YAPHANG 32 - Kok Borok (Re-edited) Bible (BSI)

Jakob Esau bai malaina bagwi jai wngmani

¹ Jakob lama tẃi thángwi tong phuru Kaitorni suarirok bo bai phaiwi malai phai kha;

² Jakob bórokno nuk khe hai hwnwi sa kha, “Omo Kaitorni sengkrak se!” Hakhe bo a jagani mung Mahanaim hwnwi mung phar kha.

³ A borokrok bini takhuk Esauno Idomni Seir ha-o hai hwnwi saui borok rwi rohor kha.

⁴ Norok ani nokphang Esauno hai hwnwi sa di, “Nini seleng Jakob omo hai sa-o; ‘Ang buini ha-o Labanni aro tabuk jora tong kha;’

⁵ tei ani musuk chwlarok korai chirkarok, pun tokrok chwla tei bwrwi selengrok tongo. Ang nwng bai khairokjakna bagwi se borok rwi rohoro.”

⁶ A borokrok kiphilwi phaiwi Jakobno hai hwnwi sa kha, “Chwng nini takhuk Esauni thani tháng kha, bo nwng bai malaina bagwi phaiwi tongo. Bo bai baksa borok khorokbrwi-ra tongo.”

⁷ Jakob kiriui uanajak kha, hakhe bo bo bai baksa tongma borokrokno khaknwi khe swkak kha tei merarok, punrok mal-matarok tei mangingangroknobo haino swkak kha,

⁸ bo hai hwnwi uansuk kha, “bodol kaisano swprak phaisani tei kaisa bodol khárwi mannai.”

⁹ Aphuru khe Jakob hai hwnwi sa kha, “O ani chuchu Abrahamni Kaitor tei apha Isakni Kaitor, ‘nini sakni ha-o tei sakni borokrokni thani kiphilwi tháng di, ang nini kaham khlainai’ hwnwi ano sanai Subraiyung;

¹⁰ ang le nini Khairokma tei sói khe naijakna chúk ya, nini seleng se, raidang kongsa simi yago khe nongkhorwi Jordan lái thángma se, tabuk ani bodol kwnwi wng kha.

¹¹ Ani takhuk Esauni yakni ano phiyók ja di hwnwi ang suri ja-o, tamni hwnma le bo chwngno swpragwi chwngno bebakno sokomorwi páinai tei bwrwi bwsa chwrai bwsarokno buda butharwi páilangno hwnwi, ang kiri-o.”

¹² Tamo khe nwng, “Ang nini kaham khlainai tei nini bosong twijlangni hasing hai khe ernai, abono lekhaui pái rwi man glak” o kókbo sa kha.

¹³ A horo bo arono tong kha tei bini takhuk Esauni bagwi bini aro tongmarokni bisingni’-no,

¹⁴ makranwi punjwk tei mak chinwi punjua, makranwi merajwk tei mak chinwi mera chwla,

¹⁵ mak thamchi abuktwi rwnai mangingang tei abórokni bwsa, mak brwichi musuk bwrwi tei mak chi musuk chwla, mak nwichi korai chirka bwrwi tei mak chi korai chirka chwlano saiwi na kha.

¹⁶ Bo abórokno gut gut khe khak kha, kaisa kaisa gutni bagwi khoroksa khoroksa selengno barja berwi rw kha. Bo bórokno hai hwnwi sa kha, “Ani slái swkang swkang tháng lai di, kaisa gut bai tei kaisa gutno hakchal khe béng di.”

¹⁷ Bo swkangni a selengno hai hwnwi dagiui sa kha, “Ani takhuk nwng bai malaiwi ‘Norokni nokphang sabo tei buro thángnai? Tei o mal-matarok saboni’ hwnwi sẃng khe

¹⁸ nwng hai hwnwi sa di ‘omorok nini seleng Jakobni se; bo omorokno bini bugra Esauno se hili rohoro; tei bo chini uklogo khe phaiwi tongo.’ ”

¹⁹ Aboni ulninobo abo hai’-no dagiui sa kha tei kubun mal-matarokni barja gwnangroknobo hai hwnwi sa kha, “Omo haino norok Esau bai malai khe ma sanai,

²⁰ haibo hwnwi sa di, ‘nini seleng Jakob chini uldrobo’-no phaiwi tongo.’ Tamni hwn ba bo uansuk kha, ‘Ang omo hilirok bai bini bwkhano methebwi mannai, bo ano yachagwi phano mano.’ ”

²¹ Hakhe bo bini slái swkango hilirok rwui rohor kha tei a horo bo a bini ríni nogono tong rwk kha.

Jakob Penielo sólaimani

²² A horo’-no Jakob bachaui bihik khoroknwino tei khoroknwi selengjwkrok phiya khorokchisa bwsarokno tẃiwi Jabok twimano bárwi tháng kha.

²³ Abórokno twi bár rwui rohor baiwi bo bini tong kwrwi tẃi bebakno rwui rohor kha.

²⁴ Tamo khe Jakob saichung uklogo tong rwk kha; hakhe borok khoroksa phaiwi bo bai aiyasak sólai phai kha.

²⁵ A borok nai ba Jakobno mechenwi se man ya wngwi tong kha, hakhe bo bini yaphungni jorani bekrengo yak koson kha, hakhe sólaiwi tong phuru’-no Jakobni yaphungni jora báiwi tháng kha.

²⁶ Aphuru khe a borok hai hwnwi sa kha, “Ano yakar di, sal pasaui tong kha.” Hakhe Jakob hai hwnwi sa kha, “Nwng ano hamari rw ya sak ang nono yakar ya.”

²⁷ Hakhe a borok “Nini mung tamo” hwnwi sẃng khe “Jakob” hwnwi bo sa kha.

²⁸ A borok hai hwnwi sa kha, “Nini mung tei Jakob wng glak kha, Nwng Kaitor bai tei borok bai choba khlaiwi mungnwio’-no pái kha, aboni bagwi nini mung Israil wngnai.”

²⁹ Hakhe Jakob bono hai hwnwi sẃng kha, “Nini mung le tamo ano sa ja di.” Tamo khe bo hai hwnwi sa kha, “Nwng tamo ani mung sinani muchung?” Hakhe bo Jakobno hamari rw kha.

³⁰ “Ang dak-dak khe mokol baithang Kaitorno nugwibo ang kwthang tong kha” aboni bagwi Jakob abono Peniel hwnwi mung phar kha.

³¹ Jakob Penuelni kutul khe’-no sal kasa kha tei bo bini yaphungni bagwi khorabe khorabe khe ma him kha.

³² Tabuk jorabo Israilrok yaphungni jorani bahanno chá ya; tamni hwn ba Jakob le a yaphung jora’-ono swprakjago.