SAMUNG 2 - Kok Borok (Re-edited) Bible (BSI)

Phola Kwthar phaimani

¹ Pentikos sal sók phai kha, aphuru poito khlainairok bebak’-no kwrẃngsa-o kuthum laijak.

² Aphuru nokbar kotor sipchaui kutukma hai khe nokha phaisingni aro achomsa kutuksa kha, hakhe abo bórok achugwi tongmani nok gwnangwi kutuk phai kha.

³ Aphuru bórok hórjlai hai yang yang piring-poroi nuk kha; hakhe aro tongnai joto borokni thani hórjlai nangjak.

⁴ Bórok bebak’-no Phola Kwthar bai koboljak bai kha, hakhe Phola sa rwma tẃi buini kók bai kók sa lai kha.

⁵ Aphuru swngcharni ha brúm brúmni phainai Kaitorno surinai Judairok Jerusalemo tongo.

⁶ Hakhe a kutukma khnaui borok kwbángma aro kuthum lai kha. Bórok bebak mwlang chaui tong bai kha, tamni hwn khe bórok jotono a poito khlainairokno janija kók bai kók saui tongma khna kha.

⁷ Mwlang chaui uanajagwi bórok hai hwnwi ma sacha kha, “O kók saui tongnairokba bebak’-no Galilini se bla!

⁸ Hakhe chini janija kók bai bahai khe chwng bórokno kók sa laima khna sla?

⁹ Chwng Parthia, Media tei Elamni; Mesopotamia, Judia tei Kapadokiani; Ponto tei Asiani;

¹⁰ Phrugia tei Pamphuliani; Ijip tei Kurini ganani Libya amchoini; chini bere baksa Rumni,

¹¹ Judai bai Judai-o hap phainairok; phiya chini bere baksa Krit tei Arabiani phaimani; hai phano se chini janija kók bai Kaitor samung kotor khlaimarokno chwng bórokno saui tongma khna-o.”

¹² Belai uanajagwi khá lwk lwk wngjakma bai bórok bo’-bo bono hai hwnwi sa laiwi tong kha, “Omo tamo hwnmani kók?”

¹³ Baksa khe poito khlainairokno thesra kariui hai hwnwi sa lai kha, “O bororok chuak kephek se!”

Pitor kók samani

¹⁴ Aphuru Pitor a chonghor khorokchisarok bai baksa bachaui lukurokno sotonwi hai hwnwi sa kha, “O Judai takhukrok tei oro Jerusalemo tongnairok norok bebak ani kók khunju kan bai di, hakhe o wngmano ang saui khna rw anw.

¹⁵ Norok khá kama hai o bororok chuak kephek ya; tabuk phungni dibor si kho.

¹⁶ Tamo khe omo Joel diyari hai hwnwi sa langma se,

¹⁷ “ ‘Kaitor hai hwnwi sa-o, omo páithakni salo ang khlaina hwnma se: Ang bebak borokni thani ani Phola lukhlainai hakhe norokni bwsarok chwla bwrwi Kaitorni kók saui khna rwnai; norokni siklarok Kaitor bai imang phunukjaknai norokni chakrarokbo imang nuknai.

¹⁸ Au, a salo ani seleng selengjwkni thani suda ang ani Phola lukhlainai hakhe bórok Kaitorni kók saui khna rwnai.

¹⁹ Ang aphuru nokhasa-o soidomni samung khlainai, haktorobo ha-o nuk ya samung khlainai. Thẃi bai, hór bai, hoku dumsama bai.

²⁰ Subraini a chẃngsacha sal kotor sók phaima swkang sal mwnaknai, tal thẃi hai chaknai.

²¹ Hakhe Subraini mung khu-ui ringnai borok bo se mwthangjaknai.’

²² “O Israilrok, o kókrokno khna bai di! Omo Nasaretni Jisuni kók se. Kaitor norokni bisingo o Jisuni yak tẃi ha-o nuk ya samung, uanamasingcha samung tei soidomni samung khlai kha. Bo Kaitor bai chongjak hwnwi o samungrokni bising tẃi norokno pháng-pháng khe phunuk kha. Norok’-no omo saui mano.

²³ Jisu norokni yago yapharjaknai abo Kaitor swkang baira siui khá chapjak se; hakhe chengta bororokni yak tẃi kruso kanta bu rwui norok bono buthar kha.

²⁴ Tamo khe Kaitor bono mwthangwi tisa kha; bo Jisuno kwthwirokni ha-o sátok rw yaui phiyók kha, tamni hwn khe kwthwirokni ha-o bono romwi narwknani abo wngwi man ya.

²⁵ Daud bini kók hai hwnwi sa kha, “ ‘Ang Subraino ani bwskango nuk máng tongo; ang uana ya tẃi khe bo ani yagra bwkhak tongo.

²⁶ Aboni bagwi ani khápang srango, ani búkhúk tongthokjago. Au, angbo thwiblangno, hai phano se ang khatung-khaja khe tong soknai.

²⁷ Tamni hwn khe nwng ani pholano kwthwirokni ha-o khibiui kabu glak; nini borok kwtharno nwng komor rw glak.

²⁸ Thangnani lama nwng ano phunuk kha, nwng ang bai máng tongwi ano jai kheno tongthok rwnai.’

²⁹ “Takhukrok, chini chuchu kotor Daudni kók ang norokno srai-srai khe ma sanai. Bo thwi kha, hakhe phobjak kha, phiya bini mangkhor tabukbo chini oro tong kho.

³⁰ Bo wng kha diyari, hakhe Kaitor bini thani kók rwmani abo bo saui mano: Daud bosongni khoroksano Daud hai kheno bugra chá rwnai hwnwi Kaitor swmai tangjak se.

³¹ Kaitor tamo khlaina nai abo Daud nuk kha, hakhe bo hai hwnwi saui Masia thangwi bachanani kókno sa kha, “ ‘Bo kwthwirokni ha-o khibiui kabujak li ya; bini mang komor li ya.’

³² “Kaitor o Jisuno mwthangwi tisa kha, chwng bebak’-no omono sak baithang nuk kha.

³³ Bo Kaitorni yagra bwkhak tisajak kha, hakhe Bupha kók rwma hai’-no bo bini yakni Phola Kwthar man kha, norok tabuk nukmani abono’-no bo chwngno lukhlai rw-o.

³⁴ Daud le chuknoha-o kasaui tháng ya; bo hai hwnwi se sa-o, ‘Subrai ani Subraino ahai hwnwi sa kha: Achuk di oro, ani yagra bwkhak,

³⁵ khlai ya sak ang nini kena arirokno yakung yaphangni yakung bokjaknai.’

³⁶ “Hakhe norok kruso kanta bumani a Jisuno Kaitor Subrai bai Masia snammani abo joto Israilrok saui man súk thung!”

³⁷ Bororok omono khnaui bwkha nangjak bai kha, hakhe Pitor bai tei chonghorrokno hai hwnwi sẃng kha, “Takhukrok, chwng tamo khlainai?”

³⁸ Pitor bórokno hai hwnwi sa kha, “Norok jotono sumsok nakarjakna tẃi khe norokni sumsok yakar di tei Jisu Khristoni mungwi baptisma wng di, hakhe Kaitor rwmani a Phola Kwtharno norok mannai.

³⁹ Tamni hwn khe chini Kaitor Subrai bini aro phaina tẃi khe ringmani jotoni thani bo kók rwjak norokni thani, nwsa-nwtẃirokni thani, phiya hakchalo tongnai jotoni thani’-no bo kók rwjak.”

⁴⁰ Teibo kók kwbángma saui Pitor bórokno hai hwnwi koiwi sa kha, “O borok hamyarok yagul sujak anw norok aroni yókna nai di.”

⁴¹ Bo samani kókno baksa baksa poito khlaiwi baptisma wng bai kha; hakhe a salo borok khorok thamsai wng anw bórokni bisingo sitokjak kha.

⁴² Bórok chonghorrokni thani srwngma bai, thansa wngma bai, pal chá laima bai tei suri sanma bai khe tong lai kha.

Poito khlainairok tong laimani

⁴³ Chonghorrokni yak tẃi ha-o nuk ya samung bai uanamasingcha samung kwbángma khlaijak kha, aboni bagwino jotoni bwkha-o uanama hap kha.

⁴⁴ Poito khlainairok bebak’-no thansa khe tong lai rwrwk kha, phiya janija tongma jora tẃi abono bebakni hwnwi bwkha romwi tong lai-o.

⁴⁵ Bórok sompoti bai tongma jora tẃi phal baiwi a rangno janija nang tẃi banta khe rw-o.

⁴⁶ Bórok noktharo sal brúm brúm kuthum lai máng tong kha, phiya bórok khá sutrang khe khápang srangwi nok brúm brúm chá lai-o.

⁴⁷ Bórok Kaitorno lob lai-o, phiya bororok bai kaham hwnjago. Mwthangjaknairokno Subrai sal brúm brúm bórokni bisingo sitogo.