YAPHANG 30 - Kok Borok (Re-edited) Bible (BSI)

¹ Rahel Jakobni bagwi bwsa man li ya wngwi bibino músú kha; tei Jakobno hai hwnwi sa kha, “Ano bwsa rw di, wng ya khe ang thwi sinai!”

² Jakob Rahelno jolijagwi hai hwnwi sa kha, “Ang ba Kaitor da tamo, nono bwsa man ya khlainai?”

³ Hakhe bo hai hwnwi sa kha, “Iko ani selengjwk Bilha bini thani tháng di, bo ani bagwi bwsa man khe ang buma wngwi mannai.”

⁴ Hakhe bo bini selengjwk Bilhano hik songna bagwi rw kha tei Jakob bo bai thu kha chá kha.

⁵ Bilha sakderiya wngwi Jakobni bagwi sajla khoroksa bá kha.

⁶ Hakhe Rahel hai hwnwi sa kha, “Kaitor ano sói khe buj khlai kha tei ani khorang khnaui ano sajla khoroksa rw kha”; Hakhe bo bono Dan hwnwi mung phar kha.

⁷ Rahelni selengjwk sakderiya wngwi Jakobni bagwi tei khoroksa bwsa bá phi kha.

⁸ Hakhe Rahel hai hwnwi sa kha, “Ang belai kwrak khe ani bukhuk bai ma nang lai kha tei ang pái kha”; hakhe bo bono Naptali hwnwi mung phar kha.

⁹ Lea bwsa thak kha hwnwi saui man kheno bo bini selengjwk Jilpano bwsai Jakobno hik song di hwnwi rw kha.

¹⁰ Hakhe Leani selengjwk Jilpa Jakobni bagwi chwla bwsa khoroksa man kha.

¹¹ Tei Lea hai hwnwi sa kha, “Ani talikha kaham!” hakhe bo bono Gad hwnwi mung phar kha.

¹² Leani selengjwk Jilpa tei khoroksa chwla bwsa bá phi kha.

¹³ Lea hai hwnwi sa kha, “Ang bwkha tongthok kha! tamni hwn ba bwrwirok ano tongthokjak hwnnai”; hakhe bo bono Aser hwnwi mung phar kha.

¹⁴ Gom ramani jora-o Ruben gom bwlwngo thángwi bo Duaim manẃi buma Leani thani tubu-ui rw phai kha. Rahel Leano hai hwnwi sa kha, “Nwslani Duaimno ano kisa rw ja di.”

¹⁵ Hakhe Lea hai hwnwi sa kha, “Nwng ani bwsaino na kha, omoba kisa-misani kók diba? Tabuk nwng ani sajlani Duaimnobo segwi naui páinai hai da?” Rahel hai hwnwi sa kha, “Nwng nwslani Duaimno ano rw khe, nwng tini horo Jakob bai thu-ui mano.”

¹⁶ Jakob sarigo habani phai khe’-no Lea thángwi bo bai malaiwi hai hwnwi sa kha, “Nwng tini horo ang bai se ma thu phainai, tamni hwn khe ang nono ani sajlani Duaim bai paiwi na kha,” hakhe bo a horo bo bai thu kha.

¹⁷ Kaitor Leani Surimano khna kha, hakhe bo sakderiya wngwi Jakobni bagwi chwla bwsa khoroksa bá kha tei abo bai bwsa khorokba wng kha.

¹⁸ Lea hai hwnwi sa kha, “Kaitor ani manthai rw kha, tamni hwn ba ang ani selengjwkno ani bwsaino rw kha”; hakhe bo bono Isakar hwnwi mung phar kha.

¹⁹ Lea sakderiya wngwi tei khoroksa chwla bwsa bá-u kha, abo khorokdok klai-o.

²⁰ Bo hai hwnwi sa kha, “Kaitor ano hili kaham rw kha, tabuk angsai ano bórom khlai sinai, tamni hwn khe ang bini bagwi chwla bwsa khorokdok bá kha”; hakhe bo bono Jebulun hwnwi mung phar kha.

²¹ Ulo khe bo tei khoroksa bwsa bwrwi bá kha bini mung khe Dina hwnwi phar kha.

²² Hakhe Kaitor Rahelno muitu khlai kha tei Kaitor bo ringmano khnaui bini khum kiyok rw kha.

²³ Bo sakderiya wngwi chwla bwsa khoroksa bá kha tei hai hwnwi sa kha, “Kaitor ani lachimungno norwi pái kha.”

²⁴ Hakhe bo bono Josep hwnwi mung phar kha tei hai hwnwi sa kha “Subraiyung ano tei khoroksa chwla bwsa rw ja thung!”

Jakob Laban bai kók báng laimani

²⁵ Rahel Josepno bámani ulo khe, Jakob Labanno hai hwnwi sa kha, “Ani sakni ha-o, sakni nogo thángna bagwi ano yakarwi rwui rohor si di.

²⁶ Ani hiksongno tei ani bwsarokno ano rw si di, ang bórokni bagwi se nini oro samung tangwi tongo, ang tháng sinai. Nwng saui mano ang bwswk khe nono mon kha.”

²⁷ Tamo khe Laban bono hai hwnwi sa kha, “Nwng ano sa di hwn khe ang diyari ka rwui saui man kha Subraiyung ano nini bagwi hamari rw kha;

²⁸ nini dormai bwswk ano sa di ang abono rwui rwnai.”

²⁹ Jakob bono hai hwnwi sa kha, “Nwng sak’-no si-o ang nono bwswk khe mon kha tei nini mal-matarok ang mwrwk phuru er kha abo nwng’-no si-o.

³⁰ Swkango ang phai ya sini nini kisicha se tongmani ang phaiwi se nini abórok aswk kwbáng khe ero, ang tháng thani’-no Subraiyung nono hamari rw kha. Hakhe buphuru ba ang ani núkhungni bagwi khati sinai?”

³¹ Bo hai hwnwi sa kha “Ang nono tamo rwnai?” Jakob hai hwnwi sa kha, “Nwng ano mungsa phano rwna nang glak; tumung nwng ani o kók bai lon khe ang mungsabo na ya, ang nini merarokno mwrwk phinai:

³² Tini ano nini mal-matarokni kwchar tẃi him rw di tei ang bebak mera kosomrokno tei merarokno, punroknibo bebak merengrokno tei mari gwnangrokno nanai. Abórok ani dormai wng si thung.

³³ Ang sói da sói ya nwng ani manthaino phaiwi nai phai khe’-no nuknai. Mereng ya tei mari gwnang punrok tei mera kosomrokno phaiwi ani oro nuk phai khe ano khok kha hwnwi nwng rom si di.”

³⁴ Laban hai hwnwi sa kha, “Ang soi-o, nwng sama hai’-no wng thung.”

³⁵ Tamo khe Laban a salo’-no bebak punjua mereng tei brang brang mari gwnang tei bebak puma mereng mari gwnangrokno tei kuphur gwnangrokno nor kha, bo mera kosomroknobo nor kha; bo bwslasongno abórokni barja ber kha;

³⁶ aboni ulo khe a mal-matarokno tẃiwi salthamni lama hakchalo thángwi Jakobni aroni tháng kha. Jakob Labanni tei tongma merarokno mwrwk kha.

³⁷ Aphuru khe Jakob poplarni almon tei plan buphangrokni bedek kwthang naui abórokno bukur khugwi latha kuphur khlai kha tei belengtwi kuphur kari kha tei.

³⁸ Bo a bukur khukma dangrokno a merarokno twi khan rwma jidoloni twilamo khe ton kha, ayang tẃi twi kochokkhlaiwi phai-o. Bórok aro twi nung laina kuthum lai phai phuru khe merarok ogo bwsa wngo,

³⁹ hakhe a dangrokni bwskango ogo chunairokni bwsarok achai khe brang brang mari metrengrok tei merengrok bá o.

⁴⁰ Ulo Jakob a mera bwsarokno khagwi tono tei pun mera bodolrokno Labanni mereng tei kosom mera punrokni phaising; tei bo saknino khe Labanni bodol bai ton yaui khagwi tono.

⁴¹ Mera bodolni raktho raktho merarok ogo chu laima jora-o khe mera bodolrokni bwskango khe a dangrokno twilamni búkhúgo khe tono,

⁴² tamo khe mera bodolrokni kebel kebel merarok ogo chu laima jora-o khe abono aro ton ya; hakhe raktho rakthorok khe merarok khe Jakobni tei kebel kebelrok khe Labanni wngo.

⁴³ Hakhe Jakob belai khe cha sa khe, bini mal-matarok selengrok, selengjwkrok, mangingangrok korai chirkarok kwbángma wng kha.