YAPHANG 39 - Kok Borok (Re-edited) Bible (BSI)

Josep bai Potipharni bihik

¹ Tabuk khe Josepno ha Ijibo tlangwi thángjak kha tei Potiphar hwnwi khoroksa Pharaoni tangphang tei noyung mwrwknairokni bokhorokno bono aro tubunai Ismaelsarokni aroni paiwi na kha.

² Subraiyung Josep bai pal tongo, hakhe bo bini samungrokno cha rw kha; bo bini nokphang Ijipsani nogono tong phuru,

³ bo nuk kha Subraiyung Josep bai baksa tongo tei bo tangma bebak samungrokno cha rw-o.

⁴ Aboni bagwi Potiphar bono bwkha phurjagwi bini baithangni nokni naikolphang snamwi bono bini nokni tongma bebak manwirokni barja yapharwi rw kha.

⁵ Bono nini baithangni nokni naikolphang snamwi nokni bebakni barja yaphar phuruni simi khe Josepni jarwi Subraiyung a Ijipsani núkhungni bebakno tei nokni tongma tei hapharrogo tongma manwirokno hamari rw kha.

⁶ Hakhe bo Josepni yago bebakni barja yapharwi rw bai kha; bini chánanino karwi bebakno bo tei mungsa phano si li ya. Yang Josep khe sakbo kaham, chwlabo naithok.

⁷ Sal kisa lái khe nokphangni bihik Josepno mokol tháijak kha, hakhe, “Ang bai thu di,” hwnwi sa kha.

⁸ Tamo khe bo soi li ya phiya nokphangni bihikno hai hwnwi sa kha, “Nai di ani nokphang bo nokni mungsano phano si li ya, ani yago bebakno yapharwi rw bai kha;

⁹ bo o nogo ani slái kotor ya; tei nono karwi bo ano mungsa phano yaphar ya kwrwi kha, tamni hwnma le nwng le bini bihik ba; hakhe ang bahai khe aswk samung hamya khlaiwi mannai tei Kaitorni thani bahai khe sumsok khlaiwi mannai?”

¹⁰ Bo Josepno sal brúmno abo hai khe sa phano bo bini kókrokno khunju kan li ya tei bo baibo pal thu li ya tei tong li ya.

¹¹ Tamo khe salsa bo bini samung tangna bagwi nok bisingo tháng kha, aphuru aro tei kubun borokrokbo kwrwi,

¹² bo bini ríno romwi “Ang bai pal thu di.” hwnwi sa kha. Tamo khe bo bini ríno bini thani khibiui klangwi nokni nongkhorwi khár kha.

¹³ Bo bini ríno khibiui klangwi nokni ongkhorwi khárma nuk khe,

¹⁴ bini nogo tongnai chwlarokno ringwi bórokno hai hwnwi sa kha, “Nai di, ani angsai a Hibruno chwngno lachi rwna bagwi se tubu si-o; bo ani nogo ano romphrena bagwi hap khe ang sotonwi chirik khe;

¹⁵ bo ani chirikmano khna khe bini rírokno ani thani khibiui klang kha tei nokni nongkhorwi khárwi tháng kha.”

¹⁶ Bini nokphang phai ya sak bo Josepni ríno narwgwi ton kha,

¹⁷ tei bo bono a bini a snamwi samani kókrokno hai hwnwi saui khna rw kha, “Nwng chini thani a Hibrusa selengno tubumani, bo ani thani phaiwi ano romphrena naiwi lachi rw kha;

¹⁸ hakhe ang khorang sotonwi chirik khe tei kap khe, bo bini ríno ani oro khibiui klangwi nokni nongkhorwi khár kha.”

¹⁹ Josepni nokphang a kókrokno bihikni khúgo, “Nai di nini seleng ano omo hai khe khlai kha,” hwnwi khna khe bo belai jolijak kha.

²⁰ Tei Josepni nokphang Josepno romwi alongo chobwi rw kha, abo wng kha habugra bini borokrokno chopmani along, bo’-bo aro’-no tlangwi tonjak kha.

²¹ Tamo khe Subraiyung Josep bai baksa tongo tei bono kaham khe khairok kha, alongni barja bokhorok bono hamjak kha.

²² Hakhe alongni barja bokhorok Josepni yago bebak alongo tongnairokno nainani barja rwui rw kha tei aro khlaijakma samungrok bono abono khlai-o.

²³ Josepni yago rwma barjarokno a alongni barja bokhorok mungsa phano sakthar ya, tamni hwn ba Subraiyung Josep bai baksa tongo; tei bo tangma bebakno’-no samung cha rw-o.