YAPHANG 2 - Kok Borok (Re-edited) Bible (BSI)

¹ Omo hai khe nokharokno tei hayungno tei aro bebak tongmarokno snam bai kha.

² Salsnini salo khe Kaitor bini a snammani samungrok pái kha. Bo bebak tangmani thagwi salsnini salo khe lengla kha.

³ Bo salsnini salno hamari rw kha tei juda khe khak kha, tamni hwn ba Kaitor a salo bebak samung tangma mwthagwi lenglama sal.

⁴ Omo hai khe’-no o nokharok tei hayung snammani láibuma. Subraiyung Kaitor nokha tei hayungno snam phuru

Eden Tháiblwng

⁵ ha saka-o buphang-uáphang mungsabo kwrwi kho, mungsa bwchlwibo pekhrup ya kho, tamni hwn ba Subraiyung Kaitor aphuru ha saka-o uatwi ua rw ya kho tei borok khoroksabo ha-o káimungrok kái ya kho;

⁶ tamo khe ha bisingni twi choromsaui hano misiui rw kha.

⁷ Aphuru khe Subraiyung Kaitor hani kisicha ha naui borokno tak kha tei bini bukungo subui mwthangnai rangma daui rw kha; hakhe borok kwthang wng kha.

⁸ Hakhe Subraiyung Kaitor salkabai-o Eden hwnwi tháiblwng kaisa snam kha; tei bo takma a borokno aro ton kha.

⁹ Bo aro naithok naithok tei kothok kothok bwthái buphangrok achai rw kha, tháiblwngni kwcharo khe langmani buphangno tei kaham hamya si rwnai Simaphangbo achai rw kha.

¹⁰ Eden tháiblwngni twima kaisa yorwi aro twi nang rw-o. Abo aro khakjagwi twima prak brwi wng kha.

¹¹ Swkangni kaisani mung khe Pison; abo Habilani bebak saka tẃi yorjak, aro rangchak tongo;

¹² a hani rangchak kaham; thok motom tei holong kaham monirokbo aro tongo.

¹³ Tei kaisa twimani mung khe Gihon, abo ha Kus gwnangwi yoro.

¹⁴ Tei kaisa twimani mung khe Taigris, abo Asiriyani salkabai tẃi yoro. Phiya tei kaisa khe Uphratis.

¹⁵ Subraiyung Kaitor a borokno tubu-ui Eden tháiblwng muphunna bagwi tei mwrwkna bagwi ton kha.

¹⁶ Subraiyung Kaitor a borokno hai hwnwi dagiui sa kha, “Nwng o tháiblwngni bebak buphangni bwtháino cháui mano,

¹⁷ tamo khe kaham hamya si rwnai buphangni bwtháino le ta chá di, tamni hwn khe nwng abono chámani salo’-no thwinai.”

¹⁸ Aphuru khe Subraiyung Kaitor hai hwnwi sa kha, “Borok saichung susuk khe tongmani hamya; ang bo bai mwchang rwui bono chubanai khoroksa snamnai.”

¹⁹ Hakhe Subraiyung Kaitor ha naui ha sakani bebak mal-matarokno tei nokhani bebak toksa-toluarokno snam kha hakhe mung pharna bagwi bini thani tubu kha.

²⁰ A borok bebak mal-matarokno toksa-toluarokno tei bolongni manwirokno mung phar kha; tamo khe abórokni bisingo kaisabo bono chubana bagwi bini mángsong mwchang li ya.

²¹ Hakhe Subraiyung Kaitor a borokno sila charwi muktrwi tháng rw kha tei a borokni barani bekreng kongsa na kha tei abono bahan bai ból kha,

²² Subraiyung Kaitor a borokni barani bekreng bai bwrwi khoroksa snamwi a borokni thani tubu kha.

²³ Hakhe a borok hai hwnwi sa kha, “Páithago omo ani bekrengni bekreng tei ani bahanni bahan; bini mung Bwrwi wngnai, tamni hwn ba bo chwlani aroni karijakma se.”

²⁴ Aboni bagwi’-no borok ma-pha bai kagwi bini hik bai thansa wngo tei bórok mang kaisa wngo.

²⁵ Hakhe a chwla bai bihik khoroknwi’-no sago rí kwrwi tei labo lachi lai ya.