YAPHANG 37 - Kok Borok (Re-edited) Bible (BSI)

Josep bai bini achaisongrok

¹ Jakob bupha tong langma ha Kanano kami khaui tongnani cheng kha.

² Omo wng kha Jakobni núkhungni láibumani kothomarok. Josep nokha bisi chisnini chasloksa chwrai, bini takhuksong bai khe merarok, punrok mwrwgo, abórok wng kha buphani hik kotoi Bilha bai Jilpani bwsarok. Bo bini takhuksongrok samung cha ya khlaima kókrokno buphani thani saui rw phai-o.

³ Israil, Josepno bini tei bwsarokni slái hamjak kugo, tamni hwn ba bo Josep khe bini belai chakra jora-o manmani sajla; hakhe bono kamchwlwi lolang naithok kangsa subwi rw kha.

⁴ Phiya ba Josepni takhukrok bórokni slái bupha bono hamjago hwnwi naislerjak kha tei bo bai kwchang kwchang kók sa laiwi tongwi man li ya.

⁵ Josep imang kaisa nuk kha tei a imangno bini takhuksongno saui khna rw khe, bórok bono teibo naislerjak kha.

⁶ Bo bórokno hai hwnwi sa kha, “Ang tamo imang nuk kha abo norok khna ja bai di:

⁷ Nai di chwng bebakno gom bwlwngo gom motha kha laiwi tongmani; ani motha thóng-thóng khe bachasa kha; nai ba norokni motharok khe ani mothano kiting lai kha tei abono khulum lai kha.”

⁸ Bini takhuksong bono hai hwnwi sa kha, “Nwng de chini bugra wng suknai tamo?” Eba nwng da chini bokhorok wngwi chwngno kók khna rwnai wngnai? Hakhe bórok bono bini imang bai bini kókrokni bagwi teibo naisler lai kha.

⁹ Hakhe bo tei kaisa imang nuk phir kha tei a kókno bini takhuksongno hai hwnwi sa kha, “Nai di a imango sal, tal tei athukiri kolchisarok ano khulum lai kha.”

¹⁰ Bo a kókno bini buphano tei bini takhuksongno sa khe bupha bono hai hwnwi kulwi hwn kha, “Nwng omo tamo imang nuk lang? Ang, nwma tei nini takhuksongrok phaiwi ha-o botok khe nono klaiwi ma khulumnai hai da?”

¹¹ Hakhe bini takhuksongrok bono músú lai kha tamo khe bupha khe a samani a kókrokno bwkha-o chu-ui ton kha.

Josep phaljagwi ha Ijibo tlangjak kha

¹² Salsa bini takhuksongrok buphani pun, merarok mwrwkna bagwi Sekemo tháng kha

¹³ Hakhe Israil Josepno hai hwnwi sa kha, “Nwng nini takhuksongrok Sekemo merarok, punrok mwrwgwi tong ya da? Phai gra di ang nono bórokni aro rohor grana.”

¹⁴ Hakhe bupha bono hai hwnwi sa kha, “Tháng di tei nwtasongrok tei mal-matarok bebak kaham kwrwngda nai di; hakhe kiphilwi phaiwi ano sa phai phi di.” Hakhe bo bono Hebron harungo rwi rohor kha, hakhe bo Sekemo sók phai kha.

¹⁵ Aro sógwi khe bo yang yang tháng trwngwi tongwi kha, hakhe aphuru borok khoroksa bono nugwi hai hwnwi sẃng kha, “Nwng tamo naituk?”

¹⁶ “Ang ani takhuksongrokno se naitugwi tongo,” hwnwi bo sa kha. “Bórok buro mera mwrwk laiwi tong khna ano kisa sa ja di,” hwnwibo bo sa kha.

¹⁷ A borok hai hwnwi sa kha, “Bórok oroni swkang’-no tháng bai kha, tamni hwn ba ang bórokno ‘Tho Dothanno tháng lainai’ hwnwi samano khna kha.” Hakhe Josep bini takhuksongno naitugwi thángwi Dothanno bórok bai malai kha.

¹⁸ Bórok hakchalo tongsani’-no bono nuhur lai kha tei bo bórokni aro sógwi ya sini’-no bono butharwi páinai hwnwi kók chap lai kha,

¹⁹ Bórok bo’-bo bono hai hwnwi sa lai kha, “Imang nuknaisa phai-o.

²⁰ Phai di, tabuk bono buthar laiwi kaisa hakhoro khiklaiwi rw lai anw; tei chwng bono bolongni manwirok uátharwi pái kha hwnwi sa lai anw, hakhe bini a imang tamo wng chwng nuk anw.”

²¹ Phiya Ruben bórok sa laima a kókno khnaui Josepno mwthangna bagwi nai kha tei “Phai di bono buthar lai li ya,” hwnwi sa kha.

²² Ruben bórokno hai hwnwi sa kha, “Thẃi le ta kochok rw di; bono yakbo ta rw di, tamo khe oro haphar bukcha-o hakhor tongma-o khiklaiwi rw di” bo bono mwthangwi buphani thani phiyógwi rohorna bagwi se omo hai khe sa-o.

²³ Josep bini takhuksongni aro sók phai kheno, bórok bini a kamchwlwi lolang yaktwk kolokno khugwi na lai kha;

²⁴ Hakhe bórok bono romwi hakhoro khiklaiwi rw lai kha. U hakhoro khe twi kwrwi, bukcha.

²⁵ Hakhe bórok chá laina achuk phuru khe; tei nuk kha, Ismaelsasong bwtang-bwtang khe dolsa Giliadni Ijibo tháng laiwi tongo. Bórokni mangingangrogo khe belengtwi motomrok tei satrairok teibo motom manwirok boksajak.

²⁶ Aphuru khe Juda bini takhuksongno hai hwnwi sa kha, “Chwng chini takhukno butharwi tamo mannai tei thẃi khiklai laiwi le tamo mannai?

²⁷ Phai di, chwng bono Ismaelsarokni yago phalwi rw lai anw; chwng bono yak rw lai li ya, tamni hwn khe bo’-bo chini takhukno ba, chini sakni’-no bahan se ba.” Hakhe bini takhuksongrok lon lai kha.

²⁸ Ha Midianni kisa bepar thwngnairok samo sók phai khe, bórok Josepno twikhorni tisa lai kha tei lepchinwi rukphaini sekel bai khe Ismaelrokni yago phalwi rw kha; hakhe bórok Josepno ha Ijibo tlangwi tháng kha.

²⁹ Ruben a twikhoro phaiwi Josepno aro nuk li ya hwn khe bini ríno chir kha

³⁰ tei bini takhukrokni aro thángwi hai hwnwi sa kha, “A chwraisa ba aro kw se kwrwi kha; ang ba buro thángwi tamo khlai sinai?”

³¹ Aphuru khe bórok pun masa rathar laiwi aboni thẃi-o Josepni ríno chomsa kha;

³² bórok a kamchwlwi lolangno buphani thani tlangwi hai hwnwi sa kha, “Chwng omono man kha; nai di omoba tamo nwslani da wng kha?”

³³ Hakhe bo abono siniui hai hwnwi sa kha, “Omo le ani sajlani’-no; mungsa swk bolongni manwirok bono buthar khna; Ani sajla le katswi phondrik-phandrak khlaijakla hwna.”

³⁴ Jakob bwkha báijagwi bini rí chir kha tei rí kichikrok kan kha, bwslani bagwi sal kwbángma bo bwkha khamwi tong kha.

³⁵ Bini bebak bwslasong bwsajwksong bono bwkha kwchang rwna bagwi phai lai kha, tamo khe bo bwkha kwchangjak li ya wngwi hai hwnwi sa kha, “I’nhi, ang ani sajlani bagwi bwkha kham te kham te hakhoro se tháng sinai.” Omo hai hwnwi saui bupha bwsajlani bagwi bwkha sajagwi kap kha.

³⁶ A jora-o ha Ijibo Midiansasongrok Josepno Potipharni thani phalwi rw kha, bo wng kha habugrani khoroksa tẃiphang, bo noyung mwrwknairokni bokhorok.