YAPHANG 33 - Kok Borok (Re-edited) Bible (BSI)

Jakob Esau bai malaimani

¹ Jakob naiwi nuk kha, Esau bini borok khorokrabrwirokno tẃiwi phaimani nuhur kha, hakhe bo bwsarokno, Lea, Rahel tei khoroknwi selengjwkrokno khaknwi khe khagwi rw kha.

² Bo selengjwkrok bai bórokni bwsarokno ton kha tei aboni ulo khe Lea bai bini bwsarokno tei uklogo khe Rahel bai Josep.

³ Jakob khe bórok bebakni slái bwskango, bo bini takhukni bwskango sógwi khe’-no uáisni ha-o klaiwi botok khe khulum kha.

⁴ Tamo khe Esau bo bai malaina bagwi khachigwi tháng kha tei kotogo kwbagwi motom su kha tei bórok kap lai kha.

⁵ Esau yang yang naiwi nai khe bwrwirokno tei chwrairokno nuk khe hai hwnwi sẃng kha, “Nwng bai baksa o borokrok sabo wng bai kha?” Jakob hai hwnwi sa kha, “Bórok khe, Kaitor khairogwi nini o selengno rwmani bwsarok se.”

⁶ Hakhe selengjwkrok, bwsarok bai phaiwi bono khulum phai kha.

⁷ Hakhe Lea bai bwsarok phaiwi khulum phai kha, bebakni ulo khe Jakob bai Rahel phaiwi khulum phai kha.

⁸ Esau hai hwnwi sẃng kha, “Ang tei kubun bodolrok malaimarok le tamo? Abórokni gujok ba tamo wng lang?” Jakob hai hwnwi sa kha, “Abo nini bwkha manna bagwi se.”

⁹ Esau hai hwnwi sa kha, “Takhuk, ani kwbángma’-no tongo, ninino nwng’-no na di.”

¹⁰ Jakob hai hwnwi sa kha, “I’nhi, ang nono koi ja-o, nwng ano bwkha phurwi’-no tong khe nwng ang rwmani ani yakni hilino yachak ja di. Ang nini mwkhangno Kaitorni mwkhang hai khe nugo. Nwng ano tabuk belai kheno kaham khe na kha.

¹¹ Ang nini bagwi tubuma hilino yachak ja di; Kaitor ano khairogwi tongmani bai ani bebak nangmarokno Kaitor ano rw bai kha.” Bo yachak yasak’-no Jakob bono koi máng tong kha.

¹² Hakhe Esau hai hwnwi sa kha, “Phai di tháng lai si anw, ang lam rw gra anw.”

¹³ Jakob hai hwnwi sa kha, “Nwng saui mano chwrairok kebel máng, merarok, mal-matarok bórokni bwsa kwlwiroknobo ma uansugo, bórok salsa ma him khe bebakno thwi se pái bainai.

¹⁴ Nwng ani slái swkang tháng gra si di, ang twrwk twrwk khe phai anw. Ang mal-mata tei bwsarokno tẃiwi ang doui manma tẃi’-no doui phaiwi nono Seiro malai phai anw.”

¹⁵ Esau hai hwnwi sa kha, “Ani kisa borokno nwng bai klang anw.” Tamo khe Jakob hai hwnwi sa kha, “Nwng ano chajak khe se wng kha, abo ba tamo nangnai?”

¹⁶ Hakhe, Esau Salono bini lama Seir bwkhak tháng kha.

¹⁷ Jakob khe Sukoto tháng kha tei aro bini bagwi tei bini mal-matarokni bagwi nok tangwi kha. Aboni bagwino abono Sukot hwnwi mung pharjago.

¹⁸ Hakhe Jakob Padan-aramni phaiwi Kanan hani Sekemni kamiyungo kaham kwrwng khe sók phaiwi aro batham khlai kha.

¹⁹ Sekemni bupha Hamorni bwsarokni aroni a hano rukphai khók sara rwui paiwi na kha.

²⁰ Bo aro háyá kaisa tisa kha tei abono El-Elohe-Israil hwnwi mung phar kha.