SAMUNG 26 - Kok Borok (Re-edited) Bible (BSI)

Pol Agripani bwskango kók samani

¹ Agripa Polno hai hwnwi sa kha, “Sa di, nini kók nwng tabuk saui mano.” Pol yak phologwi yókna bagwi hai hwnwi sa kha,

² “O bugra Agripa, Judairok ano aswk majra bermani aboni yakni yókna bagwi ang tini nini bwskango kók saui manma bai ang sakno talikha kaham ma hwno.

³ Abo khe katswi sói se, tamni hwn khe Judairokni tongmung chámung bai kók báng laimano nwng kaham khe saui mano. Aboni bagwino ang samano khá logwi khna ja di.

⁴ “Siklani simi ang bahai khe tongwi phai kha abo bebak Judairok saui mano. Ani ha-o phiya Jerusalemo bahai khe ang aswk tongwi phai kha abo bórok yaphang mareui saui mano.

⁵ Chini tongtharni jotoni slái gut kwrak Pharisai wngwi ang tongwi phai kha, abo bórok saui manma balokjak se, bórok muchung khe sakki rwui mano.

⁶ Hakhe chini chuchusongni thani Kaitor kók rwmani abono khá tungma bai ang tabuk oro buj thumjakna hwnwi bachaui ma tongo,

⁷ chini bororokni bosong chiknwirok suri twtwi katswi a kók rwmano manna hwnwi khá tungwi tongo. Hakhe, o bugra, ang omono khá tungma bagwi Judairok bai majra berjagwi ma tongo.

⁸ Kaitor kwthwino mwthangwi tisamano norok Judairok poito khlainani tamni tukjak ba?

⁹ “Ang mansak’-no Nasaretni Jisuni mungo hamya khlaithai tongo hwnwi ang sakphang’-no uansuk kha.

¹⁰ Jerusalemo ang abo hai’-no khlai kha. Ang ochai okrarokni thani phan man kha, hakhe Kaitorni bororok kwbángmano’-no alongo da kha, phiya bórokno buthar di hwn phuru angbo abono chajagwi tongo.

¹¹ Joto thumnogo ang bórokno uáisa uáinwi ya kwbángma’-no sátok kha, hakhe bórok Jisuno poito khlaimano yakar rwna nai kha. Bórokno ang aswk thamchi wngo bórokno sátokna bagwi buini hani taunrogo suda ang tháng kha.”

Bo Jisuno poito khlaimani kókno Pol samani

¹² “Ochai okrarok bai phan rwui rohorjagwi ang Damaskoso omoni bagwino thángo.

¹³ O bugra, aphuru dibor jora, lama-o ang bai ani logi himnairokni yang yang salni slái kwchang nokhani pohor chẃngmani ang nuk kha.

¹⁴ Chwng bebak’-no ha-o pwtap pwtip klai kha, hakhe Hibru kók bai ano hai hwnwi kók sama khna kha, ‘O Sol! O Sol! Nwng ano tamo wngwi sátok? Musuk painjon kwplá-o usta rwui lengma hai nwng’-bo abo hai’-no lengwi tongo.’

¹⁵ ‘O Subrai, nwng sabo?’ hwnwi ang sẃng kha. Hakhe Subrai hai hwnwi sa kha, ‘Ang Jisu, nwng sátogwi tongmani a borok.

¹⁶ Tabuk bacha di. Nono ani seleng chongna bagwino ang nwng bai nukjago; nwng tini ano nukmano phiya ulo ang nono phunukmano nwng buino ma sanai.

¹⁷ Israilrok bai buini bororokni thani ang nono rohornai, bórokni yakni ang nono kati rwui tonnai.

¹⁸ Bórok ano poito khlaima bai sumsok nakarjagwi Kaitorno chongjak bororokni bisingo khopjakna tẃi khe nwng bórokni mokol ma kiyok rwnai, mwnakni pohoro phiya Soitanni yakni Kaitorni yago ma tubunai.’ ”

Pol bini samungni kók samani

¹⁹ “Hakhe, o bugra Agripa, chuknohani phunukjakmani abo hai’-no ang khlai kha.

²⁰ Sumsok yakarwi Kaitorni phaising khá ma kiphilnai, hakhe sumsok yakar kha hwnwi phunukma bagwi abo hai kheno ma tongnai hwnwi ang puila Damaskos bai Jerusalemo pír kha, ulo Judairok ha gwnangwi tei buini bororokni bisingobo pír kha.

²¹ Aboni bagwino ang noktharo tong phuru Judairok ano rom laiwi butharna nai kha.

²² Tamo khe tinini sal jora Kaitor ano chubaui phi kha, hakhe oro bachaui kusu kotor bebakni thani ang sakki rwui tongo. Diyarirok tei Musi ahai wngnai hwnwi sa langma bai ang samani abo le katswi thansa se;

²³ abo wng kha Masia ma sátokjakna nangnai, phiya Judairok bai buini bororokni thani mwthangnai pohorni kók sana hwnwi bo kwthwirokni bere swkang thangwi bacha granai.”

²⁴ Pol yókna bagwi hai hwnwi sa phuru Phesto bono hai hwnwi Chirikhók kha, “Pol, nwng ba kobor se bla! Nwng aswk elem rwngmani abo se nono kobor snam si bla!”

²⁵ “O hoda bokhorok, ang kobor ya! Ang kók samani belai ya, kók kubui se,” hwnwi Pol sa kha.

²⁶ “Bugra Agripa, nini thani ang huhui-hahai kwrwi khe kók saui mano, tamni hwn khe nwng o kókrok bebak saui mano. Ang khá ka súgo nwng o kókrokno tháisa kwrwi tẃi sijak, tamni hwn khe omo huijagwi kotono wngma ya.

²⁷ Bugra Agripa, nwng diyarirokno poito da khlai? Ang si-o nwng khlai-o!”

²⁸ Agripa Polno hai hwnwi sa kha, “Aswk kisa bai da nwng ano Khristan snamna nai?”

²⁹ Pol hai hwnwi sa kha, “Kisa phano wng thung, kwbáng phano wng thung, o sorni dwkhwino karwi nwng ang hai wng thung hwnwi ang Kaitorni thani nai-o, nwng simi ya, tini ani kók khnanairok jotonobo wng thung.”

³⁰ Aphuru bugra, gobornor, Berniki tei aro achuknairok, bebak’-no bacha lai kha,

³¹ hakhe kutul baiwi bórok kiching bórok hai hwnwi sa lai kha, “O borok butharjakna nangnai eba alongo chopjakna nangnai abo tẃi samung mungsabo tang ya.”

³² Hakhe Agripa Phestono hai hwnwi sa kha, “O borok bugra kotorni thani apil khlai ya wngma te bono phiyógwi man kha mun.”