SAMUNG 20 - Kok Borok (Re-edited) Bible (BSI)

Makidonia bai Griso Pol thángmani

¹ Kutuk laimani thak baiwi Pol poito khlainairokno kwrẃngsa khe ring kha, hakhe bwkha rak rwna kók saui bórok bai kak lai kha. Bo aroni kutulwi Makidonia bwkhak tháng kha.

² Bo a amchoirok tẃi tháng twtwi kók kwbángma saui poito khlainairokno khá rak rw kha. Hakhe bo Griso phai kha.

³ Aro bo nokha taltham jora tong bu kha. Bo Siriya-o thángna naiwi tong phuru Judairok bono butharna hwnwi kók chap laimano saui man kha, hakhe bo Makidonia tẃi kiphilwi thángna khá chong kha.

⁴ Beraini Purni bwsla Sopatar bini logi tháng kha; Thesalonikini Aristark bai Sekundo, Derbeni Gai, Timothi, phiya Asia angkorni Tukhik bai Trophim bórokbo logi tháng kha.

⁵ Bórok swkang baira thángwi Troa-o chwngno naisingwi tongwi sok kha.

⁶ Auang bángla Ter páiwi chwng Philipini rungtor bai lam rw kha, nokha salbani ulo bórokno Troa-o slabwi kha, aro chwng nokha salsni tong kha.

Troani motha bai Pol kak laimani

⁷ Tiyar salni horo chwng thansa khe panda khlaina bagwi kuthum lai kha. Pol bororokni thani kók sa kha, bo teini salo bórok bai kak laina bagwi hor dibor jora kók saui máng tong kha.

⁸ Chwng kuthum laimani sakani khotolo chati kwbángma tongo.

⁹ Utuk hwnwi sikla khoroksa tailamo achukjak; yang Pol kók sa rwrwk Utuk muktrwi phaijak rwrwk, ulo bo muktrwi thángwi a thak kwthamni ha-o klai kha. Bórok bono khochaui nai ba bo thwi kha.

¹⁰ Hakhe Pol ongkhorwi tháng kha, bakhlaiwi bono kwbagwi kha. Bo hai hwnwi sa kha, “Ta uana di, bo tabuk phano thangwi tong kho!”

¹¹ Hakhe bo sakani khotolo kiphilwi tháng kha, ruti swkagwi chá kha. Sal pa ya sak Pol bórok bai kók kwbángma’-no sa lai kha, hakhe kutul lang kha.

¹² Bórok a siklasano nogo kwthang tlang kha, hakhe belai khá twtwng wngjak kha.

Pol Troani Milito thángmani

¹³ Chwng Polno khibiui rungtoro kasaui Aso bwkhak lam rw kha, aro Polno tisaui tlangna kók tongo. Bo ha tẃi thángna khá chongma bagwi chwngno hai hwnwi sa-o.

¹⁴ Aso-o bo chwngno slap phai khe chwng bono tisa kha, hakhe Mitulini-o tháng lai kha.

¹⁵ Chwng aroni thángwi teini salo Khios gana sók phai lai kha. Salsa ulo Samo phai kha, hakhe aboni teini salo chwng Milito sógwi kha.

¹⁶ Asia angkoro aswk dua ya tẃi Pol Epis lái thángna khá chong kha. Man khe ba Pentikos salo Jerusalemo sók phaina bagwi bo belai doui tong kha.

Episni okrarokno Pol kók samani

¹⁷ Mothani okrarokno bo bai malaina hwnwi Pol Militni simi Episo sa hor kha.

¹⁸ Bórok sók phai khe bo hai hwnwi sa kha, “Ang Asia angkoro sók phai doropni simi aswk sal norok bai bahai khe tong kha abo norok saui mano.

¹⁹ Judairok kók chap laiwi ano hamya khlaimani bising tẃi bwkha kwlai khe muktwi bai muktwi khe ang Subraini seleng wngwi samung khlaiwi phai kha.

²⁰ Phatarrogobo norokno noksingrogobo pír phuru tei phrwng phuru norokni samung nangmano kók tháisabo ang huiwi ton ya abo norok saui mano.

²¹ Sumsok yakarwi Kaitorni bwkhak khá kiphilwi chini Subrai Jisuno poito khlai di hwnwi ang Judai bai buini bororoknobo jai kheno ragdama khlaiwi phai kha.

²² Tabuk Phola Kwtharni kók khnaui ang Jerusalem bwkhak thángo, saui man ya aro ani tamo’-bo wngno.

²³ Ang aswk simi’-no saui mano, ang alongobo ma chopjaknai, ma bo ma sátokjaknai, abono Phola Kwthar taun brúm brúm ano sa kha.

²⁴ Tamo khe Subrai Jisu ano khlai di hwnwi rwmani a samungno khlai baina bagwi ang thwinano dóro hwnwi khá ka ya; ani a samung wng kha Kaitor khairokmani Kothoma Kaham sanani.

²⁵ “Norokni bisingo berai twtwi ang Kaitorni hani kók pír kha. Tabuk ang saui mano norokni bere khoroksa phano ani mwkhang tei nuk glak.

²⁶ Hakhe tini’-no ang dabogwi hai hwnwi sa lango, norokni bere khoroksa swk komor khe ang omoni yak sújak.

²⁷ Tamni hwn khe Kaitor aswk khá chapmarokno ang norokno sa yaui huiwi ton ya.

²⁸ Norokni sakni bagwibo norok hus khe tong di, Phola Kwthar norokno naikolna rwmani a mothani jotoni bagwibo hus khe tong di. Mera mwrwknaisa mera bodolno chá rwui khan rwui tongma hai khe Kaitorni mothanobo ton di, bo abono bini baithangni thẃi bai pai kha.

²⁹ Ang saui mano ang tháng bai khe thamchi kutung gegumarok norokni bisingo hap phainai, bórok mothano maya chá glak.

³⁰ Omo tẃi sal phai anw aphuru norokni bere baksa poito khlainairokno bórokni logi sona bagwi tatal sanai.

³¹ Hakhe sichaui tong di, muktwi bai muktwi khe hor sal norok jotono nokha bisiktham jora ang phrwngmani abono muitu narwk di.

³² “Kaitor norokno khairogo o kók bai’-no ang tabuk norokno bini yapha-o yapharo. Bo norokno rak rwuibo mano, bini bororokni bagwi khatiui tonmaroknobo norokno rwui mano.

³³ Ang keboni rukphai eba rangchak eba rí-chumno nanani nai ya.

³⁴ Norok’-no saui mano ani o yakrok bai samung tangwi ang ani bagwibo ano logisongrokni bagwibo joto nangma manwi aji-o.

³⁵ ‘Nanai borokni slái rwnai borok se hamchajak,’ hwnwi Subrai Jisu samani o kókno muitu narwgwi chwng samung kwrak tangwi phan kwrwirokno ma chubana nangnai, abono joto samungo’-no ang norokno phunuk kha.”

³⁶ Pol kók sa baiwi bórok bebak bai baksa yáskú sungwi suri san kha.

³⁷ Bórok jot’-tono kap twtwi bono kwbagwi motom su lai kha.

³⁸ Bini mwkhang tei nuk glak kha hwnwi sama bai bórok belai khá hamya wng kha. Hakhe bórok rungtor jora bo bai baksa tháng kha.