SAKARIA 9 - Kok Borok (Re-edited) Bible (BSI)

Ganani dopharokni saka buj klaima

¹ Subraiyung ha Hadrak bai Damaskosni bagwi hai hwnwi sa kha, Israilni bebak dophani bugra wngma hai Aramni kamiyungni bugrabo Subraiyung se;

² a ha ari-o tongnai Hamat nwng Tur bai Sidon elem kwrwng wng phano.

³ Tur sakni bagwi katijaknai nok kwrak tang kha tei hadlwi hai khe rukphai tei laharni ha kosok hai khe rangchak thum kha.

⁴ Phiya ba Subraiyung bini aswk tongma bebak tlangwi tháng bainai tei twijlango abono khibiui rwinai tei kamiyung hór bai sógwi páijaknai.

⁵ Askelon abono nugwi belai kirima chanai; Gajabo abono nugwi bwkha khamnai; Ekronnibo khatungma páinai. Gajani habugra kwmanai, Askelono tongnai tong glak.

⁶ Phatar hani bororok Asdodo tong phainai tei ang kung chuknai Philistiani kung chukmano pái rwnai.

⁷ Ang bini búkhúkni thẃi gwnang muihan tei chá ma ya chámungrokno ongkhlai rwnai; yógwi tong rwknairok chini Kaitorni jarwi Juda bosongni borok hai wngnai tei Ekron khe Jebussa hai wngnai.

⁸ Hakhe ang ani hano mwrwknaisa hai khe mwrwknai, hakhe aro kebo tháng-phai khlaiwi man glak; kusupnairok ani bororokno tei mechenwi man glak, tamni hwn ba ang tabuk ani mokol baithang’-no nuk kha.

Bwskangni habugra

⁹ Kaham khe tongthok di, o Siyonni sajwk! O Jerusalemni sajwk chirik di! Nai di norokni habugra norokni thani phai-o; bo kwplai tei phan gwnang khe phai-o. Bo koinene khe koraichirka saka-o koraichirka bwrwi bwsa saka-o achukjak.

¹⁰ Bo Ephraimni chobani korai malkhungrokno nornai, Jerusalemni chobani korairokno nornai; chobani badukhungrokno swbainai; tei dopharokno kwchang kwchang khe tongna daginai; bini ha twijlangni simi tei kaisa twijlang jora wngnai, twimani simi ha páithak jora bugra chánai.

Kaitorni bororok songchajakma

¹¹ Nwng ratharwi yapharmani thẃi bai khe ang bai swmai rwjakni bagwi ang nini khajakrokno twi kwrwi hakhorni phiyóknai.

¹² O khatungma gwnang khajakrok, norokni katijaknai gwnang tongthai-o kiphil di; ang nono duna khe songcha anw.

¹³ Ang Judiano ani badukhung snamnai tei Ephraimno khe makal snamnai. Ang Siyonni bororokno sengkrakni seng hai khlaiwi, Grisni bororok bai choba phnangnai.

¹⁴ Hakhe Subraiyung bini bororok bai nukjaknai tei bini makal phirang hai khe kokphlonai; Subraiyung Kaitor Totro khorang khlainai, tei salgrabaini nokbar kotor bising tẃi yapri séui phainai.

¹⁵ Phan gwnang Kaitor bórokno kati rwui tongnai, tei bórokno kebengnai arirokno sokomornai, bórokni khitarjaknai badulrokno kádulnai; bórokni thẃirokno chuak hai khe nungwi phek lainai tei abo dangai hai kupulung wngnai; tei háyá-o ratharwi yapharma thẃi dangaini háyá-o lukhlaima hai kochoknai.

¹⁶ A salo Subraiyung Kaitor bini bororokno phiyóknai; tamni hwn ba bo bini bororokno mera hai khe mwrwknai; bórok bini ha-o motokni holong kaham hai khe chẃngnai,

¹⁷ bini kaham tei naithokma bwswk se naithok! Chwla siklarok chámung snamnai, tei bwrwi siklarok arak kwtal hai naithok wngnai.