SAMUNG 17 - Kok Borok (Re-edited) Bible (BSI)

Thesaloniki-o Pol bai Sila

¹ Bórok Amphipoli bai Apolonia tẃi him te him te Thesaloniki-o sók phai kha: aro Judairokni thumnok khungsa tongo.

² Pol thumnogo tháng-thángma tẃi’-no arobo thumnogo tháng kha. Sabat sal saltham bo bororok bai elembakni kók tẃwi kók-lam sa lai kha;

³ bo elembakno swbaiwi Masia sátokjagwi kwthwini thangwi bachana nangnai hwnwi phunuk kha, “Ang norokno sa samani o Jisu’-no Masia,” hwnwi Pol sa kha.

⁴ Bórokni bisingo baksa khá hapjak kha, hakhe Pol tei Silasong bai hap phai kha; Kaitorno surinai Grikrok kwbángma bai aswk kolok-kotor bwrwirokbo abo hai’-no hap phai kha.

⁵ Tamo khe abono Judairok músú kha, hakhe bajarni khoroknwi khoroktham samung nang ya ahai’-no tongnairokno thumwi dól kha. Bórok taun gwnangwi udru mudru phnang kha, bórok Pol bai Silano lukuni thani tubuna nai kha, hakhe Jasonni nok chekai lai kha.

⁶ Tamo khe bórok bórokno nuk li ya kheno Jason bai takhuk khoroknwi khorokthamrokno sopreui taunni bokhorokrokni thani tubu kha, hakhe hai hwnwi chirikhók kha, “O bororokno ha gwnangwi danda-pinda khlainairok! Tabuk bórok chini tauno phai kha,

⁷ hakhe o Jason’-no bórokno bini nogo sitok sogo. Jisu hwnwi tei khoroksa bugra tongo hwnwi sa laiwi bórok bebak’-no bugra kotorni dagimarokno khna lai ya.”

⁸ O kók saui bórok lukurok bai taunni bokhorokrokno tunglok rw kha.

⁹ Bokhorokrok Jason bai a takhukrokno jabino phiyógwi rohor kha.

Beria-o Pol bai Sila

¹⁰ Hor wngma logi’-no takhukrok Pol bai Silano Beria-o rohor kha. Aro sók phaiwi bórok Judairokni thumnogo tháng kha.

¹¹ Thesalonikini bororokni slái aroni bororok tei kisa bwkha sutrang gwja. Bórok belai ui-ui khe Kothoma Kaham khna kha, hakhe Pol samani abo kubui da naina bagwi sal brúm brúm Elembakno cherwi nai lai-o.

¹² Bórokni bisingo kwbángma’-no poito khlai kha, phiya aswk kolok-kotor Grik bwrwirok bai chwlarokbo poito khlai kha.

¹³ Yang Pol Kaitorni kókno Beria-o suda pírwi tong kha hwnwi Thesalonikini Judairok saui man khe bórok aro phai kha, hakhe bororokno aula-jaula khe tunglok rw kha.

¹⁴ Takhukrok phatsa Polno twijlang jora tunwi kha; phiya Sila bai Timothi bórok khoroknwi Beria-o tong rwk kha.

¹⁵ Polno tunnairok bo bai baksa Athenso tháng kha, hakhe Beria-o kiphilwi tháng kha. Pol bórokno hai hwnwi saui rohor kha, “Sila bai Timothino dakti dodro ani oro phai di hwnwi saui di.”

Athenso Pol

¹⁶ Sila bai Timothino Pol Athenso naisingwi tong phuru taun gwnangwi aswk takjak mwtairok nugwi bo jai kheno bwkha hamya wngjak kha.

¹⁷ Aboni bagwino bo thumnogo Judairok bai tei Kaitorno surinai buini bororok bai kók-lam sa lai kha, phiya sal brúm brúm hati-o thángnai-himnairok baibo kók-lam sa lai kha.

¹⁸ Epikurai bai Stoik phrwngnairokbo baksa bo bai kók sa lai kha. Baksa hai hwnwi sa kha, “O phrẃng-pharangsa bo tamo sana nai?” Baksa ba hai hwnwi sa kha, “Bo ba buini mwtairokni kók se sana bla.” Pol Jisuni kók bai thangwi bachamani kókno saui tongma bai se bórok o kókno sa-o.

¹⁹ Hakhe bórok Polno tlangwi Ariopak kaunsil bwskango tubu lai kha, hakhe hai hwnwi sa kha, “Nwng samani o kók kwtalno chwng saui manna muchungo.

²⁰ Nwng samani bere baksa kókmungno chwng uanamasingcha wngjago, hakhe abo tamni kók chwng saui manna muchungo.”

²¹ (Athenssong tei aro tongnai buini hani bororok jotono kók kwtal kwtalno belai duaui sa lai-o khna lai-o.)

²² Pol Ariopak kaunsil bwskango bachaui hai hwnwi sa kha, “O Athenssong, ang aro-uro nugo norok mwtairokno surinai máng se.

²³ Tamni hwn khe norokni taun gwnangwi him phuru ang norokni mwtai nokrokno nai twtwi háyá khungsa nuk kha, aro ‘Sini ya mwtaini mungwi,’ hwnwi swijak tongo. Norok sini ya twtwi surimani a Kaitorni kókno’-no ang norokno tabuk sa-o.

²⁴ O swngchar tei aro tongnai bebak’-no snamnai Kaitor’-no ha bai nokhani Subrai, hakhe borok tangmani mwtai nogo bo tong ya.

²⁵ Borok bini samung khlaiwi bono rwui manmani abono bo samung nangjak ya, tamni hwn khe bo se borokno mwthangwi tonnai, bo se hama rwnai, phiya bo se aswk manwirokno rwnai.

²⁶ Borok khoroksani se bo bebak kisimni bororokno snamwi haktor gwnangwi bórokno ton kha, bórok buro bu phuru tamo khe tongnai abo swkang baira’-no bo chabwi ton kha.

²⁷ Bórok bono rutuk thung hwnwi, phiya kopromwi romwi man khe ba man thung hwnwi se bo omono khlai-o. Ahai phano Kaitor chwng kebo bai phano hakchal tong ya;

²⁸ khoroksa hai hwnwi sama hai, “ ‘Bini jarwi se chwng w bo wngo tobo tongo, bini jarwi se chwng himo thángo.’ Omo norokni kók rwbaiphangrokbo baksa hai hwnwi sama hai se, ‘Chwngbo bini bwsarok’-no.’

²⁹ Chwng Kaitorni bwsa wngma bai’-no takna kwrwngrok rangchak, rukphai eba holongni takmani abo tẃi mwtai hai Kaitorno khá ka thai kwrwi.

³⁰ Bórok si ya wngwi tong phuruni a molno Kaitor rom li ya, tabuk le joto hani bebak borokno lama hamyani kiphilwi phai di hwnwi bo hwn kha.

³¹ Tamni hwn khe bo bini chongjak borok bai swngcharni joto borokno sói khe buj thumna bagwi salsa sal chongwi ton kha. Bo a borokno kwthwini mwthangwi tisama bai jotoni thani omono dak-dak khe phunuk kha.”

³² Kwthwino mwthangwi tisamani kókno khnaui bórokni bere baksa Polno mwnwi lai kha, baksa ba hai hwnwi sa kha, “Chwng o kókno nini khúk tẃi tei uáisa khnana nai-o.”

³³ Hakhe Pol kaunsilni kutul kha.

³⁴ Bórok khoroknwi khoroktham bo bai hap phaiwi poito khlai kha; bórokni bere Ariopakni chalai Dionusi khoroksa, Damari hwnwi bwrwi khoroksa, tei khoroknwi khorokthamrokbo poito khlai kha.