YAPHANG 12 - Kok Borok (Re-edited) Bible (BSI)

Kaitor Abramno ringmani

¹ Subraiyung Abramno hai hwnwi sa kha, “Nwng nini sakni hano yakarwi sandai-masarokno tei nwphani nokno yakarwi ang nono phunukna hwnmani a ha-o tháng di.

² Hakhe ang nono dopha kotor snamnai, ang nono hamari rwnai, nini mungno kuchuk khlainai, omo hai khe nwng kaisa hamari wngnai.

³ Nono hamari rwnairokno ang hamari rwnai, tei nono swrainairokno ang swrainai; tei nini bising tẃi khe ha sakani bebak núkhungno ang hamari rwnai.”

⁴ Subraiyung tháng di hwnwi dagima tẃi’-no Abram tháng kha; tei Lotbo bo bai baksa tháng kha. Abram Haranni nongkhorwi tháng phuru bini umor nokha bisi snichiba ká kha.

⁵ Abram bihik Saraino tei bini takhukni bwsla Lotno tei bórok Haranno thummani bebak rang-mairok tei borokrokno tlangwi tháng lai kha; hakhe bórok ha Kananno thángna bagwi lam rw lai kha. Bórok ha Kananno phai khe,

⁶ Abram a ha tẃi lái phuru Sekemni More-o uk buphang tong thani bathago. A jora-o Kananni borokrok aro tong kho.

⁷ Aphuru Subraiyung Abramno nukjagwi hai hwnwi sa kha, “Nini bosongno ang o hano rwnai.” Hakhe bo bo bai nukjaknai Subraiyungni bagwi aro háyá kaisa snam kha.

⁸ Aboni ulo khe bo Bethelni salkabai hathái bwkhak kutulwi tháng kha tei Bethelni salthángbai-o tei Aini khe salkabai-o ríni nok tang kha, aro bo Subraiyungni bagwi háyá snam kha tei Subraiyungni mungno ring kha.

⁹ Aboni ulo khe Abram thángte-thángte ha Negeb bwkhak tháng rw rwk kha.

Abram ha Ijibo thángmani

¹⁰ Tabuk ha Kananno asari nang kha, aro belai khe asari nangma bagwi Abram ha Ijibo sal kisa tongwina bagwi tháng kha.

¹¹ Ha Ijibo sógwi twtwi wng khe bo bihik Saraino hai hwnwi sa kha, “Nwng wng kha bwrwi naithok;

¹² hakhe, ha Ijipni borokrok nono nuk khe, ‘Omo nini hik’-no’ hwnwi sa anw tei ano butharwi páiwi nono khe buthar glak.

¹³ Nwng ani bukhuk se hwnwi sa ja di, hakhe nini jarwi ang kwthang narwkjak anw phiya angbo kaham’-no tong anw.”

¹⁴ Abram ha Ijibo habwi khe’-no ha Ijipni borokrok a bwrwino belai khe naithokjak lai kha.

¹⁵ Pharaoni tẃiphangrok bono nuk kha tei bini naithokmani kókrokno Pharaono saui lai kha. Hakhe a bwrwi Pharaoni nogo tlangjak kha.

¹⁶ Bini bagwi Pharao Abramno kaham khe ton kha tei bono merarok, musukrok, korai chwlarok, selengrok, selengjwkrok, korai bumarok tei mangingangrok rw kha.

¹⁷ Tamo khe Pharao Abramni bihik Saraino tlangmani bagwi Subraiyung bini sago tei bini nogo tongnai bebakni saka-o belaino bemuk hamya rwui rohor kha.

¹⁸ Hakhe Pharao Abramno ringwi hai hwnwi sa kha, “Nwng ano tamo khlai kha de? Nwng tamo omo nini hik se hwnwi sa ya?

¹⁹ Nwng tamo ‘Omo ani bukhuk se’ hwnwi sa? Aboni bagwi se ang ani hik snamna bagwi ang bono tlango, hakhe iko nini hikno tlangwi tháng si di.”

²⁰ Hakhe, Pharao bini borokrokno dagiui rw kha; tei bórok bono bini hani kariui rohor kha bini bihik tei bini tongma bebak’-no rwui rohor kha.