SAMUNG 22 - Kok Borok (Re-edited) Bible (BSI)

¹ “O takhukrok tei hodarok, norokni bwskango ang sakni kók sa anw, ani kókno khna bai di!”

² Bono Hibru kók bai kók sama khnaui bórok teibo siring siring wng kha; hakhe Pol kók sama cho li ya,

³ “Ang Judai se, Kilikiani Tarso o achai-o, phiya o Jerusalemo tor kha lok kha. Ang Gamalielni sagri wngwi chini chuchusongni Kerong kaham khe srwng kha, hakhe tini norok jotono Kaitorno surinani srangma hai’-no angbo srango.

⁴ O Lama-o himnai bororokno ang butharna hwnwi sátok kha, ang bwrwi chwla romwi alongo chop kha.

⁵ Ochai bokhorok bai bebak kaunsil bórok ang saui tongmano kubui hwnwi phunugui man anw. Damaskoso tongnai Judai takhukrokni thani bórok kóktun swimano ang bórokni yakni man kha; hakhe ang o bororokno romwi khaui Jerusalemo tubu-ui sátok phaina bagwi aro tháng kha.”

Bo Jisuno poito khlaimani kókno Pol samani

⁶ “Ang tháng te tháng te Damaskos gana-o phai kha, dibor wng twtwi-o achomsa nokhani pohor ani yang yang belai kwchẃng khe chẃng phai kha.

⁷ Ang ha-o klai kha, hakhe ano hai hwnwi kók sama khna kha, ‘O Sol! O Sol! Nwng ano tamo wngwi sátok?’

⁸ ‘O Subrai, nwng sabo?’ hwnwi ang sẃng kha. ‘Ang Nasaretni Jisu, nwng sátogwi tongmani a borok,’ hwnwi bo ano sa kha.

⁹ Ani logisongrok a pohorno nuk kha, tamo khe ano kók sanaini khorangno khna li ya.

¹⁰ Ang hai hwnwi sẃng kha, ‘Subrai, ang tamo khlainai?’ Hakhe Subrai ano hai hwnwi sa kha, ‘Bacha di, Damaskoso tháng di, hakhe Kaitor nono samung khlai rwna hwnwi khá chabwi tongmani abórokno nwng aro saui khna rwjak anw.’

¹¹ A pohor belai kwchẃngni bagwi ang mokol nuk li ya, aboni bagwino ani logisongrok ano yak tolwi Damaskoso tlang kha.

¹² “Anania hwnwi Kaitorno Suriui chini Kerongno rákhoknai khoroksa tongo, Damaskoso tongnai bebak Judairok bono borok kaham hwno.

¹³ Bo ani aro phai kha, hakhe ani gana bachaui hai hwnwi sa kha, ‘Takhuk Sol, nwng mokol nuk phi di!’ Katswi aphuru’-no ang mokol nuk phi kha, hakhe bono naisik kha.

¹⁴ Bo hai hwnwi sa kha, ‘Chini chuchusongni Kaitor bo khá chapmano saui man rwna bagwi, bini Borok Kahamno phunukna bagwi, phiya bini búkhúkni kók khna rwna bagwi nono chong kha.

¹⁵ Tamni hwn khe nwng bini bagwi kók ma sanai, nwng nukmano nwng khnamano bebak borokni thani ma sanai.

¹⁶ Tabuk tei tamo lerwi tong? Bacha di, baptisma wng di. hakhe bini mung naui nini sumsok sú bai di.’ ”

Buini bororokni thani pírna bagwi Polno rohormani

¹⁷ “Ang Jerusalemo kiphilwi tháng kha, aro noktharo suri sanwi tong phuru ang Kaitor bai imang kaisa phunukjak kha.

¹⁸ A imango ang Subraino ano hai hwnwi saui tongma nuk kha, ‘Do di, Jerusalemni dakti tháng di, tamni hwn khe nwng ani kók samano oroni bororok khna glak.’

¹⁹ Ang hai hwnwi sa kha, ‘Subrai, ang thumnok brúm brúm thángwi nono poito khlainairokno rommani bumani abono bórok kaham khe saui mano.

²⁰ Phiya nini kók sanai Stipanno buthar phuru ang sak baithang aro bachajak; bono butharmano ang chajagwi tongo, butharnairokni rírok ang’-no aphuru nainai.’

²¹ Subrai ano hai hwnwi sa kha, ‘Tháng di, tamni hwn khe ang nono hakchalma-o buini bororokni thani rohornai.’ ”

²² Pol abono saui tong sak lukurok khnaui tong kha, aphuru bórok sotonwi hai hwnwi Chirikhók lai kha, “Bono pái khibi di! Bo ahai’-no se thangwi tongo.”

²³ Bórok Chirikhók lai kha, bórokni rí-chumrok khitar lai kha, phiya hadlwi sar lai kha.

²⁴ Sengkrak dagiphang Polno chopnogo tlang di hwnwi dagi kha, phiya Judairok bini mungwi tamo wngwi omo hai khe chirikhók lai abo naina bagwi bono swprak di hwnwi sa kha.

²⁵ Bórok bono swprakna hwnwi kha kha, aphuru Pol aro bachaui tongnai sengkrak okrano hai hwnwi sa kha, “Rumni borokno swpraknani norok kerongo da gothokjak, aswk wng kha ang majra berjak ya kho?”

²⁶ Sengkrak okra o kókno khna khe sengkrak dagiphangni aro thángwi hai hwnwi sẃng kha, “Nwng tamo khlai kha? A borok ba Rumni borok se bla!”

²⁷ Aboni bagwino a sengkrak dagiphang Polni thani phaiwi bono hai hwnwi sẃng kha, “Ano sa di, nwng Rumni borok da?” “I’n, ang Rumni borok’-no,” hwnwi Pol sa kha.

²⁸ Sengkrak dagiphang hai hwnwi sa kha, “Ang le rang kwbángma rwui se wngo.” “Ang le achaima se oro,” hwnwi Pol sa kha.

²⁹ Polno sẃng pheneknairok bini aroni phatsa konor bu kha; Polno Rumni borok hwnwi saui manẃi, phiya sorni dwkhwi bai bono khamani bagwi sengkrak dagiphang kirijak kha.

Kaunsil bwskango Pol

³⁰ Judairok Polno majra bermano sengkrak dagiphang kaham khe saui manna nai-o; aboni bagwino teini salo bo Polni sorni dwkhwi kheng rw kha, hakhe ochai okrarok bai bebak Kaunsilno kuthum di hwnwi dagi kha. Hakhe bo Polno tlangwi bórokni bwskango bacha rw kha.