YAPHANG 21 - Kok Borok (Re-edited) Bible (BSI)

Isak achaimani

¹ Subraiyung kók sa langma tẃi’-no Sara bai malai phai kha tei swmai tangma tẃi’-no bo Sarani bagwi khlai kha.

² Sara ogo bwsa wng kha tei Kaitor bono samani jora’-ono a chakra umor phuru Abrahamni bagwi chwla bwsa bá kha.

³ Abrahamni bagwi Sara bámani a chwla bwsano Isak hwnwi mung phar kha.

⁴ Kaitor bono dagima hai kheno, Abraham bwsla Isakno achaiwi nokha salcharo sakur ra kha.

⁵ Bwsla Isak achai phuru Abrahamni umor nokha bisi sara ká kha.

⁶ Sara hai hwnwi sa kha, “Kaitor ano mwnwimung khlai kha; ani o kókno khnanairok le bebakno ano mwnwinai.”

⁷ Bo hai hwnwi sa kha, “Abrahamno sabo Sara bwsano abuk chá rwnai hwnwi sa kha mun? Hai phano bini umor chakrajak phano ang bini bagwi chwla bwsa khoroksa bá kha.”

⁸ A chwrai tor kha tei abuk yakar khe Abraham, Isak abuk yakarmani salo chámung panda kotor kaisa khlai kha.

Hagar bai Ismael nokni tikhlaijakmani

⁹ Salsa, Sara bwsla Isakno Ijipjwkma Hagar Abrahamni bagwi chwla bwsa bámani a chwraisano Isak bai khe thwng laiwi tongmano nuk kha.

¹⁰ Hakhe Sara, Abrahamno hai hwnwi sa kha, “O selengjwkmano bwsa bai khe tikhlai rohor di; tamni hwn ba o selengjwkmani bwsla ani angsajla Isak bai baksa buphani manthai bantano man glak.”

¹¹ Omo belai kheno Abrahamni bwkha-o nang kha tamni hwn khe, Ismaelbo bini’-no bwsa ba.

¹² Tamo khe, Kaitor Abrahamno hai hwnwi sa kha, “Nwng a chwraini bagwi tei nini selengjwkmani bagwi bwkha hamya ta wng di, Sara nono samani hai’-no nwng khlai di, tamni hwn ba Isakni bising tẃi se nini bosongni mung pharjaknai.

¹³ Tei selengjwkmani bwsani bosongnobo ang dopha snamnai, tamni hwn ba bo’-bo nini’-no bwsa.”

¹⁴ Hakhe Abraham phung aidrobo bachaui chámung tei bukurni twi dajaknai-o twi daui Hagarno rw kha, bo bwsano phikungo bárwi rwui rohor kha. Hagar lam rwui thángwi Birsebani hasinglwng bwkhak tháng kha.

¹⁵ Bukurni twi tonjaknaini a twi pái khe Hagar a chwraino jabralwngni saklomo klangwi tháng kha.

¹⁶ Aboni ulo khe bo thángwi kisa hakchalo achugwi tongwi kha, abo chalmani koslu kusungsa kok hórwi man anw; hakhe bo hai hwnwi sa kha, “O chwrai thwimano ang mokol baithang bahai khe nainai.” Bo bwsani bwkhak khe achugwi tong phuru a chwrai khorang torsaui kap kha.

¹⁷ Kaitor a chwraini khorangno khna kha; tei Kaitorni suari chuknoha-o tong twtwi Hagarno hai hwnwi sakhlai kha, “Nini tamo dukhu tong Hagar? Ta kiri di; Kaitor a chwrai tongmani aroni bini khorangno khna kha.

¹⁸ Bacha di, a chwraino nini yak bai kwbaksaui bam di; tamni hwn ba ang bono dopha kotor snamnai.”

¹⁹ Kaitor bini mokol nuk rw kha hakhe samo’-no twikhor khorsa nuk kha tei bo aro thángwi a bukurni twi dajaknaino twi supungwi tubu-ui bwslano khan kha.

²⁰ Kaitor a chwrai bai tong kha tei chwraibo torsa kha; bo hasinglwngo tong kha tei belai’-no badukhung kwrwng wng kha.

²¹ Bo Paranni hasinglwngo tong kha tei buma bini hik khlaina bagwi ha Ijipni bwrwino tubu kha.

Abraham bai Abimelek kók kha laimani

²² A jora-o Abimelek bini sengkrak bokhorok Phikol bai khe thángwi Abrahamno hai hwnwi saui kha, “Kaitor nini bebak samungo’-no tongo;

²³ hakhe Kaitorni bwskango swmai tang di, nwng ano ani bwsarokno eba ani bosongrokno bandi glak. Ang nono bórom khlaiwi phai kha, abo bai’-no swmai tangwi sa di nwng’-bo ano tei nwng tabuk tongmani o hano bórom khlai tongnai.”

²⁴ “I’n ang tangnai,” hwnwi Abraham sa kha.

²⁵ Abraham, Abimelekni selengrok bini twikhor segwi namani kókno sa khe,

²⁶ Abimelek hai hwnwi sa kha, “Omo sabo khlai kha ang saui man ya; nwngbo ano sa ya kho ba, ang o kókno tini jora khw se khna ya kho.”

²⁷ Hakhe Abraham mera tei musuk chwlarokno Abimelekno rw kha tei o khoroknwirok swmai kaisa tang lai kha.

²⁸ Abraham mera bwrwi mak snino bodolni khak kha.

²⁹ Hakhe Abimelek Abrahamno hai hwnwi sẃng kha, “Nwng tamo o mera bwrwi mak snino bodolni khakma le tamni bagwi sla?”

³⁰ Bo hai hwnwi sa kha, “O mera bwrwi mak sni bodolni khakma merano nwng ani yakni yachak di, omo bai’-no ang’-no o twikhor khurmani nwng mokol baithang nukmani mari wngnai.”

³¹ Aboni bagwino abo Birseba hwnjago; tamni hwn ba oro’-no a khoroknwirok swmai tang lai-o.

³² Hakhe bórok Birseba-o swmai tang lai kha. Aboni ulo khe Abimelek bini sengkrak bokhorok Phikolno tẃiwi bini ha Philistia-o kiphilwi tháng kha.

³³ Abraham a Birseba-o Tamarisk buphang káiwi Mol brúmni Kaitorno khulumo.

³⁴ Hakhe Abraham ha Philistia-o sal kwdwkma tong kha.