SAMUNG 10 - Kok Borok (Re-edited) Bible (BSI)

Pitor bai Kornili

¹ Kaisaria-o Kornili hwnwi borok khoroksa tongo, Rum sengkrakrokni bisingo “Itali Gut” hwnmani a gutni okrarokni bere bo’-bo khoroksa.

² Bo Kaitorno surinai; bo bai bini nokni joto borok Kaitorno suri-o. Judai kwrwirokno bo kwbángma’-no chuba-o, phiya Kaitorni thani suri san máng tongo.

³ Salsa sarikni diboro bo Kaitor bai imang phunukjak kha, a imango bo dak-dak khe Kaitorni suari khoroksano nuk kha; a suari bisingo phaiwi bono hai hwnwi sa kha, “O Kornili!”

⁴ Bo kirijagwi suarino lok-lok khe naisigwi “Subrai, tamo khlaina ring?” hwnwi sẃng kha. Suari bono hai hwnwi sa kha, “Nwng suri sanmarokno Kaitor khna kha, kwrwirokno chubamanobo nuk kha, hakhe bo nini kók saui man kha.

⁵ Simon hwnwi khoroksano na rwhorna bagwi tabuk Jopa-o borok rohor di. A Simon hwnjaknaino Pitorbo hwno,

⁶ twijlang rukungo tongnai Simon hwnwi bukurni samung tangnaini nogo bo nograi.”

⁷ Bono kók sanai a suari tháng khe Kornili bini nokni seleng khoroknwino tei bini logisong sengkrak khoroksano ring kha, abo Kaitorno surinai.

⁸ A imangni kókno saui khna rwui bo bórokno Jopa-o rohor kha.

⁹ Teini salo bórok tháng te tháng te Jopa gana sók phai kha, aphuru dibor ká twtwi-o Pitor suri sanna bagwi sakani nuka-o tháng kha.

¹⁰ Bo ok khuijagwi chána nai kha; yang mai-mui munjak, aphuru bo Kaitor bai imang phunukjak kha.

¹¹ Bo nokha phiyokjak nuk kha, hakhe bo tamobo ongkhorwi phaima nuk kha, abo rí kotor kangsa babai brwi romwi ha-o tikhlai rohorma hai.

¹² Aro uak-tok, chibuk-sindrai tei toksa-toktẃirok podrepot’-no tongo.

¹³ Bini thani o kók hai hwnwi sajak kha, “O Pitor, bacha di, butharwi chá di.”

¹⁴ Hakhe Pitor hai hwnwi sa kha, “I’nhi, ang wng glak, Subrai! Omo tẃi chámaya manwi hamyarokno ang chá trwng ya kho.”

¹⁵ Bono hai’-no hai hai hwnwi sa khua, “Kaitor cháui mano hwnmano nwng chámaya ta hwn di.”

¹⁶ Omo hai uáitham wng kha, hakhe abo nokha saka tisaui tlangjak phi kha.

¹⁷ Bo o nukmani omo tamo wng thotok de hwnwi Pitor uansugui tongmani. Aphuruno Kornili bai rohorjaknai a bororok Simonni nok buro abo saui manẃi duglam bwskango bachajak.

¹⁸ Bórok hai hwnwi sẃng hor kha, “Oro Simon Pitor hwnwi nograi khoroksa to da tong?”

¹⁹ Pitor aphuru phano a imangni gujok tamo saui manna naiwi tong kho, aphuru Phola hai hwnwi sa kha, “Nai di, nono borok khoroktham rutugo.

²⁰ Bacha di, tola-o ongkhor di. Bwkha dudru mudru wng yaui bórok bai baksa tháng di, tamni hwn khe ang’-no bórokno tubu-o.”

²¹ Hakhe Pitor tola-o ongkhorwi a bororokno hai hwnwi sa kha, “Ang’-no norok rutukmani a borok. Norok tamni phai?”

²² Bórok hai hwnwi sa kha, “Sengkrak okra Kornili chwngno rohoro.” Bo borok kaham, Kaitorno suri-o, bebak Judairok bono bóri-o. Kaitorni suari khoroksa bono hai hwnwi sa kha, “Nini nogo Simon Pitorno na rw horwi bo samano khna di.”

²³ Pitor a bororokno nogo kasa rwui a horo muthu kha. Teini salo bo bachaui bórok bai tháng kha; phiya Jopani takhukrok khoroknwi khorokthambo bini logi tháng kha.

²⁴ Aboni teini salo bo Kaisaria-o sók phai kha; aro Kornili bini nogo kobokjak sandai-masak tei kiching-bayapsong bai naisingwi tong lai-o.

²⁵ Pitor bisingo tháng phuru Kornili bo bai malaiwi bini yakungo pwtapsa khe khulum kha.

²⁶ Tamo khe Pitor bono sochaui hai hwnwi sa kha, “Bacha di, angbo borok ja se.”

²⁷ Noksingo tháng twtwi Pitor Kornili bai kók sama cho li ya, bisingo habwi bo borok kwbángma kuthumjak nuk kha.

²⁸ Bo bórokno hai hwnwi sa kha, “Buini borok bai Judai tháng lai-phai lai eba tong lai-chá lai man ya abo chini Kerongo tongo omono norokbo kaham khe saui manjak. Tamo khe kebo bai tongmaya chámaya ta hwn di hwnwi Kaitor ano phunuk kha.

²⁹ Aboni bagwino ano na rw hor khe ang in’-hi hwn yaui phai kha. Hakhe tamo wngwi norok ano na rw hor ang norokno sẃngo?”

³⁰ Kornili hai hwnwi sa kha, “Nokha saltham swkang amo swk jora’-ono wng anw sarikni diboro ang noksingo suri sanwi tongmani. Rí jingmarijak kanjak borok khoroksa achomsa ani bwskango bacha phaiwi

³¹ hai hwnwi sa kha, ‘O Kornili, nwng suri sanmano Kaitor khna kha, kwrwirokno chubamanobo saui man kha.

³² Simon hwnwi khoroksano na rwhorna bagwi Jopa-o borok rohor di. A Simon hwnjaknaino Pitorbo hwno, twijlang rukungo tongnai Simon hwnwi bukurni samung tangnaini nogo bo nograi.’

³³ Aboni bagwino ang logi logi’-no nono na rw hor kha, hakhe nwng phai ja kha. Tabuk chwng bebak’-no Kaitorni bwskango, Subrai nono sa di hwnmarokno khnana hwnwi chwng naisingwi tongo.”

Kornilini nogo Pitor kók samani

³⁴ Pitor hai hwnwi sacha kha, “Kaitor bebak bororokno baksa khe nugo, o kók sói se hwnwi ang tabuk saui man kha.

³⁵ Kaitorno kiriui samung sói khlainaino bo yachago, a borok jesa dophani phano wng thung.

³⁶ Kaitor Israilrokno rohormani kókno norok saui mano. Bebak bororokni Subrai Jisu Khristoni bising tẃi kwthanani Kothoma Kahamno bo sakhlai kha.

³⁷ Johon baptisma pírmani ulo Galilini simi Israilrokni ha gwnangwi aswk wngmano norok saui mano.

³⁸ Norok Nasaretni Jisuni kók saui mano, bahai khe Kaitor bono Phola Kwtharbo kolob rw kha, phanbo rw kha. Samung kaham khlai twtwi, phiya Soitanni yago klaijakrokno ham rw twtwi bo ha gwnangwi tháng kha, tamni hwn khe Kaitor bo bai tongo.

³⁹ Judairokni ha-o tei Jerusalemo bo aswk samung khlai langmarokni chwng aboni sakki. Bórok bono kruso kanta bu-ui buthar kha.

⁴⁰ Hai phano salthamni salo Kaitor bono mwthangwi nukjak rw kha,

⁴¹ bebak borokni thani ya, bini sakki chongjak chini thani simi se. Bo kwthwini thangwi bachamani ulo chwng bo bai chá lai kha nung lai kha.

⁴² Bororokni thani Kothoma Kahamno pír di hwnwi bo chwngo dagi kha, phiya Kaitor bono’-no kwthangrok bai kwthwirokni buj thumna bagwi chong kha abonobo sa di hwnwi dagi kha.

⁴³ Bebak diyarirok bini kókno hai hwnwi sa lang kha, bono poito khlainai joto borok bini mungwi sumsok nakarjaknai.”

Buini bororok Phola Kwthar manmani

⁴⁴ Pitor kók saui tong phuru bo samano khnaui tongnai jotonono Phola Kwthar kobol phai kha.

⁴⁵ Buini bororokno suda Kaitor Phola Kwthar ahaino kobol rwma bai Pitor bai phainai Jopani poito khlainairok uanajak bai kha.

⁴⁶ Tamni hwn khe buini bororok hámung sini ya kók samabo bórok khna kha, Kaitorno kotor hwnwi lobmabo khna kha. Pitor hai hwnwi sacha kha,

⁴⁷ “O bororok katswi chwng hai’-no Phola Kwthar man kha. Hakhe bórok twi bai baptisma wngmano kebo da kasu-ui man no?”

⁴⁸ Aboni bagwino bo Jisu Khristoni mungwi baptisma wng di hwnwi dagi kha. Hakhe “Chwng bai nokha salnwi saltham swk tong di,” hwnwi bórok bono hwn kha.