SAMUNG 1 - Kok Borok (Re-edited) Bible (BSI)

¹ Khájani Thiopil: Jisu bini samung chengmani simi chuknoha-o tisaui tlangjak ya sak bo aswk samung khlai langmarok bai aswk phrwng langmarokno ang ani swkangni bijabo swi bai kha.

² Bo chuknoha-o tisaui tlangjak ya sini bo chonghor hwnwi chongmarokno Phola Kwtharni phan bai phrwngwi klang kha.

³ Bórok bwkha dudru mudru wngwi man ya tẃi khe thwimani ulo nokha sal brwichi jora bo sakno kwthang hwnwi kwbángmano phunuk lang kha; bo bórok bai nukjak lang kha, hakhe bórok bai Kaitorni hani kók sa lai lang kha.

⁴ Bo bórok bai malai phuru hai hwnwi dagi kha, “Norok Jerusalemni ta kutul di, tamo khe Apha rwna hwnwi kók rwmano naisingwi tong di, a kókno ang norokno sa kha bla.

⁵ Johon twi bai se baptisma rw-o, norok khe nokha salnwi salthamni ulo Phola Kwthar bai se baptisma rwjak anw.”

Jisu chuknoha-o tisaui tlangjakmani

⁶ Jisu bai malai phuru chonghorrok bono hai hwnwi sẃng kha, “Subrai, tabuk da nwng Israilrokni yago ha kiphilwi rwnai?”

⁷ Jisu bórokno hai hwnwi sa kha, “Bu phuru tamo wngno wng ya abo ani Aphani yago simi se, hakhe abo norok saui mannani kók ya.

⁸ Phiya ba Phola Kwthar norokno kobol phai phuru norok phan man anw, hakhe Jerusalem, Judia bai Samaria gwnangwi, phiya haktor páithak jora norok ani bagwi kók sa anw.”

⁹ O kók sa bai kheno bórokni mokol bwskango bo chuknoha-o tisaui tlangjak kha, hakhe chumui dolasa bono kotonwi rw phaima bai bórok bono nuk li ya.

¹⁰ Bórok Jisu thángmano lok lok khe nokhasa bwkhak naisa lai se tong kho, aphuru achomsa rí kuphur kanjak borok khoroknwi bórokni aro bacha phai kha.

¹¹ Bórok hai hwnwi sa kha, “O Galilisong, norok thóng-thóng khe nokhasa bwkhak tamo wngwi naisa laiwi tong? Norokni aroni chuknoha-o tisaui tlangjaknai o Jisu kiphilwi phai anw, bo chuknoha-o thángmano norok nukma hai khe’-no bo kiphilwi phai anw.”

Judasni yagulo Mathiano chongmani

¹² Aphuru chonghorrok Tháistwi Hatháini Jerusalemo kiphilwi tháng lai kha, abo taun bai mail khaksa wng anw.

¹³ Bórok Jerusalemo habwi tongma khotolo kasaui tháng lai kha. Bórok wng kha: Pitor, Johon, Jakob, Andria, Philip tei Thoma, Bartholomai tei Mathai, Alphaini bwsla Jakob, Kanansa Simon tei Jakobni bwsla Juda.

¹⁴ Bórok bwrwirok bai, Jisuni buma Mariam tei bini takhukrok bai thupsa khe suri sanna hwnwi kuthum kuthum lai-o.

¹⁵ Nokha salnwi salthamni ulo poito khlainairok kuthum lai kha, bórok bebagwi khorok sara nwichi wng anw. Aphuru Pitor bachaui hai hwnwi sa kha,

¹⁶ “Ani takhukrok, Jisuno romnairokno lama phunugui tubunai Judasni kók elembago Daudni khúk tẃi Phola Kwthar sa rwmani abo nang phai thai ba ma nang kha.

¹⁷ Judas chini bisingni borok se, chwng bai baksa samung khlaina hwnwi bo’-bo chongjakmani.

¹⁸ (A samung hamya khlaiwi Judas rang manmani abo bai bo chara dolasa pai kha, bo aro’-no klaiwi thwi kha; bini bohok pekhagwi bubuksarok ongkhorwi phai kha.

¹⁹ Jerusalemo tongnai bebak bororok abono khna kha, hakhe bórokni kók bai a charano Akeldama hwno, abo Thẃini Chara hwnmani se.)

²⁰ Tamni hwn ba Lobmungo hai hwnwi swijak tongo, ‘Bini nok bukcha wng thung; khoroksa phano aro ta tong thung.’ Omo haibo swijak tongo, ‘Bini samungno khoroksa swk khlai thung.’

^21-22 Hakhe tabuk, Subrai Jisu thangwi bachamani abono sakki wngna bagwi chwng bai baksa khoroksa swk ma’-se ma tongnai. Johon baptisma rw phuruni simi Jisu chini aroni chuknoha-o tisaui tlangjakma jora Subrai Jisu chwng bai phai-o thángo wngwi tong phuru o borok chini bisingo tongjak wngna nangnai.”

²³ Hakhe bórok khoroknwino bacha rw kha, khoroksa khe Josep, bono Barsaba hwno (bono Justobo hwno), tei khoroksa khe Mathai.

^24-25 Aphuru bórok hai hwnwi suri san kha, “Subrai, nwng joto borokni bwkhano saui mano. Hakhe Judas bini tongthai-o thángma yagulo chonghor wngwi samung khlaina bagwi o khoroknwini bere nwng sabono chong, o Subrai abono chwngno phunugui rw di.”

²⁶ Hakhe bórok a bumung kwnwino pat ka rwui nai lai kha. Mathiani bumung kasa kha, hakhe a chonghor chisarokni bisingo bo sitokjak kha.