SAMUNG 18 - Kok Borok (Re-edited) Bible (BSI)

Korintho Pol

¹ Aboni ulo Pol Athensni kutulwi Korintho tháng kha.

² Bo aro Akula hwnwi Ponto achainai Judai khoroksa bai malai kha, bo bihik Priskila bai Italini phai dorop, tamni hwn khe Rumni bugra kotor Klodi bebak Judairokno Rumni kutul di hwnwi dagi kha. Pol bórokno naina hwnwi tháng kha,

³ hakhe bórokni nogo tong kha, bórok bai baksa samungbo tango, tamni hwn khe bo rínitamu snamwi se chá-o, bórok ahai kheno cháma ba.

⁴ Judairokno tei Grikroknobo khá hap rwui da manno hwnwi bo Sabat sal brúm brúm thumnogo kók-lam sa lai-o.

⁵ Sila bai Timothi Makidoniani sók phaima ulo Jisu’-no a Masia hwnwi Pol Judairokno dak-dak khe phunuk twtwi Kothoma Kaham pír máng tong kha.

⁶ Yang bórok bono kebengwi bini mungwi kók hamya sa khe bo bórokno hus khlaina bagwi ríni hadlwi bupraui hai hwnwi sa kha, “Norok komor khe aboni majra norokni sagono klai thung! Ang omoni yak sújak. Tabukni simi ang buini bororokni thani thángnai.”

⁷ Hakhe bo bórokno yakarwi Titi Justo hwnwi Kaitorno surinai buini borok khoroksani nogo tongwi kha; thumnok lái drobo bini nok.

⁸ Thumnokni hoda Krispo Subraino poito khlai kha, bini nokni bebak bororokbo bo bai baksa poito khlai kha. Korinthsongni bere teibo borok kwbángma Kothoma Kaham khnaui poito khlai kha, hakhe baptisma wng bai kha.

⁹ Horsa Subrai imango Polno hai hwnwi sa kha, “Ta kiri di, kók sa máng tong di, sama ta cho di.

¹⁰ Ang nwng bai tongo. Khoroksa phano nono dera rwui man glak, tamni hwn khe o taun bisingo ani borok máng se kwbáng.”

¹¹ Aboni bagwino Pol aro nokha bisa kwchar tongwi bororokno Kaitorni kók phrwng kha.

¹² Galio Grisni gobornor snamjak phuru Judairok kuthumui Polno romwi kuto tubu kha.

¹³ Bórok hai hwnwi sa kha, “O borok Kerongo surimaya hwnwi sama hai khe bororokno Kaitorno suri rwna naiwi tongo.”

¹⁴ Pol kók sana naiwi tong phuru’-no Galio Judairokno hai hwnwi sa kha, “Tumungno omo majra wngma tlai, eba samung hamya wngma tlai hakhe norok Judairokno ang hama logwi man kha mun.

¹⁵ Tamo khe omo wng kha kókno tẃi, bumungno tẃi tei norokni kerongno tẃi se kók báng laima ba norok kiching norok’-no omono methep lai di. Ang omo tẃirokni buj thumnai borok ya!”

¹⁶ Hakhe bo bórokno kutni rwkhlai rohor kha.

¹⁷ Bórok bebak’-no thumnokni hoda Sostenino romwi kut bwskango bu kha. Yang Galio abono kháchingsa phano wngjak ya.

Antioko Pol kiphilmani

¹⁸ Korintho Pol takhukrok bai teibo balogwi tong kha, ulo bórokno klangwi rungtor bai Siriya-o lam rw kha. Priskila bai Akula bini logi tháng kha. Lam rwna swkang bo Kenkhria-o kara khlaiwi bwkhnai siljak kha.

¹⁹ Bórok Episo sók phai kha, aro Pol Priskila bai Akulano klang kha. Bo thumnogo habwi Judairok bai kók-lam sa lai kha.

²⁰ “Chwng bai teibo tong di,” hwnwi bórok bono hwn kha, tamo khe bo soi li ya.

²¹ Aboni slái bo hai hwnwi saui bórok bai kak lai kha, “Kaitor muchung khe ang norokni thani phai phir anw.” Hakhe bo Episni rungtor bai tháng kha.

²² Bo Kaisaria-o sógwi Jerusalemo tháng kha, hakhe aroni mothano khulumui Antioko tháng kha.

²³ Aro kisa tong langwi bo kutul lang kha. Bebak poito khlainairokno rak rw twtwi bo Galatia bai Phrugia amchoi tẃi tháng kha.

Epis bai Korintho Apolo

²⁴ Aleksandria-o achainai Apolo hwnwi Judai khoroksa Episo phai kha. Bo wng kha kók sanabo kwrwng, Elembakni kókbo kaham khe saui mano.

²⁵ Subrai Lamani kókno bo phrwngjak kha, hakhe belai bwkha ui-ui khe kók saui Jisuni kókno sói khe phrwngo. Hai phano Johon rwmani a baptisma simi se bo saui mano.

²⁶ Bo kirima kwrwi khe thumnogo kók sacha kha, Bo kók samano khnaui Priskila bai Akula bono nogo tlang kha, hakhe Kaitorni Lamani kókno katswi sói khe saui khna rw kha.

²⁷ Apolo Griso thángna khá chong kha, aboni bagwino aroni takhukrok bono yachak sokna tẃi khe Episni poito khlainairok swi horwi bono chuba kha. Bo aro sógwi Kaitorni khairokma tẃi poito khlainairokno kaham khe chubaui manẃi kha.

²⁸ Elembakni kókno tẃi Jisu’-no a Masia hwnwi phunugui bo Judairokno luku bwskango kaham khe tokra rwui mechen kha.