SAKARIA 6 - Kok Borok (Re-edited) Bible (BSI)

Imang-mukthango korai malkhung khungbrwi nukma

¹ Ang tei uáisa naiba, pitolni hachuk tháinwi kwchar tẃi korai malkhung khungbrwi phaima nuk kha.

² Swkangni malkhungo khe korai kwchak tei kaisa-o khe korai kosomrok bai sojak,

³ ulthamo khe korai kuphurrok, ulbrwi-o khe korai bumul phudulu-dulu bumul gwnang korairok.

⁴ “Bubagra, abórok tamo?” hwnwi ang bai kók saui tongnai suarino ang sẃng kha.

⁵ Suari ano hai hwnwi sa kha, “Omorok wng kha chuknohani ongkhorwi phainai kaibrwi nokbarrok, bórok Subraiyungni bwskangni se o ha saka-o ongkhorwi phai-o.

⁶ Korai kosomrok bai sojak korai malkhung salsibai bwkhakni ha-o thángo, korai kuphurrok salthángbaini ha-o thángo tei bumul gwnang a phudulu-dulu korairok khe salgrabai bwkhakni ha-o thángo.”

⁷ Korairok ongkhorwi phai khe, ha kitingwi nainani bagwi do súgwi tong kha. Hakhe bo dagiui hai hwnwi sa kha, “Tháng di, ha gwnangwi kitingwi mwrwgwi di.” Hakhe bórok tháng lai kha.

⁸ Hakhe suari chirigwi ano hai hwnwi sa kha, “Naisik di, salsibai bwkhakni ha-o thángnai korairok khe lengla rwui ani jolima ham rw bai kha.”

Josuano motok thup rwna dagima

⁹ Subraiyung ano hai hwnwi sa kha:

¹⁰ “Buini ha-o ma tongwinai Heldai, Tobiya tei Jedaiasongni thani rangchak bai rukphai na di. Hakhe ha Babilonni kiphilnai Japhaniani bwsla Josiani nogo doui a salo’-no tháng di.

¹¹ Rangchak tei rukphaini motok snam di tei abono ochaiyung Jehosadakni bwsla Josuani khorogo thup rwui rw di;

¹² Bono sa di: Kwplaisa Subraiyung hai hwnwi sa-o, ‘Nai di, bini bumung wng kha bedek: tamni hwn ba bo bini tong thani’-no tornai tei bo Subraiyungni noktharno tangnai.’ ”

¹³ Ao, bo se Subraiyungni noktharo thángnai; bórom khlaijaknai, bo bini achukthayungo achugwi naikolphang wngnai. Bini achukthayungo ochai khoroksa tongnai, bo bórok kwnwini bisingo kók baksa khe tongwi kwchang kwchang khe samung tang lainai.

¹⁴ Heldai, Tobiya, Jedaia, Japhaniani bwsla Josiasongni mukumu-o a motok Subraiyungni noktharo tonjaknai.

¹⁵ Hakchalo tong bainai bororok phaiwi Subraiyungni noktharno tangnani phaiwi chuba phainai; hakhe norokni thani phan gwnang Subraiyung se ano rohoro hwnwi saui mannai. Tumungno norok sói kaham khe norokni Subraiyung Kaitorni kókno khna khe abórok bebak nang phainai.