SAMUNG 9 - Kok Borok (Re-edited) Bible (BSI)

Sol Jisuno poito khlaimani

¹ Aphuru’-no Sol Subraini sagrirokno butharna hwnwi sikiri-sokoro khe tongma jora.

² Bo Damaskosni Judai thumnokrogo sinijakna tẃi khe ochai bokhorokni thani swi rohor di hwnwi sanwi kha, hakhe Subraini Lama himnai khoroksano phano nuk khe bo bwrwinobo chwlanobo romwi Jerusalemo tlangwi man anw.

³ Tháng te tháng te bo Damaskoso sók phai twtwi phuru achomsa nokhani pohor bini yang yang chẃng phai kha.

⁴ Bo ha-o klai kha, hakhe hai hwnwi kók sama khna kha, “O Sol! O Sol! Nwng ano tamo wngwi sátok?”

⁵ “O Subrai, nwng sabo?” hwnwi bo sẃng kha. A bokhorang hai hwnwi sa kha, “Ang Jisu, nwng sátogwi tongmani a borok. Nwng painjono usta rwna le belai kutuk.”

⁶ Hakhe bo kwlwibraui uanajagwi “Nwng ano tamo khlai di hwn Subrai” hwnwi sa khe Subrai bono “Tabuk bacha di, tauno tháng di, hakhe nwng tamo ma khlainai aro sajak anw,” hwnwi sa kha.

⁷ Sol bai himnairok tháisa phano pung yaui bathagwi tong bai kha; bórok a kók samano khna kha, phiya ba khoroksanobo nuk li ya.

⁸ Sol hani bacha kha, mokol phiyok kha, phiya ba mungsabo nuk li ya. Hakhe bórok bono yak tolwi Damaskoso tlang kha.

⁹ Nokha saltham jora bo mokol nuk li ya, aphuru bo mungsabo chá li ya nung li ya.

¹⁰ Damaskoso Anania hwnwi sagri khoroksa tongo. Subrai bono imango hai hwnwi sa kha, “O Anania!” “Subrai, ang oro se,” hwnwi bo sa kha.

¹¹ Subrai bono hai hwnwi sa kha, “Bacha di, Lama Keplengo tháng di, hakhe Judasni nogo Sol hwnwi Tarsoni borok khoroksano rutugwi di. Bo suri sanwi tongo.

¹² Bo imango nuk kha Anania hwnwi khoroksa phaiwi bini saka-o yak bera kha, hakhe bo hai’-no hai mokol nuk kha.”

¹³ Anania hai hwnwi sa kha, “Subrai, o borokni kók ano sanai báng kha, Jerusalemo nini bororokni thani bo aswk samung hamya tangmarokno ano sanai báng kha.

¹⁴ Phiya Damaskoso nono surinai joto borokno romwi manna tẃi khe ochai okrarok bai sajagwi bo oro phai kha.”

¹⁵ Subrai bono hai hwnwi sa kha, “Tháng si di, bo ani borok chongjak, buini bororok, bugrarok tei Israilrokni thani ano sini rwna bagwi ang bono chong kha.

¹⁶ Bo ani bagwi bwswk se tekto manna nangno abo ang’-no bono phunuk anw.”

¹⁷ Aboni bagwino Anania thángwi nogo habwi kha, hakhe Solni saka yak beraui hai hwnwi sa kha, “Takhuk Sol, Subrai ano rohor kha; abo’-no Jisu, nwng oro phai phuru nwng bai lama-o nukjaknai. Nwng hai’-no hai mokolbo nukna tẃi khe, Phola Kwtharbo koboljakna tẃi khe bo ano rohor kha.”

¹⁸ Logi logi’-no á bophor hai tamobo Solni mokolni klai kha, hakhe bo hai’-no hai mokol nuk kha. Bo bacha kha, hakhe baptisma wng kha;

¹⁹ ulo chámung kisa chá khe bo bwsago phan manjak kha. Sol Damaskosni sagrirok bai nokha salnwi saltham tong kha.

Sol Damaskoso Kothoma Kaham pírmani

²⁰ Bo thumnokrogo thángwi Jisuni kók pír gra kha. “Jisu’-no Kaitorni Sajla,” hwnwi bo sa kha.

²¹ Bo samano khnanairok bebak uanajagwi hai hwnwi sẃng lai kha, “Jerusalemo o mungno surinairokno butharnai omo a borok ya diba? Phiya bórokno romwi ochai okrarokni thani tlangna bagwi se bo oro phai ya diba?”

²² Yang Sol kwrak kha pír rwrwgo, Jisuno a Masia hwnwi bo aswk khe khá hap rwui phunukma bai Damaskoso tongnai Judairok bo phunukmano in’-hi hwnwi man li ya.

²³ Sal kwbángma ulo Judairok kuthum laiwi Solno butharna hwnwi kók chap lai kha;

²⁴ yang bórok kók chap laimano bono saui khna rw kha. Bono buthar laina hwnwi bórok hor sal taunni duglamo naichom lai máng tong kha.

²⁵ Yang Solni logisongrok horo bono tubu-ui chokdeualni tailam tẃi ura-o khe tikhlai rohor kha.

Sol Jerusalemo kiphilmani

²⁶ Sol Jerusalemo tháng kha, hakhe sagrirok bai thansa wngwina nai kha. Bórok bono sagri hwnwi poito khlai ya wngma bai bebak’-no bono kirijak kha.

²⁷ Aphuru Barnaba bono chonghorrokni thani tlangwi tháng kha. Sol bahai khe Subraino lama-o nuk kha, Subrai bahai khe bono kók sa kha, bo abono bórokno saui khna rw kha; Damaskoso Sol bwswk kirima kwrwi khe Jisuni kók pír kha bo abonobo sa kha.

²⁸ Hakhe Sol bórok bai tong kha. Bo kirima kwrwi khe Jerusalem gwnangwi Subraini kók pírwi tong kha.

²⁹ Bo Grik kók sanai Judairok baibo kók sa lai kha, tokrabo rw lai kha, hakhe bórok bono butharna nai lai kha.

³⁰ Takhukrok abono saui man kheno bono Kaisaria-o tokhlaiwi tlang kha, khe Tarso bwkhak rohor kha.

³¹ Aphuru Judia, Galili tei Samaria gwnangwi motha kwchang kwchang wng kha. Hakhe Subraino suri twtwi abo rak rwrwgo, phiya Phola Kwtharni phan bai báng rwrwgo.

Pitor Luda-o Ainiano ham rwmani

³² Pitor ha gwnangwi tháng kha, hakhe salsa Luda-o tongnai Kaitorni bororokno naina tháng kha.

³³ Bo aro Ainia hwnwi borok khoroksano nuk kha, bo yakung yak man ya, hakhe nokha bisi char jora thongarni bachaui man ya.

³⁴ Pitor bono hai hwnwi sa kha, “Ainia, Jisu Khristo nono ham rw kha. Bacha di, ríyan dól di.” Ainia logi logi’-no bacha kha.

³⁵ Luda bai Sarono bebak tongnairok bono nuk kha, hakhe bórok Subraini bwkhak khá kiphil kha.

Pitor Jopa-o Dorkano mwthangmani

³⁶ Jopa-o Tabitha hwnwi poito khlainai bwrwi khoroksa tongmani. (Grik kók bai bini mung Dorka, abo mwswi hwnma se.) Bo samung kaham khlai máng tei kwrwirokno chuba máng phai kha.

³⁷ Aphuru bo hamya klai kha, hakhe thwi kha. Bórok bini mangno su-ui sakani khotol kaisa-o beraui tonwi kha.

³⁸ Jopa Luda bai chal tha ya, hakhe Jopani sagrirok Pitorno Luda-o tongo hwnwi khnaui borok khoroknwino bini thani hai hwnwi kók kwchárwi rohor kha, “Phai di, ta ler di, chini thani phai ja di.”

³⁹ Hakhe Pitor bachaui bórok bai tháng kha. Aro sógwi khe bo sakani a khotolo tlangjak kha. Randijwkrok bono chorsa khe kuthum laijak, bórok kap twtwi Dorka kwthang tong lang phuru kamchlwi bai kut sup langmarokno bono phunuk kha.

⁴⁰ Pitor bórokno bebak’-no phataro rohor bai kha, hakhe bo yáskú sungwi suri san kha; ulo bo kwthwini phaising uphilwi hai hwnwi sa kha, “O Tabitha, bacha di.” Bo mokol phiyok kha, hakhe Pitorno nuk khe choksa achuk kha.

⁴¹ Pitor bini yak romwi bacha rw kha. Hakhe bo poito khlainairok bai randijwkrokno ringwi bórokni thani bono kwthang phunuk phai kha.

⁴² Jopa gwnangwi o kók pírjak kha, hakhe borok kwbángma Subraino poito khlai kha.

⁴³ Simon hwnwi bukurni samung tangnai bai Pitor Jopa-o tongma balok kha.