YAPHANG 18 - Kok Borok (Re-edited) Bible (BSI)

Abrahamno chwla bwsa rwnani kók rwmani

¹ Mamreni Uk buphangrok tong thani-o bo tong phuru Subraiyung bo bai nukjak kha, salni tung kukma jora-o aphuru bo bini rí nokni duglamo achugwi tongo.

² Bo naisigwi naiwi nuk kha, bini bwskango chwlaktham borok bacha laijak. Bórokno nuk’-kheno bo rínokni duglamni nongkhorwi thángwi bórok bai malaina tháng kha tei ha-o bolokhógwi khulumui

³ hai hwnwi sa kha, “Ani bugra, ano nwng khá phur khe, nini o selengno hai’-no lái ta tháng di.

⁴ Norokni yakung yak sú rwna bagwi twi kisa tubu grana; norok o buphang saklomo bathak laisok gra di,

⁵ nini selengni nogo yapri khiklai kha ba, ang norokni bagwi chámungbo kisa tubunai abo bai norok lama himnani phan man anw.” Hakhe bórok, “Nwng sama tẃi’-no khlai si di” hwnwi sa kha.

⁶ Abraham doui rínok bisingo habwi kha tei Sarano hai hwnwi sa kha, “Nwng dodro yakaktham moida kaham naui sapigwi kisa auang snam gra di.”

⁷ Hakhe Abraham doui musukrok ton thani tháng kha tei milik kuphung musuk bwsa masa romwi tubu-ui selengno rw phai kha; bo abono doui kwrak kha.

⁸ Hakhe bo a muihan sóngjakno, doi bai dutno bórokno rw phai kha; hakhe bo bórok chá laiwi tong phuru buphang saklomo bórokni samo bachaui tong kha.

⁹ Bórok bono hai hwnwi sẃng kha, “Nini nihik Sara le buko biyang?” “Bo rínok bisingo se,” hwnwi bo sa kha.

¹⁰ Subraiyung hai hwnwi sa kha, “Ang nini thani sachlang jora-o sók phai phinai, nini nihik Sara chwla bwsa khoroksa mannai.” Aphuru Sara rínokni duglamni ayang naro tong twtwi khnaui tongo.

¹¹ Aphuru Abraham bai Sara chakrajak tei Sarabo bini rí thakjak.

¹² Hakhe Sara saichung saichung mwnwiwi hai hwnwi sa kha, “Ang tabuk chakra súgwi tháng kha tei ani bwsaibo haino chakra wng kha, ang tei khá da khatung sino?”

¹³ Subraiyung Abrahamno hai hwnwi sa kha, “Tamo Sara mwnwiwi ‘Ang tabuk aswk chakraui bwsa da manno kho, hwnwi sa?’

¹⁴ Subraiyung khlaiwi man ya omo hai mungsa phano to de tong ba? chongjak jora’-ono ang nini thani phainai, sachlang jora-o khe Sara chwla bwsa khoroksa mannai.”

¹⁵ Tamo khe Sara gosi li ya tei “Ang mwnwi ya ble” hwnwi sa kha, tamni hwn ba bo kirijak kha. Tamo khe bo hai hwnwi sa kha, “I’nhi nwng kubui’-no mwnwi kha.”

Abraham Sodomni bagwi koimani

¹⁶ Hakhe a borokrok aroni lam rwui tháng lai kha tei bórok Sodom bwkhak nahar lai kha, phiya Abraham bórokno tunna bagwi bórok bai baksa tháng kha.

¹⁷ Tei Subraiyung hai hwnwi sa kha, “Ang khlaina naiwi tongmano Abrahamno khogwi tonnai hai da?

¹⁸ Bini bosongrok kotor wngnai tei dopha kwrak wngnai tei bini bising tẃi khe swngcharni bebak dopharokno ang hamari rwnai;

¹⁹ I’nhi ang bono chong kha, bo bini bwsarokno tei bini bosongrokno ani kók nanani bagwi tei samung sói khlaina, bujsói tẃinano dagi rwna bagwi se ang chongo; bórok abo hai khe khlai khe Subraiyung Abraham khlaina hwnwi swmai tangma tẃi’-no bini bagwi khlainai.”

²⁰ Hakhe Subraiyung hai hwnwi sa kha, “Sodomni tei Gomorani bagwi belai’-no kók hamya tongo, bórokni sumsok belai’-no báng kha.

²¹ Bórok bebakno da ang hwnma hai’-no khlai bai kha, ang thángwi naiwi sinai. Tei abo swk da abo swk ya, ang sinai.”

²² Hakhe a borokrok aroni nongkhorwi Sodom bwkhak tháng lai kha; phiya Abraham khe Subraiyungni bwskango bachaui’-no tong kha.

²³ Hakhe Abraham samo thángwi hai hwnwi sa kha, “Nwng borok hamyarok bai baksa borok kahamroknobo de sokomornai?

²⁴ Rom di, kamiyungo khorokbachi borok kaham tongo; hakhe nwng aro tongnai a borok khorokbachirokni bagwi a kamiyungno narwk glak da?

²⁵ Nwng kubui’-no borok sutrangrokno borok hamyarok bai baksa le buthar glak. Borok kahamrokno borok hamyarok bai baksa khe le nwng nuk glak! O bebak hano buj thumnaisa sói khe’-no buj thum glak diba?”

²⁶ Hakhe Subraiyung hai hwnwi sa kha, “Tumungno Ang Sodomni kamiyungo khorokbachi borok kaham nuk khe, a borokni bagwi a bebak kamiyungno mwthangnai.”

²⁷ Abraham hai hwnwi sa phi kha, “Subrai ang sak baithangno ma sa phiro, nai di ang le mungsabu ya hadlwi tei thapla ja se.

²⁸ Rom di, borok khorokbachi kánani bagwi aro tei khorokba borok’-no ká ya wng khe le? nwng a khorokba kwrwi wngwi, khorokbachi ká súk yani bagwi bebak kamiyungno sokomornai hai da?” Hakhe Kaitor hai hwnwi sa kha, “Aro borok khorokbrwichiba tong khe’-no ang sokomor glak.”

²⁹ Bo hai’-no hai hwnwi sa phi kha “Rom di aro borok khorokbrwichi simi borok kaham tong si-o.” Hakhe Kaitor hai hwnwi sa kha, “Aro borok kaham khorokbrwichi tong khe’-no ang sokomor glak.”

³⁰ Hakhe bo hai hwnwi sa-u kha “Subraiyung ta joli ja di, ang ma sa phiro. Rom di aro borok kaham khorokthamchi tong kha ta.” Kaitor hai hwnwi sa kha, “Ang aro borok khorokthamchi tong khe’-no abo hai khlai glak.”

³¹ Bo hai hwnwi sa kha, “Subraiyung ang nono kók sa phir ja-o. Aro khoroknwichi’-no tong kha ta.” Bo hai hwnwi sa kha, “Ang khoroknwichi borok kaham nuk khe’-no sokomor glak.”

³² Hakhe bo hai hwnwi sa kha “Subraiyung ta joli ja di ang tei uáisa’-no sa phi si anw. Aro borok kaham khorokchi’-no tong kha ta?” Bo hai hwnwi sa kha, “Aro khorokchi’-no borok kaham tong khe ang sokomor glak.”

³³ Abraham bai kók sa laiwi pái khe Subraiyung tháng kha; hakhe Abraham nogo kiphilwi phai kha.