SAKARIA 7 - Kok Borok (Re-edited) Bible (BSI)

Subraiyung ereng ubas tongmano naislerjago

¹ Darias habugra chámani nokha bisik brwi phuru, talchuku talni (abo Kisleb klai-o) sal brwini salo Subrai ano hai hwnwi sa kha.

² Hakhe kamiyung Bethelni bororok Sarejer bai Regem-melek tei bórokni palrokno Subraiyungni thani hamari sannani bagwi suri sannani rohor lai kha,

³ “Bisi kwbángma khlaima hai talbani talo ubas tongwi ang kapnai de?” hwnwi bórok ochairok bai diyarirokno sẃngnani bagwibo rohorjak kha.

⁴ Aphuru khe Subraiyung ano hai hwnwi sa kha;

⁵ “Hani bororokno ochairokno thángwi saui di: Norok bisisnichi bisini bisingo talba tei talsni talo ubas khe surimani abo ani bagwi khlaima diba?

⁶ Norok chá lai nung lai wng laimani abo norok sakni bagwi simi ya da?”

⁷ Negeb tei Sephelasong Jerusalemo hamchaui tong phuru tei a kamiyungno kitingwi kubun kamiyungrok tong phuru swkangni diyarirokni khúk tẃi Subraiyung o kókno sa ya diba?

Kók khna ya wngma bagwi buini ha-o ma tongwimani

⁸ Subraiyung Sakariano hai hwnwi sa kha,

⁹ Kwplaisa Subraiyung hai hwnwi sa-o: “Norok bujsói khlaina nai di tei khoroksa tei khoroksano maya cha di;

¹⁰ randijwkrokno, ma-pha kwrwirokno, phatar hani bororokno, tei kwrwirokno ta kusup si di; tei sakni takhukno hamya khlaina bwkha ta chap si di.”

¹¹ Tamo khe bórok kók khna li ya tei khna ya khe tongna bagwi bwkha kwrak khe bórokni khunju muthup lai kha.

¹² Phan gwnang Subraiyung bini phola bai swkangni bini diyarirokni bising tẃi bórokno tholma kókrokno khna ya khe tongna bagwi bórok bórokni bwkhano holong hai kwrak khlai lai kha. Aboni bagwi phan gwnang Subraiyungni jolima bórokni saka-o klai kha.

¹³ “Ang sa phuru bórok khna bai li ya, hakhe bórok suri phuru khe angbo khna li ya” hwnwi phan gwnang Subraiyung sa-o,

¹⁴ “bórok sini ya kwbángma dopharokni bisingo nokbar kotor bai khe ang bórokno oroi-poroi khlai kha. Hakhe ha yakarjak wng kha, khoroksabo aro tháng phai khlai li ya tamo khe tong thotok ha khibijak wngwi pái kha.”