YAPHANG 28 - Kok Borok (Re-edited) Bible (BSI)

¹ Hakhe Isak Jakobno ringhorwi hamari rw kha tei hai hwnwi sa kha, “Nwng khoroksa Kananjwkno phano ta káijak di.

² Bachaui Padan-aramo nwmani bupha Bethuelni nogo tháng di; aroni’-no nwmani bwta Labanni bwsajwk khoroksa swkno káijagwi di.

³ Kwplaisa Kaitornono lukurokni bodol wngwi manna tẃi khe tei dopha kwbángmani bupha wngna bagwi hamari rw thung tei bwsa kwbángma rw thung.

⁴ Kaitor Abrahamno rwmani ha nwng tongwi tongmani hano mannani hamari nono tei nini bosongno rw thung!”

⁵ Abo hai khe Isak Jakobno rwui rohor kha; bo Padan-aramni Labanni aro tháng kha, bo wng kha Bethuelni bwsla Aramsa, Jakob bai Esauni buma Rebekani bwta.

Esau tei khoroksa bwrwi káijakmani

⁶ Esau nuk kha, Isak Jakobno hamari rwui Padan-aramo thángwi aroni bwrwino káijak di hwnwi sa phuru-o hai hwnwi sa kha, “Nwng Kananni khoroksa swk bwrwi bai phano ta káijak di,”

⁷ tei Jakob bo bupha bai bumani kók khnaui Padan-aramo tháng kha.

⁸ Hakhe Esau bupha Isak Kananjwkno khá phurjak ya nuk kha,

⁹ Esau Ismaelni thani thángwi bini bwrwino karwi tei khoroksa bwrwi na phi kha, bini tongma hikno karwi Abrahamni bwsla Ismaelni bwsajwk Mahalatno káijak kha, bo Nebaiotni bahanok.

Jakob Bethelo imang nukmani

¹⁰ Jakob Birsebani nongkhorwi Haran bwkhak lam rw kha.

¹¹ Bo kwrẃngsa-o phai sók phai khe sal hap kha, horo arono tong kha, bo aroni holongdap dulsa naui aro’-no kobongwi rokoui muktrwi tháng kha.

¹² Hakhe bo imango yakhili kaisa ha saka-o songchajak nuk kha, abo chuknoha-o nangwijak; hakhe nai di Kaitorni suarirok aboni saka-o kasa lai-o tei nongkhor lai-o khe tong lai-o!

¹³ Hakhe nai di Subraiyung aboni saka-o bachajak khe hai hwnwi sa kha, “Ang nwpha Abrahamni Subraiyung Kaitor tei Isakni Kaitor; nwng rokoui tongmani o hano ang nono tei nini bosongrokno rwnai;

¹⁴ tei nini bosongrok ha sakani hadlwi hai khe bángnai tei nini bosongrok salkabai, salthángbai tei salgrabai salsibai bwkhak bórokni hano phuarnai. Hakhe nini bising tẃi’-no nini bosongrokni bising tẃi khe ha sakani bebak dopharokno hamari rwnai.

¹⁵ Nai di, ang nwng bai tongo nwng tháng thani’-no ang nono hamyani kati rwui tonnai. Ang nono o ha-ono ha-o kiphilwi tubu phinai. Ang nono samarok khlai pái yasak’-no ang nono yakar glak.”

¹⁶ Jakob thumani sichaui hai hwnwi sa kha, “Kubui’-no Subraiyung oro tongo; ang omono saui man li ya.”

¹⁷ Hakhe bo kirijagwi hai hwnwi sa kha, “Omo bwswk kirimasingcha! Omo Kaitorni nok wng ya wng glak; omono chuknohani duglam wng kha.”

¹⁸ Hakhe Jakob teini phung aidrobo bacha kha tei bo kobongmani a holongno thongla kuchuk snamwi aboni saka-o thok lu-ui rw kha.

¹⁹ Tei bo aboni mung “Bethel” hwnwi phar kha; tamo khe swkango a kamiyungni mung Luj se tongmani.

²⁰ Jakob Subraiyungni mungwi swmai tangwi hai hwnwi sa kha, “Tumung ang ani lama tháng thani-o Kaitor ang bai baksa tongwi ano hamyani kati rwui tong khe tei kanmung, chámungrok rw khe,

²¹ phiya ang kaham kwrwng khe aphani nogo kiphilwi man khe nwng ani Kaitor wngnai,

²² tei o holong thongla ang tisama Kaitorni nok wngnai; tei nwng ano rwmarokni bebakni’-no, ang chi-o kaisa rwnai.”