

⁶ Josep phung ai khe bórokni thani phai khe bórok khoroknwino mok laijak nuk kha.

⁷ Hakhe bo, bo bai baksa bini bugrani alongo chopjak Pharaoni a tẃiphangrokno hai hwnwi sẃng kha, “Tini tamni norokni bumkhang aswk mok laijak sla?”

⁸ Bórok hai hwnwi sa kha, “Chwng khoroknwi’-no imang kaisa kaisa nuk lai kha tei oro khoroksa phano a imangni gujokno saui mannai kwrwi.” Hakhe Josep bórokno hai hwnwi sa kha, “Kaitor se gujokno le saui man rw-o ahai ya diba? Norokni imangni kókno ano sa ja bla.”

⁹ Hakhe a khuri tẃinaisa bokhorok ahai hwnwi sa kha, “Ani a imango ang ani bwskango angur buphang nuk kha,

¹⁰ aboni bedek dektham tongo; aro bwlái rotomsa kheno, bwkhrwi rwsaui bar kha tei bochop bochop khe angurrok mun kha.

¹¹ Ang habugrani khurino tẃijak; hakhe ang angur naui sebwi a khuri-o rw kha tei abono bono yapharwi rw kha.”

¹² Hakhe Josep bono hai hwnwi sa kha, “Aboni gujok khe omo hai: O kwtham bedek wng kha abo saltham hwnmani se;

¹³ salthamni salo habugra nono khocha phinai tei nono nini samungno rw phinai; hakhe nwng swkango khlaima hai nwng bono arakni khuri ma yaphar phinai.

¹⁴ Tamo khe nini jora kaham phuru ano muitu khlai ja di, ano khairogwi habugrani thani ani kók kisa sa ja di tei ano o alongni yókna bagwi chuba ja di.

¹⁵ Nai di, ang Hibrurokni hani romwi tubujakma se tei o Ijip ha-obo ang mungsa phano omo hai khe alongo chopjaknai samung tangma kwrwi.”

¹⁶ A auang snamnaisani bokhorok nai ba a khuri tẃinaini imangni kók swbai samani abo kaham’-no, hakhe bo Josepno hai hwnwi sa kha, “Angbo imang kaisa nukma tongo: Ani bokhorogo khe, auangni ura kaitham rujujak,

¹⁷ tei sakani a ura-o khe Pharaoni banta podrepot auangrok tongo, tamo khe toksarok abono chá laiwi tongo.”

¹⁸ Josep hai hwnwi sa kha, “Omoni gujok khe omo hai: A uraktham abo khe saltham hwnmani se;

¹⁹ salthamni salo nini bokotok tansu-ui páinai!—hakhe bo nini mangno buphango khachiui rwnai tei tokrok nini bahan chánai.”

²⁰ Salni salthamni salo khe Pharaoni achaima sal, bo bini selengrokni bagwi chámung panda kaisa khlai kha; bo bini a khuri tẃinaino tei a auang snamnaini bokhorokrokno phiyógwi a tẃiphangrokni bwskango tubu kha.

²¹ Bo a khuri tẃinaino khe bini samungno rw phi kha;

²² tamo khe Josep sama hai bo a auang snamnai bokhorokno khe kotok soro rwui buthar kha.

²³ Tamo khe a khuri tẃinaisa bokhorok Josepni kókno muitu wngjak li ya, bo bebak pogwi tháng kha.