SAMUNG 6 - Kok Borok (Re-edited) Bible (BSI)

Khoroksnino chongmani

¹ Ulo sagrirok bángwi phai rwrwkma bagwi Grik kók sanairok bai Judai kók sanairok uálai lai kha. Kwrwirokni bagwi rang khangmani aroni chini randijwkrokno khagwi tono hwnwi Grik kók sanai Judairok sa lai-o.

² Aboni bagwino chonghor chiknwirok bebak sagrirokno kwrẃngsa khe ringwi hai hwnwi sa kha, “Rang-ríno tẃi Kaitorni kók pírnano yakarmani abo chini cha ya.

³ Hakhe takhukrok, norokni bisingni Phola Kwthar bai koboljak phiya elem gwnang hwnjaknai khoroksnino khá chong lai gra di, hakhe chwng bórokno o samungni barja rw anw.

⁴ Chwng hwn khe suri sannani bai pírnani samungo tong sinai.”

⁵ Chonghorrok o samano aswk bororok hamjak bai kha. Hakhe bórok Stipan hwnwi khoroksano khá chong lai kha, bo jai kheno poito gwnang phiya Phola Kwthar bai koboljak. Bórok Stipan bai Philip, Prokhor, Nikanor, Timon, Parmena tei Judai-o hap phainai Antiokni Nikolanobo khá chong lai kha,

⁶ hakhe chonghorrokni thani rw phai kha. Chonghorrok suri sanwi bórokni saka ya bera kha.

⁷ Hakhe Kaitorni kók pírjak rwrwgo. Jerusalemo sagrirok bángma saka báng rwrwgo, phiya ochairokni bere kwbángma poito khlai lai kha.

Stipanno rommani

⁸ Stipan wng kha Kaitor khairokmani borok, bo belai suar gwnang. Bo lukurokni bisingo ha-o nuk ya samung bai uanamasingcha samung khlaiwi tongo.

⁹ Yang khe baksa bororok bono kebengo; bórok wng kha Phiyókjaknairokni thumnokni borok (a thumnokno ahai’-no hwno), bórok Kurinini bai Aleksandriani Judairok. Bórok bai Kalokia tei Asiani baksa Judairok Stipan bai tokra rw lai kha.

¹⁰ Tamo khe Phola Stipanno omo tẃi kók elemi rw kha, hakhe bo kók samano bórok in’-hi hwnwi man li ya.

¹¹ Aboni bagwino bórok khoroknwi khoroktham borokno hai hwnwi sana bagwi tuksonwi rw kha, “Musi bai Kaitorno bo hamya samani chwng khna kha.”

¹² Omo hai khe bórok lukurokno, okra chakrarokno tei Kerong phrwngnairokno tunglok rwui rw kha. Bórok Stipanni aro phaiwi bono rom kha, hakhe Kaunsilni bwskango tlang kha.

¹³ Aro bórok sakki tatal rw rwna bagwi khoroknwi khorokthamno bacha rw kha. A sakkirok hai hwnwi sa kha, “O borok chini nokthar bai Musini Kerongno hamya sa máng tongo.

¹⁴ Bono chwng hai hwnwi sama khna kha, ‘O Nasaretni Jisu nokthar swbainai, phiya Musini simi chwng manẃi phaimani kerongrokno bo juda khlainai.’ ”

¹⁵ Kaunsilo achugwi tongnairok bebak’-no Stipanno lok lok khe naisigwi tong bai kha, hakhe bini mwkhangno suarini mwkhang hai nuk bai kha.