YAPHANG 29 - Kok Borok (Re-edited) Bible (BSI)

Jakob Labanni nogo sógwimani

¹ Hakhe Jakob thángte thángte salkabaini borokrok tongmani ha-o sók phai kha.

² Bo aro hapharo twikhor khorsa nuk kha, abono kiting laiwi mera bodol kwthamrok roko laijak; aroni’-no merarokno twi khanjago. Twikhor khe holong bai khe kholopjak,

³ bebak mera bodolrok aro sók phai khe mera mwrwknairok o holongno norwi merarokno twi khano; aboni ulo khe abono kholobwi ton phiro.

⁴ Jakob mera mwrwknairokno hai hwnwi sẃng kha, “Takhukrok norok buroni wng bai kha?” Hakhe bórok “Chwng Haranni se” hwnwi sa kha.

⁵ Bo bórokno hai hwnwi sẃng kha, “Norok Nahorni bwsla Labanno si da sini?” Hakhe bórok “I’n chwng sini-o” hwnwi sa lai kha.

⁶ Bo bórokno hai hwnwi sa kha, “Bo kaham kwrwngda tong?” Bórok sa kha, “I’n bo kaham kwrwngno tongo; iko naisik di bwsajwk Rahel merarok bai baksa phaiwi tongo!”

⁷ Bo hai hwnwi sa kha, “Nai di tabukbo sal kolokma tong kho, tabuk merarokno thumna jora wng ya kho; merarokno twi khanwi mwrwgwi phi di.”

⁸ Tamo khe bórok hai hwnwi sa kha, “Mera bodolrok bebakno kwrẃngsa khe kuthum khe se chwng twikhor kholopma holongno noro; hai khe se merarokno twi khano.”

⁹ Bo bórok bai kók sa laiwi tong phuru Rahel buphani merarokno tubu-ui phai kha; tamni hwn ba bo buphani merarokno mwrwgo.

¹⁰ Aphuru khe Jakob bini bumani takhuk Labanni bwsajwk Rahelno nuk khe, bo bumani takhuk Labanni merarokno tubu-ui phai kha, hakhe Jakob thángwi a twikhorni kholopma holongno norwi bumani takhuk Labanni merarokno twi khan kha.

¹¹ Hakhe Jakob Rahelno motom su-ui khorang kotor khe kap kha.

¹² Jakob Rahelno bo bini buphani jaiti, Rebekani bwsla se hwnwi sa kha; hakhe bo khachigwi thángwi buphano saui kha.

¹³ Laban bini bukhukni bwsla Jakobni kókno khna kheno bo bo bai malaina khachigwi tháng kha, hakhe malaiwi kwbagwi motom su kha tei nogo tubu-ui phai kha. Jakob Labanno bebak kókrokno sa bai khe,

¹⁴ Laban bono hai hwnwi sa kha, “Nwng sói ani bahan-bwthẃi se!” Hakhe bo bo bai talsa tong kha.

Jakob Rahel tei Leani bagwi Labanno monmani

¹⁵ Aphuru khe Laban Jakobno hai hwnwi sa kha, “Nwng ani sandai ba, nwng ano hai’-no da monthai klai ba? Sa di nini mula bwswk wngnai?”

¹⁶ Labanni bwsajwksong khoroknwi tongo; okrani mung khe Lea tei kusuni mung khe Rahel.

¹⁷ Leani khe mokol naithok ya tamo khe Rahel khe sakduk tei bwrwibo naithok.

¹⁸ Jakob khe Rahelno hamjago; hakhe bo hai hwnwi sa kha, “Ang nwsajwk kusu Rahelni bagwi nokha bisi sni nono monwi tongnai.”

¹⁹ Hakhe, Laban hai hwnwi sa kha “Kubun chwlano rwmani slái nono rwmani’-no ham kugo; ang bai’-no tong di.”

²⁰ Hakhe, Jakob nokha bisi sni Rahelni bagwi monwi tong kha, bo bono aswk hamjakmani bagwi aswk salno sal kisicha se wngjak si-o.

²¹ Hakhe Jakob Labanno hai hwnwi sa kha, “Ani bwrwino ano rw si di, ang bono tẃiwi tong sinai, ang kók khamani jora pái kha.”

²² Hakhe Laban aroni bebak borokrokno thum kha tei chámung panda kaisa khlai kha.

²³ Tamo khe Laban sal tháng khe Leano Jakobni thani tubu-ui rw phai kha; tei Jakob bo bai thu kha.

²⁴ (Laban Jilpano bwsajwk Leani selengjwk wngna bagwi rw kha.)

²⁵ Phung ai khe nuk kha abo Lea se; aphuru khe Jakob Labanno sa kha, “Nwng omo ano tamo khlai lang? Nwng tamo ano bandi lang? ang Rahelni bagwi monma ya diba?”

²⁶ Laban sa kha, “Chini o ha-o okrano kái yaui kusuno káiwi man ya.

²⁷ Omo bai nokha salsni pung gra di, ano tei nokha bisisni mon khe ang nono tei khoroksanobo rwnai.”

²⁸ Jakobbo ahai’-no khlai kha, bini salsnino supung khe, Laban bono bwsajwk Rahelno kái rw kha.

²⁹ (Laban Bilhano bwsajwk Rahelni bagwi selengjwk rw kha.)

³⁰ Hakhe Jakob Rahel baibo thu kha, bo Rahelno Leani slái hamjak kuk kha, phiya Labanno tei nokha bisi sni monwi tong kha.

Jakobni núkhungo chwrai achaimani

³¹ Subraiyung Leano norjagwi tongma nuk kha, hakhe Bo bono bwsa man rw kha. Rahel khe banji wng kha.

³² Lea sakderiya wngwi chwla bwsa khoroksa bá kha tei bo bono Ruben hwnwi mung phar kha; tamni hwn ba Lea sa kha, “Subraiyung ang sátokjakmano nuk kha; tabuk le ani angsai sói khe ano hamjaknai.”

³³ Bo hai’-no hai sakderiya wngwi tei khoroksa chwla bwsa bá khua; hakhe bo hai hwnwi sa kha, “Ang norjakmano Subraiyung khna kha, bo ano o bwsanobo rw kha”; tei bo bini mung Simion hwnwi phar kha.

³⁴ Haino hai bo sakderiya wngwi tei khoroksa chwla bwsa bá phi kha; hakhe bo hai hwnwi sa kha, “Tabuk le ani angsai ang bai tong sinai, tamni hwn ba ang bini bagwi chwla bwsa khoroktham bá kha”; aboni bagwi bini mung Lebi wngnai.

³⁵ Haino hai bo sakderiya wngwi chwla bwsa khoroksa bá phi kha, hakhe hai hwnwi sa kha, “Tabuk le ang Subraiyungno lob sinai”, aboni bagwi bo bono Juda hwnwi mung phar kha; hakhe bo bwsa thak kha.