SAMUNG 21 - Kok Borok (Re-edited) Bible (BSI)

Pol Jerusalemo thángmani

¹ Hakhe kak lai kha ta hwnwi chwng lam rw kha. Sida thángwi chwng Koso sók phai kha; teini salo chwng Rodo sógwi kha, hakhe aroni Patara-o tháng kha.

² Phoinikia bwkhak thángnai rungtor khungsa chwng aro nuk kha; hakhe aro kasaui lam rw kha.

³ Chwng kwrẃngsa-o sók phai kha, aro tong twtwi Saipras nuhurjago, hakhe chwng abono yaksi-o klangwi Siriya bwkhak tháng kha. Chwng Turo ongkhor kha, aro rungtorni manwirok tikhlaijaknai.

⁴ Chwng naitugwi aroni poito khlainairokno man kha, hakhe nokha salsni bórok bai tong kha. Phola kobolma bai bórok Polno Jerusalemo ta tháng di hwnwi sa kha.

⁵ Bórok bai tong baiwi chwng kutulwi tháng kha. Hik-sa bai chwrai-khonai tẃiwi bórok bebak’-no chini logi taunni phataro phai kha. Twi rukungo chwng bebak’-no yáskú sungwi suri san lai kha.

⁶ Hakhe chwng kak lai kha ta hwnwi rungtoro kasaui lai kha, bórok khe nogo kiphilwi tháng kha.

⁷ Turni simi chwng twini lama tẃi máng Tolemai-o sók phai kha; aro chwng takhukrokno khápang rw laiwi bórok bai salsa tong kha.

⁸ Teini salo chwng aroni kutulwi Kaisaria-o sók phai kha; aro Philip pírnaini nogo habwi bo bai tong kha. Jerusalemo chongjaknai a khoroksnini bere bo’-bo khoroksa.

⁹ Bini bwsajwksong káijk ya khorokbrwi tongo, bórok Kaitorni kók sanai.

¹⁰ Chwng aro nokha salnwi saltham tong kha, aphuru Agab hwnwi diyari khoroksa Judiani sók phai kha.

¹¹ Bo chini aro phai kha, Polni changni rítuku naui bini sakni yakung yak kha kha, hakhe hai hwnwi sa kha, “O kókno Phola Kwthar hai hwnwi samani: Jerusalemni Judairok o rítukuni bubagrano omo hai khe kha anw, hakhe bono buini bororokni yago yapharwi rohor anw.”

¹² Chwng o kókno khnaui Polno “Jerusalemo ta tháng di,” hwnwi chwngbo hwn kha, aroni bororokbo hwn kha.

¹³ Tamo khe bo hai hwnwi sa kha, “Omo hai khe kap laiwi ani bwkha swbaiwi norok omo tamo khlai kha? Ang Jerusalemo khajakna bagwi simi ya, Subrai Jisuni bagwi butharjakna suda gosi-o.”

¹⁴ Chwng bono mothorwi man li ya, hakhe “Subrai muchungma hai’-no wng thung,” hwnwi tei kók tháisa phano sa lai li ya.

¹⁵ Chwng aro tong baiwi chini manwirok khati baiwi Jerusalemo lam rw kha.

¹⁶ Kaisariani poito khlainai khoroknwi khorokthambo chini logi phai kha, hakhe chwng tongna hwnmani a borokni nogo chwngno tunwi kha; a borok wng kha Saiprasni Mwnason, bo agini simi’-no poito khlaijak.

Pol Jakobno naimani

¹⁷ Chwng Jerusalemo sógwi khe takhuksong chwngno jai khe’-no bóri sok kha.

¹⁸ Teini salo Jakobno naina hwnwi Pol chwng bai baksa tháng kha; aphuru mothani bebak okrarokbo tong bai-o.

¹⁹ Pol bórokno khulumui bini yak tẃi buini bororokni bisingo Kaitor samung khlaimarokno tháisa tháisa khe saui khna rw kha.

²⁰ Bo samano khnaui bórok bebak’-no Kaitorno lob lai kha. Hakhe bórok Polno hai hwnwi sa kha, “Takhuk, nai di, oro tamo wngwi tong kha. Chisai chisai Judairok poito khlai bai kha, hai phano bórok jotono Kerongni kók jai kheno khna lai-o.

²¹ Bórok nini kók hai hwnwi khna kha, chwrairokno sakur ta di, Judai tongmungno ta tẃi di hwnwi sa saui buini ha-o tongnai Judairokno Musini Kerongno yakar di hwnwi nwng phrwngo.

²² Nwng sók phai kha hwnwi bórok saui se mannai. Hakhe tamo khlainai?

²³ Chwng sama hai khlai di. Oro borok khorokbrwi tongo, bórok Kaitorni thani swmai tang laijak.

²⁴ Nwng bórok bai baksa súchajagwi di, súchajakmani rangbo rw di, hakhe bórok bokhorok siljagwi mannai. Omo hai khe jotono saui man anw nini mungwi sa phaima kókrokni bere tháisa phano kubui ya, nwng Musini Kerongno rwksaui tongmano simi saui man anw.

²⁵ Poito khlainai buini bororokno hwn khe chwng kók chap laimano bórokni thani hai hwnwi swi hor kha, ‘Takjak mwtaino barokmani abo ta chá di, thẃi ta chá di, totra sebwi butharjak muino ta chá di, buitali-buitala ta wng di.’ ”

²⁶ Hakhe Pol a bororok bai thángwi teini salo bórok bai baksa súchajak kha; hakhe súchama sal sal bwswk tongnai, bu phuru jotoni bagwi pun tok ratharjaknai, abono saui khna rwna bagwi bo noktharo habwi kha.

Polno rommani

²⁷ A salsni sal páina kasuno-kasunogo Asia angkorni khoroknwi khoroktham Judai noktharo Polno nuk kha. Bórok lukurokno tunglok rwui Polno romphre kha.

²⁸ Bórok hai hwnwi chirikhók lai kha, “O Israilrok, phai bai diba! Joto ha-o tháng thángwi Israilrokno, Musini Kerongno tei o noktharno hamya hwnwi jotono phrwngnai omono a borok. Tabuk buini bororokno suda oro tubu-ui o nok kwtharno abul khlai phai kha!”

²⁹ (Bórok Episni Trophimno Pol bai a tauno nuk kha, hakhe Pol bono noktharo sitok kha hwnwi khá kaui se bórok o kókno sa-o.)

³⁰ A kutuk laimani abo taun gwnangwi rwchar kha, hakhe bororok bebak’-no khachigwi kuthum lai kha, bórok Polno romphreui noktharni sopre lai kha. Noktharni dugar phatsa sojak kha.

³¹ A bororok Polno butharna nai kha, aphuru’-no Rumni sengkrak dagiphangni thani Jerusalem gwnangwi uru-muru nangwi tong lai kha hwnwi kók rohorjak kha.

³² Dagiphang logi logi’-no sengkrak okra khoroknwi khoroktham bai sengkrakrokno tlangwi a bororokni phaising do lang kha. Bororok sengkrakrok bai khe bono nugwi Polno buma thak lai kha.

³³ Dagiphang Polni thani jabirwi bono rom kha, hakhe sorni dwkhwi twngnwi bai kha di hwnwi dagi kha. Bo hai hwnwi sẃng kha, “O borok sabo? Bo tamo khlai ba?”

³⁴ Luku bisingni baksa ba mungsano tẃiwi chirikhógwi sa kha, baksa ba tei mungsano tẃi chirikhógwi sa kha. Omo aswk udru mudru wngjak hakhe a dagiphang katswi tamo wng kha wng ya abo romwi man li ya; aboni bagwino bo “A borokno chopnok bisingo tlang gra si di,” hwnwi dagi kha.

³⁵ Sengkrakrok thak jora bono tun kha, aphuru bórok bono balwi ma tlang kha, tamni hwn khe lukurok belai thamchi kasajagwi tong kha.

³⁶ Bórok bebak uklok uklok phaiwi, “Bono buthar di!” hwnwi Chirikhók lai kha.

Luku bwskango Pol kók samani

³⁷ Bórok Polno chopnogo tlangna phuru bo sengkrak dagiphang hai hwnwi sa kha, “Ang nono kók tháisa saui da man no?” “Nwng Grik kók sanai, ahai ya diba?” hwnwi sengkrak dagiphang sẃng kha.

³⁸ “Hakhe aphuru uru-muru phnangwi kebengwi bachanai, khorok brwisaino hasing panthoro tlangnai nwng a Ijipsa ya, hai ya da?”

³⁹ Pol hai hwnwi sa kha, “Ang Judai se, Kilikiani Tarso o achai-o, ang taun choroini borok ya. Ano lukuni thani kók sa rw jaba di.”

⁴⁰ Sengkrak dagiphang bono kók sa rw khe Pol theka-theka-o bachaui lukuno thak rwna bagwi yak tail khlai kha. Bórok siring siring wng phuru khe bo Hibru kók bai bórokni thani kók sa kha.